Nu̱ú kíxaʼáña

ÑA̱ HISTORIA ña̱ va̱xi nu̱ú libro yóʼo ndixa ku̱uña. Nu̱ú Biblia ta̱vánaña. Nátúʼunña xa̱ʼa ña̱ ku̱u tá ki̱xaʼá Ndióxi̱ íxava̱ʼara ñuyǐví yóʼo iin saá nda̱a̱ tiempo ndóoyó vitin. Ta káʼa̱nña xíʼinyó xa̱ʼa ña̱ kúni̱ Ndióxi̱ keʼéra chí nu̱únínu.

Nu̱ú libro yóʼo kivi kunda̱a̱-iniún xa̱ʼa sava ña̱ʼa ña̱ va̱xi nu̱ú Biblia. Nátúʼunña xa̱ʼa sava na̱ yiví xíʼin xa̱ʼa ña̱ ke̱ʼéna. Saátu káʼa̱nña xíʼinyó ña̱ kúni̱ Ndióxi̱ taxira ñuyǐví xa̱á ndaʼa̱ na̱ yiví ña̱ va̱ʼa xa̱a̱na koona ndiʼi tiempo nu̱úña.

Nu̱ú libro yóʼo va̱xi 116 historia. U̱na̱ táʼvi nda̱taʼvíña. Nu̱ú kíxaʼá iin iin táʼvi va̱xi iin página ña̱ káʼa̱n xa̱ʼa ña̱ va̱xi nu̱úña. Nu̱ú libro yóʼo, va̱xi iin tá iin ña̱ historia nda̱a̱ táki̱ʼva ku̱uña tiempo xi̱naʼá. Ña̱yóʼo kivi chindeé táʼanña xíʼún ña̱ va̱ʼa kunda̱a̱-iniún ndáa tiempo ku̱u iin iinña.

Va̱ása yo̱ʼvi tu̱ʼun ña̱ va̱xi nu̱ú libro yóʼo. Ku̱a̱ʼání na̱ va̱lí kivi kaʼvinaña ta va̱ʼa kunda̱a̱-inina xíʼinña. Na̱ íyo se̱ʼe ni ku̱a̱ʼá yichi̱ ná kaʼvinaña nu̱ú se̱ʼena, na̱ va̱lí yóʼo kusi̱í-inina kuniso̱ʼonaña. Ni válína á ni xa̱chéena, ku̱a̱ʼání ña̱ va̱ʼa kúúmií libro yóʼo ña̱ kivi sakuaʼana.

Nu̱ú ndíʼi iin iin historia yóʼo va̱xi texto ña̱ Biblia. Káʼa̱nndi̱ xíʼún ná kaʼviúnña nu̱ú Biblia, chi kán ka̱na historia yóʼo. Tá ndíʼi káʼviún iin iin historia, koto nu̱ú ndíʼi historia 116, kán va̱xi ña̱ ndáka̱tu̱ʼun ta koto á va̱ʼa ndakuiúnña.