Ñá tindaʼa̱ xíʼin ta̱ Isaac

¿Á XÍNI̱ÚN ndáañá kúú ñá va̱xi nu̱ú na̱ʼná yóʼo? Rebeca naníñá. Ta̱ va̱xi yóʼo naníra Isaac. Ta ñáyóʼo kúú ñá tindaʼa̱ xíʼinra. Yóʼo kunda̱a̱-iniyó ndachun va̱ʼa tindaʼa̱ra xíʼinñá.

Ta̱ Abrahán kúni̱ra iin ñaʼá ñá va̱ʼa tindaʼa̱ xíʼin se̱ʼera ta̱ Isaac. Kǒo kúni̱ra tindaʼa̱ ta̱ Isaac se̱ʼera xíʼin ná si̱ʼí ná ñuu Canaán, saáchi náyóʼo va̱ása ndásakáʼnuná Jehová. Xa̱ʼa ña̱kán ni̱ka̱ʼa̱nra xíʼin ta̱ káchíñu nu̱úra: ʼKuaʼán nu̱ú na̱ veʼi̱ na̱ ndóo ñuu Harán ta kán ndukún iin ñá síʼí se̱ʼi̱, ta̱ Isaacʼ.

Ta̱ káchíñu nu̱ú ta̱ Abrahán ndi̱ku̱n nda̱kayara u̱xu̱ tí camello ta ki̱tara ku̱a̱ʼa̱nra. Tá xa̱si̱loʼo xa̱a̱ra nu̱ú ndóo na̱ táʼan ta̱ Abrahán, xi̱kundatura yu̱ʼu̱ pozo ti̱kui̱í. Tá xa̱ku̱a̱ʼa̱n kúú ñu̱ú saá kúú ña̱ xáʼa̱n ná si̱ʼí táváná ti̱kui̱í ini pozo. Xa̱ʼa ña̱kán kúú ña̱ ni̱ka̱ʼa̱n ta̱ káchíñu nu̱ú ta̱ Abrahán xíʼin Jehová ta káchira: ʼÑaʼá ñá taxi ti̱kui̱í koʼi̱ ta taxiñá ti̱kui̱í koʼo tí camello, ñáyóʼo kúú ñá ndaka̱xiún koo ñá síʼí ta̱ Isaacʼ.

Ta kama ki̱xa̱a̱ ñá Rebeca taváñá ti̱kui̱í. Ta ni̱ka̱ʼa̱n ta̱yóʼo xíʼinñá ña̱ ná taxiñá ti̱kui̱í koʼora, ta ñáyóʼo ta̱xiñá ti̱kui̱í ndaʼa̱ra. Ta ta̱vátuñá ti̱kui̱í xi̱ʼi ndiʼi tí camello chi yíchi̱-inirí. Ku̱a̱ʼání ti̱kui̱í ta̱váñá, chi tí camello yóʼo ku̱a̱ʼání ti̱kui̱í xíʼirí.

Tándi̱ʼi ta̱váñá ti̱kui̱í, ta̱ káchíñu nu̱ú ta̱ Abrahán ni̱nda̱ka̱tu̱ʼunrañá nda̱saa naní yiváñá, ta saátu ni̱nda̱ka̱tu̱ʼunrañá á kivi ndo̱ora ku̱su̱nra veʼena ñu̱ú saá. Ta ñáyóʼo nda̱kuiinñá: ʼBetuel naní yivái̱, ta kiviva ndo̱ún ku̱sún veʼendi̱ʼ. Ta̱ káchíñu nu̱ú ta̱ Abrahán xíni̱ra chi ta̱ Betuel kúú se̱ʼe ta̱ Nacor ñani ta̱ Abrahán. Ña̱kán xi̱kuxítíra ta ta̱xira tixaʼvi ndaʼa̱ Jehová, xa̱ʼa ña̱ xi̱niʼira yichi̱ nu̱úra ta va̱ʼa ni̱xa̱a̱ra veʼe na̱ táʼan ta̱ Abrahán.

Míí ñu̱ú saá ni̱ka̱ʼa̱nra xíʼin ta̱ Betuel ta saátu xíʼin ta̱ Labán ku̱ʼva ñá Rebeca, ña̱ kúni̱ra kiʼinra ñá Rebeca ña̱ va̱ʼa tindaʼa̱ñá xíʼin ta̱ Isaac. U̱vi̱ saána ni̱ka̱ʼa̱nna va̱ʼava tindaʼa̱ñá xíʼinra káchina. Ta, ¿ndáaña ni̱ka̱ʼa̱n ñá Rebeca tá ni̱nda̱ka̱tu̱ʼunnañá á kúni̱ñá tindaʼa̱ñá xíʼinra? Va̱ʼava káchiñá. Ña̱kán ndi̱ku̱n inka ki̱vi̱ saá nda̱ana sa̱tá tí camello ta nda̱kiʼinna yichi̱ ku̱a̱ʼa̱nna ñuu Canaán.

Tá ni̱xa̱a̱na xa̱ñu̱úva kúúña. Ñá Rebeca xi̱niñá xíka iin ta̱a yuku̱ kán. Ta ta̱ Isaacva kuura. Ta ni̱kusi̱íní-inira xi̱nirañá. Chi sa̱kán ni̱ya̱ʼa u̱ni̱ ku̱i̱ya̱ ni̱xi̱ʼi̱ siʼíra, ta kúsuchíní-inira xa̱ʼañá. Soo vitin kúni̱níra xínira ñá Rebeca, ta tuku ndu̱si̱í-inira.