Isaías
26 Ki̱vi̱ saá katana yaa yóʼo chí nu̱ú ñuʼú ña̱ Judá:
“Ndakúní ñuuyó.
Ña̱ ndáara miíyó, íyoña nda̱a̱ táki̱ʼva íyo u̱vi̱ nama̱ ña̱ súkunní ña̱ íyo sa̱tá ñuu.
2 Ndakunándó yéʼé ná ki̱ʼvi na̱ ñuu na̱ nda̱kúní-ini,
iin ñuu ña̱ kéʼé nina ña̱ nda̱kú.
3 Kundaún na̱ ndáa-ini yóʼó,
ndiʼi ki̱vi̱ sandíkoún-inina,
saáchi yóʼó kúú ta̱ kándíxana.
4 Ndiʼi ki̱vi̱ kundaa-inindó Jehová,
saáchi Jehová,* Jehová íyora nda̱a̱ táki̱ʼva íyo iin yu̱u̱ káʼnu ña̱ íyo ndiʼi tiempo.
5 Ta̱yóʼo sa̱kóyora na̱ ni̱xi̱yo nu̱ú súkun, na̱ ni̱xi̱yo ñuu ña̱ súkunní kánuu.
7 Nda̱kúní yichi̱ ña̱ xíka na̱ kéʼé ña̱ nda̱kú.
Ta yóʼó, xa̱ʼa̱ ña̱ kéʼún ña̱ nda̱kú,
ndasanda̱ún yichi̱ na̱ kéʼé ña̱ nda̱kú.
8 Jehová, tá xíkandi̱ yichi̱ nu̱ú ndátiún ku̱a̱chi xíʼinndi̱,
kándíxandi̱ yóʼó xíʼin ndiʼi níma̱ndi̱.
Ndáyáʼviní ki̱vi̱ún nu̱úndi̱ ta kúni̱ndi̱ ná ndakaʼánna xa̱ʼa̱ña.
9 Tá ñuú, kúni̱níi̱ kunii̱ yóʼó xíʼin ndiʼi níma̱i̱,
nándukúi̱ yóʼó xíʼin ndiʼi níma̱i̱;
saáchi tá ndátiún ku̱a̱chi xíʼin na̱ yiví,
saá kúú ña̱ sákuaʼana keʼéna ña̱ nda̱kú.
10 Ni ná kundáʼvi-inina kunina na̱ ndi̱va̱ʼa-ini,
va̱ása sakúaʼana keʼéna ña̱ nda̱kú.
Ni ná kundoona nu̱ú ñuʼú nu̱ú kéʼéna ña̱ nda̱kú, ndi̱va̱ʼakava koo inina,
ta va̱ása kotona ña̱ káʼnuní Jehová.
11 Jehová, nda̱niʼún ndaʼún soo va̱ása xítonaña.
Kunina ña̱ kúʼvi̱ní-iniún xíniún na̱ ñuún ta kukaʼan nu̱úna.
Ñuʼu̱ ña̱ xíniñúʼún ña̱ xáʼmiún na̱ sáa̱-ini xíni yóʼó, kaʼmiñana.
12 Jehová, yóʼó va̱ása taxikaún kundi̱ʼi-inindi̱,
saáchi ndiʼi ña̱ ke̱ʼéndi̱,
miíún kúú ta̱ ta̱xi ndee̱ ndaʼa̱ndi̱ ña̱ ke̱ʼéndi̱ña.
13 Jehová, Ndióxi̱ miíndi̱, inkana xi̱xaʼndachíñu nu̱úndi̱,
soo iinlá ki̱vi̱ miíún kúú ña̱ ndásakáʼnundi̱.
14 Na̱ ni̱xi̱ʼi̱ kúú na̱yóʼo; va̱ása kutakuna.
Va̱ása kúúmiína ndee̱ ta va̱ása ndako̱ona.
Saáchi nda̱tiún ku̱a̱chi xíʼinna
ña̱ va̱ʼa sandíʼi-xa̱ʼúnna ta kǒoka na̱ ndakaʼán xa̱ʼa̱na.
15 Jehová, nda̱saku̱a̱ʼákaún na̱ ñuún,
ku̱a̱ʼáníka nda̱saúnna;
ndu̱káʼnún xa̱ʼa̱ ña̱ ke̱ʼún ña̱yóʼo.
Ku̱a̱ʼáníka ñuʼú ta̱xiún ndaʼa̱ na̱ ñuu yóʼo.
16 Jehová, tá ni̱ndi̱ʼi-inina, ni̱ka̱ʼa̱nna xíʼún ña̱ chindeétáʼún xíʼinna;
ni̱ka̱ʼa̱n ya̱ána xíʼún tá ta̱xiún castigo ndaʼa̱na.
17 Nda̱a̱ táki̱ʼva ndóʼo iin ñaʼá ñá xa̱a̱ kúni̱ kaku se̱ʼe,
tá ndeéní xáʼnda se̱ʼeñá ta ndáʼyi̱ kóʼóñá* xa̱ʼa̱ ña̱yóʼo,
saá sáxo̱ʼvi̱ún ndi̱ʼi̱ Jehová.
18 Ni̱ke̱e se̱ʼendi̱, xa̱ʼndaña inindi̱,
soo ta̱chí kuitíva sa̱kákundi̱.
Va̱ása níkivi sakǎkundi̱ ñuʼú yóʼo,
ta kǒo na̱ káku kundoo nu̱úña.
19 “Na̱ ñuundó na̱ ni̱xi̱ʼi̱, kutakuna.
Na̱ ñui̱ na̱ ni̱xi̱ʼi̱, ndako̱ona.
Ndakáxí-inindó ta nda̱ʼyi̱ kóʼóndó xa̱ʼa̱ ña̱ kúsi̱í-inindó,
ndóʼó na̱ ndóo nu̱ú yáká.
Saáchi yúyú ña̱ kóyo sa̱tándó, íyoña nda̱a̱ táki̱ʼva íyo yúyú ña̱ kóyo xi̱ta̱a̱n,*
ñuʼú yóʼo ndataváña na̱ ni̱xi̱ʼi̱ nu̱úña.
20 Na̱ ñuu miíi̱, kúáʼanndó ta ki̱ʼvindó ini cuarto ña̱ ndíkaa̱ nda̱a̱ ma̱á,
ta tá xa̱a̱ ni̱ki̱ʼvindó, ndakasindó yéʼé.
Ta kán koose̱ʼéndó,
nda̱a̱ ná va̱ása sa̱a̱ka Ndióxi̱.
21 Saáchi kotondó, nda̱a̱ nu̱ú íyo Jehová ki̱tara va̱xira
ña̱ taxira castigo ndaʼa̱ na̱ ndóo nu̱ú ñuʼú yóʼo xa̱ʼa̱ ku̱a̱china,
ta nda̱a̱ táki̱ʼva koo ña̱ natúʼun xa̱ʼa̱na saá koo ñuʼú yóʼo, chi ku̱a̱ʼánína ni̱xi̱ʼi̱ nu̱úña
ta va̱ása kivika chise̱ʼéña na̱ ni̱xi̱ʼi̱”.