Arco iris tí ka̱na nu̱ú

¿Á XÍNI̱ÚN ndáaña kúú ña̱ ke̱ʼé ta̱ Noé tá ki̱tara xíʼin na̱ veʼera ini tú arca? Ta̱ Noé ta̱xira iin ña̱ʼa ndaʼa̱ Ndióxi̱. Koto nu̱ú na̱ʼná ña̱ va̱xi ni̱nu̱ yóʼo. Ta̱ Noé ta̱xira kití ndaʼa̱ Ndióxi̱ xa̱ʼa ña̱ kúsi̱í-inira ña̱ sa̱káku Ndióxi̱ miíra xíʼin na̱ veʼera nu̱ú sa̱vi̱ kini.

¿Á ni̱kutóo Jehová ña̱ʼa ña̱ ta̱xi ta̱ Noé ndaʼa̱ra? Ni̱kutóovaraña. Xa̱ʼa ña̱kán ni̱ka̱ʼa̱n Jehová xíʼin ta̱ Noé ña̱ kǒo sandiʼi-xa̱ʼakara na̱ yiví xíʼin sa̱vi̱.

Kama ni̱yi̱chi̱ ndiʼi ti̱kui̱í nu̱ú Ñuʼú yóʼo. Ta̱ Noé xíʼin na̱ veʼera tá ke̱ena ini arca ki̱xaʼá tukuna íyona nu̱ú Ñuʼú yóʼo. Ndióxi̱ ni̱ka̱ʼa̱nra xíʼinna: ʼXíniñúʼu koo ku̱a̱ʼá se̱ʼendó tasaá sakútundó iníísaá nu̱ú Ñuʼú yóʼoʼ.

Tá ná kixaʼá na̱ yiví kuniso̱ʼona xa̱ʼa sa̱vi̱ kini, sana yi̱ʼvína á sana ndakani xi̱nína xa̱ʼa sa̱vi̱ kini ña̱ koon tukurá. Xa̱ʼa ña̱kán Ndióxi̱ ta̱xira iin ña̱ʼa ña̱ ndakaʼán na̱ yiví xa̱ʼa ña̱ ni̱ka̱ʼa̱nra ña̱ kǒo sakóonkara sa̱vi̱ kini. ¿Á xíni̱ún ndáaña ta̱xira ña̱ va̱ʼa ndakaʼánna xa̱ʼa ña̱yóʼo? Iin arco iris ta̱xira.

Sava yichi̱ kítarí chí ndiví tá xa̱ndíʼi kóon sa̱vi̱. Tíyóʼo ku̱a̱ʼá color kúúmiírí. ¿Á xa̱xíniún iinrí? Koto tí va̱xi nu̱ú na̱ʼná yóʼo.

Ña̱yóʼo kúú ña̱ ni̱ka̱ʼa̱n Ndióxi̱: ʼKáʼi̱n xíʼinndó ña̱ kǒo sandiʼi-xa̱ʼakai̱ na̱ yiví ni kití tí íyo nu̱ú Ñuʼú yóʼo xíʼin sa̱vi̱. Ña̱kán távái̱ arco iris chí ndiví. Tá ná kitarí ta yi̱ʼi̱ ndakaʼíi̱n xa̱ʼa ña̱ ni̱ka̱ʼi̱n xíʼinndóʼ.

Tasaá tá ná kuniún iinrí, ¿ndáaña xíniñúʼu ndakaʼún xa̱ʼa? Xíniñúʼu ndakaʼún xa̱ʼa ña̱ ni̱ka̱ʼa̱n Ndióxi̱ ña̱ kǒo sakóonkara sa̱vi̱ kini.