Ta̱ José xítondosóra na̱ ñanira

TA̱ José kúni̱ra kunda̱a̱-inira xa̱ʼa 10 saá ñanira á na̱samana xíʼin ña̱ xi̱keʼéna. Ta káchira xíʼinna: ʼNdóʼó va̱xindó kotondó nda̱saa káa ñuu yóʼo á na̱ ndakú kúú na̱ ndóo nu̱úñaʼ.

Nda̱kuiinna ta káchina xíʼinra: ʼSu̱ví xa̱ʼa ña̱yóʼo va̱xindi̱, ta̱a va̱ʼava kúúndi̱ ta ñani ndiʼivandi̱, 12 xi̱kuundi̱ ta iinra ni̱xi̱ʼi̱va, ta ta̱ loʼo nu̱ú ndíʼindi̱ ni̱ndo̱ora xíʼin yivándi̱ veʼendi̱ʼ.

Ta̱ José míí ña̱ kúú kuitíra kúúña ña̱ kǒo kándíxara ña̱ káʼa̱nna. Ta chi̱ka̱a̱ra ta̱ Simeón veʼeka̱a, ta na̱ savaka ta̱xira ku̱a̱ʼa̱nna xíʼin ña̱ʼa veʼena ta káchira xíʼinna: ʼTá ná ndikóndó ná kixi ta̱ loʼo ñanindó xíʼinndóʼ.

Tá ndi̱kóna veʼena ña̱ ñuu Canaán na̱túʼunna xíʼin yivána, ta̱ Jacob, xa̱ʼa ndiʼi ña̱ ku̱u. Ni̱kusuchí-ini ta̱ Jacob ta káchira: ʼXa̱ni̱xi̱ʼi̱ ta̱ José ta vitin ni ta̱ Simeón kǒokara koo xíʼinyó. Kǒo taxii̱ ku̱ʼu̱n ta̱ loʼo se̱ʼi̱ xíʼinndóʼ. Soo tá ná ndiʼi ña̱ kuxuna, ta̱ Jacob xíniñúʼu taxira ta̱ Benjamín ku̱ʼu̱n xíʼinna ñuu Egipto ña̱ va̱ʼa ku̱ʼu̱nna xa̱ʼa ña̱ʼa kuxuna.

Ta̱ José xi̱nira va̱xi na̱ ñanira. Ni̱kusi̱íkaví-inira ña̱ xi̱nira ñanira ta̱ loʼo, ta̱ Benjamín. Soo na̱yóʼo kǒo xíni̱na ta̱ kúúmií chiñu káʼnu ñuu Egipto yóʼo kúú ta̱ José. Soo vitin íyo iin ña̱ kéʼé ta José ña̱ va̱ʼa kotondosóra 10 saá na̱ ñani ndáʼvira.

Ta̱ José ni̱ka̱ʼa̱nra xíʼin na̱ káchíñu nu̱úra ña̱ ná sakútuna ña̱ʼa costa na̱yóʼo. Soo na̱ ñani ta̱ José kǒo níxinina tá ta̱ánna ña̱ʼa costana. Ta ni̱ka̱ʼa̱nra xíʼinna ña̱ ná chika̱a̱na copara ña̱ plata ini costa ta̱ Benjamín. Tá xa̱xíka va̱ʼa ku̱a̱ʼa̱nna, saá chi̱ndaʼá ta̱ José na̱ káchíñu nu̱úra ku̱a̱ʼa̱nna sa̱tána, tá ni̱niʼína na̱yóʼo, káchina xíʼinna: ʼ¿Ndachun i̱xakuíʼnandó copa ta̱ káchíñundi̱ nu̱ún?ʼ

ʼKǒo copara ní íxakuíʼnandi̱ soo tá ná ndaniʼíndóña costandi̱, kaʼníndó ta̱ i̱xakuíʼnañaʼ, káchina xíʼinna.

Ta na̱ káchíñu nu̱ú ta̱ José ki̱xaʼána xítona ndiʼi costa na̱ ñani ndáʼvira, ta nda̱niʼína copa ini costa ta̱ Benjamín, táki̱ʼva xítoún nu̱ú na̱ʼná yóʼo. ʼTa na̱yóʼo káchina, ta̱ Benjamín kúú ta̱ ku̱ʼu̱n xíʼindi̱, ta ndóʼó kivi ku̱ʼu̱nndó ñuundóʼ. ¿Ndáaña keʼé na̱ ñani ndáʼvi ta̱ José vitin?

Ndiʼi na̱ ñani ta̱ Benjamín ndi̱kóna xíʼinra veʼe ta̱ José soo ta̱ José káchira xíʼin na̱yóʼo: ʼKivi ku̱ʼu̱nndó veʼendó soo ta̱ Benjamín yóʼo ndo̱ora kachíñura nu̱íi̱ʼ.

Ta vitin nda̱kuiin ta̱ Judá ta káchira: ʼTá ná ndikói̱ nu̱ú yivái̱ ta̱ kǒo ta̱ loʼo yóʼo ku̱ʼu̱n xíʼi̱n, kuviva yivái̱ chi kúni̱níra ta̱ loʼo yóʼo. Ta ndúkúi̱ ña̱ ma̱ní nu̱ún taxi ná ku̱ʼu̱n ta̱ loʼo yóʼo nu̱ú yivái̱ ta ná ndo̱o yi̱ʼi̱ kachíñui̱ nu̱únʼ.

Ta José vitin xi̱nira na̱ ñanira xa̱na̱samavana. Va̱ása íyokana táki̱ʼva ni̱xi̱yona tá ya̱chi̱ va̱ʼava inina vitin. Ná kotoyó ndáaña keʼé ta̱ José vitin.