Isaías
46 Kúxítí ndióxi̱ ña̱ naní Bel, ndióxi̱ ña̱ naní Nebo ndáku̱ndeeña.*
Ña̱ʼa ña̱ ndásakáʼnuna, sa̱tá kitíva níndosoña ku̱a̱ʼa̱nña, níndosoña sa̱tá kití yukú,
kúnaakaví kití yóʼo ndísoríña ku̱a̱ʼa̱nrí chi ve̱ekavíña.
2 Inkáchi ndáku̱ndeerí ta xíkuxítírí xíʼinña;
va̱ása kívi sakǎkuríña,
saáchi nda̱kiʼinnaña ku̱a̱ʼa̱nña inka ñuu.
3 “Kuniso̱ʼo ndóʼó na̱ veʼe ta̱ Jacob xíʼin ndiʼi ndóʼó na̱ veʼe ta̱ Israel,
ndóʼó na̱ ki̱xáʼíi̱ chíndeétáʼi̱n xíʼin nani tá ka̱kundó,
ta xi̱ndai̱ ndóʼó nda̱a̱ táki̱ʼva ndáa iin ñaʼá se̱ʼe loʼoñá.
4 Ni ná kuchéún, va̱ása nasa̱mai̱;
ni ná kana vi̱xi xi̱níún chindeétáʼankavai̱ xíʼún.
Nda̱a̱ táki̱ʼva xa̱a̱ kéʼíi̱, kuniʼii̱ yóʼó ku̱ʼi̱n, chindeétáʼi̱n xíʼún ta sakǎkui̱ yóʼó.
5 ¿Ndáana kivi chitáʼanndó xíʼi̱n
á ndáana kivi ka̱ʼa̱nndó xa̱ʼa̱ ña̱ íyona nda̱a̱ táki̱ʼva íyo yi̱ʼi̱?
¿Ndáana kivi chitáʼanndó xíʼi̱n ta ka̱ʼa̱nndó ña̱ inkáchi íyona xíʼi̱n?
6 Íyo na̱ yiví na̱ va̱ása vií xíniñúʼu oro ña̱ kúúmiína,
kátana plata nu̱ú ña̱ʼa ña̱ kátana ña̱ʼa.
Káʼa̱nna xíʼin iin ta̱ kéʼé ña̱ʼa ña̱ ka̱a ña̱ ná keʼéra iin ndióxi̱ xíʼinña.
Tándi̱ʼi, kúxítína nu̱úña ta kíxáʼana ndásakáʼnunaña.
7 Chínúunaña so̱ko̱na ta níʼinaña ku̱a̱ʼa̱nna,
kánindichinaña nu̱ú xíniñúʼu kundichiña ta kán kíndo̱oña.
Va̱ása kívi kanda̱ña.
Xákundáʼvina nu̱úña soo va̱ása ndákuiinña;
va̱ása kívi sakǎkuña na̱ ndíʼi̱ní-ini.
8 Ndakaʼánndó xa̱ʼa̱ ña̱yóʼo ta ndakú koo inindó.
Ndóʼó na̱ ku̱a̱kiʼvi ku̱a̱chi viíní ndakanixi̱níndó xa̱ʼa̱ ña̱yóʼo.
9 Ndakaʼánndó xa̱ʼa̱ ña̱ʼa ña̱ ku̱u tiempo xi̱naʼá,
ndakaʼánndó ña̱ yi̱ʼi̱ kúú Ndióxi̱, ta kǒoka inkana.
Yi̱ʼi̱ kúú Ndióxi̱ ta kǒoka inka na̱ íyo táki̱ʼva íyo yi̱ʼi̱.
10 Nani tá xa̱ʼa̱, káʼi̱n xa̱ʼa̱ ña̱ kuu so̱ndíʼi
ta xa̱a̱ ya̱chi̱ka káʼi̱n xa̱ʼa̱ ña̱ʼa ña̱ kúma̱níka kuu.
Yi̱ʼi̱ káʼi̱n ña̱yóʼo: ‘Ña̱ nda̱kaxii̱n keʼíi̱ va̱ása nása̱maña,
ta keʼíi̱ nda̱a̱ ndáaka ña̱ kúni̱ miíi̱’.
11 Nda̱a̱ chí nu̱ú kíta ñu̱ʼu* kanai̱ iin ta̱sú* kixirí,
nda̱a̱ nu̱ú íyo iin ñuu ña̱ ndíkaa̱ xíká, kanai̱ iin ta̱a ña̱ kixira keʼéra ña̱ nda̱kaxii̱n keʼíi̱.
Ni̱ka̱ʼi̱n keʼíi̱ña ta keʼévai̱ña.
Chi̱kaa̱-inii̱ keʼíi̱ña ta saxínuvai̱ña.
12 Kuniso̱ʼo ndóʼó na̱ ndeéní-ini,
ndóʼó na̱ íyo xíkání nu̱ú ña̱ va̱ʼa.
13 Xa̱a̱ ku̱yatin ki̱vi̱ ña̱ keʼíi̱ ña̱ nda̱kú;
va̱ása xíká íyoña ta va̱ása kukuachi̱ ki̱vi̱ ña̱ sakǎkui̱ ndóʼó.
Sakǎkui̱ yuku̱ Sion ta na̱ʼi̱ ña̱ káʼnu ña̱ kúúmiíi̱ nu̱ú na̱ ñuu Israel”.