ÑA̱ KÉʼÉYÓ NA̱ TESTIGO

Vií va̱ʼa ná ndaka̱xinyó ña̱ kotonde̱ʼéyó á ña̱ kusíkíyó

¿Nda̱chun xíniñúʼu vií va̱ʼa ndaka̱xinyó ña̱ kusíkíyó á ña̱ kotonde̱ʼéyó? Saáchi tá ndáka̱xinyó iin película, á iin yaa, á iin ña̱ va̱xi nu̱ú Internet, á iin libro á iin videojuego, ndáka̱xinyó ndáaña kúú ña̱ ke̱e xi̱níyó. Ña̱ ndáka̱xinyó kivi nasamaña ña̱ ndákanixi̱níyó á ña̱ kéʼéyó. Soo tiempo vitin, ku̱a̱ʼání ña̱yóʼo kúúmiíña ña̱ʼa ña̱ kǒo kútóo Jehová (Sl 11:5; Gál 5:19-21). Ña̱kán, ña̱ Biblia káʼa̱nña xíʼinyó ña̱ ná ndakanixi̱níyó xa̱ʼa̱ ña̱ʼa ña̱ ndásakáʼnu Jehová (Flp 4:8).

TÁNDI̱ʼI XI̱TONDÓ VIDEO ¿NDÁA ÑA̱ʼA KÚÚÑA KIVI KOTONDE̱ʼÉYÓ Á KUSÍKÍYÓ?, NDAKUIINNDÓ PREGUNTA YÓʼO:

¿Ndáa ki̱ʼva kítáʼan ña̱ xi̱kanitáʼan na̱ xi̱ndoo ñuu Roma xíʼin sava ña̱ sísikína á xítonde̱ʼéna tiempo vitin?
¿Nda̱saa kivi chindeétáʼan na̱ hermano xíʼin na̱ va̱lí ña̱ vií ndaka̱xinna ña̱ kotonde̱ʼéna á ña̱ kusíkína?
¿Nda̱saa chíndeétáʼan Romanos 12:9 xíʼinyó ña̱ va̱ʼa ndaka̱xinyó ña̱ kotonde̱ʼéyó á ña̱ kusíkíyó?
¿Ndáaña kivi keʼéyó ñuu nu̱ú íyoyó ta ná kooña ña̱ sákusi̱í-ini Jehová?

¿NDÁAÑA KIVI KEʼÉYÓ ÑA̱ VA̱ʼA KOO SI̱Í LOʼO INIYÓ?

Tiempo vitin, ku̱a̱ʼání kúú ña̱ʼa ña̱ kivi kotonde̱ʼéyó á kaʼviyó á kusíkíyó ta kǒo xíniñúʼu ku̱ʼu̱nvíyó inka lugar ña̱ keʼéyóña, chi ndóo kuitíyó xítovayóña, tá kúú película, á libro á programa ña̱ yáʼa nu̱ú tele. Ni kǒo ku̱a̱chi xa̱ʼa̱ ña̱ kundoo kuitíyó ña̱ keʼéyó ña̱yóʼo, soo íyo sava na̱ káʼa̱n ña̱ íyova sava ña̱ʼa keʼéyó ña̱ va̱ʼaníka chindeétáʼan xíʼinyó. Sava na̱ yiví kúsi̱í-inina tá sákaʼana iin instrumento á tá sánanana iin ña̱ʼa. Inkatuna kútóona keʼéna inka ña̱ʼa, tá kúú ña̱ kusíkína, ña̱ ku̱ʼu̱nna kuchina ini yu̱ta, á ña̱ tixáʼana. Ni nda̱a̱ ndáakaña ná ndaka̱xinyó keʼéyó, ndiʼi ña̱yóʼo ná kooña ña̱ ndásakáʼnu Ndióxi̱ (1Co 10:31).