Iin se̱ʼena ta̱ va̱ʼa ta iin ta̱ va̱ása va̱ʼa

KOTO ta̱ Caín xíʼin ta̱ Abel xa̱chée na̱yóʼo. Ta̱ Caín ta̱ xi̱kachíñu yuku̱ xi̱kuura. Ta ku̱a̱ʼá ña̱ʼa xi̱chiʼira.

Ta̱ Abel ndikachiva xi̱ndaara. Ta̱yóʼo xi̱kutóora kundaara ndikachi ta tíyóʼo xáʼnurí ta ndúku̱a̱ʼárí.

Iin ki̱vi̱ ta̱ Caín xíʼin ta̱ Abel níʼina iin ña̱ʼa taxina ndaʼa̱ Ndióxi̱. Ta̱ Caín níʼira ña̱ʼa ña̱ chi̱ʼira taxira ndaʼa̱ Ndióxi̱. Ta ta̱ Abel níʼira iin ndikachi tí va̱ʼa sa̱na̱ra taxira ndaʼa̱ Ndióxi̱. Jehová kúsi̱í-inira xíʼin ta̱ Abel ta saátu xíʼin ndikachi sa̱na̱ ta̱yóʼo. Soo va̱ása kúsi̱í-inira xíʼin ta̱ Caín ni xíʼin ña̱ʼa ta̱yóʼo. ¿Á xíni̱ún ndachun kǒo kúsi̱í-inira?

Kǒo kúni̱ kachi ña̱yóʼo ña̱ʼa ta̱ Abel va̱ʼakaña nu̱ú ña̱ʼa ta̱ Caín. Saáchi ta̱ Abel iin ta̱a va̱ʼa xi̱kuu ta̱yóʼo ta xi̱kuni̱ra Jehová xíʼin ñanira. Soo ta̱ Caín su̱ví ta̱a va̱ʼa níxikura ta kǒo níxikuni̱ra ñanira. Xa̱ʼa ña̱yóʼo kǒo níxikuni̱ Jehová ña̱ʼa ta̱ Caín.

Ña̱kán ni̱ka̱ʼa̱n Jehová xíʼin ta̱ Caín ná nasamara miíra ná kǒo keʼékara ña̱ ndi̱va̱ʼa. Soo ta̱ Caín va̱ása níxiniso̱ʼora ña̱ ni̱ka̱ʼa̱n Ndióxi̱, ni̱sa̱a̱ra chi Jehová ni̱kusi̱íka-inira xínira ta̱ Abel. Ta̱ Caín ni̱ka̱ʼa̱nra xíʼin ta̱ Abel: “Ná ku̱ʼu̱nyó yuku̱”. Ta kán tá ñúʼu u̱vi̱ miína, ta̱ Caín ka̱nira ta̱ Abel ta ni̱xi̱ʼi̱ra. ¿Á ña̱ va̱ʼa kúú ña̱ ke̱ʼé ta̱ Caín túviún?

Ni ni̱xi̱ʼi̱ ta̱ Abel, Ndióxi̱ ñúʼu-inira xa̱ʼara. Saáchi ta̱ Abel iin ta̱a va̱ʼa xi̱kuura, Jehová va̱ása nándosó-inira xa̱ʼa na̱ kéʼé ña̱ va̱ʼa. Ña̱kán va̱xi iin ki̱vi̱ Jehová sandátakura ta̱ Abel. Tasaá ta̱ Abel va̱ása kuvikara, kutakura ndiʼi tiempo nu̱ú Ñuʼú yóʼo. ¿Á kútóún kuniún na̱ yiví táʼan ta̱ Abel na̱ kéʼé ña̱ va̱ʼa?

Soo Ndióxi̱ kǒo kúsi̱í-inira xíʼin na̱ yiví na̱ kéʼé ña̱ va̱ása va̱ʼa táʼan ña̱ xi̱keʼé ta̱ Caín. Tasaá tá xa̱ʼní ta̱ Caín ta̱ Abel, Ndióxi̱ ta̱vá xíkara ta̱ Caín nu̱ú na̱ veʼera. Tá ke̱e ta̱ Caín ku̱a̱ʼa̱nra koora inka xiyo, ku̱a̱ʼa̱n iin ñaʼá xíʼinra sana iin ñá ku̱ʼvara xi̱kuuñá, ta ñáyóʼo ti̱ndaʼa̱ xíʼinra.

Tá ni̱ya̱ʼa tiempo ta̱ Caín xíʼin ñá síʼíra ni̱xi̱yo se̱ʼena. Ta ni̱xi̱yoka se̱ʼe inkaka na̱ se̱ʼe ta̱ Adán. Tándi̱ʼi ndu̱ku̱a̱ʼá na̱ yiví nu̱ú Ñuʼú yóʼo. Ná sakuaʼayó xa̱ʼa savana.