¿Á sionista kúú na̱ testigo Jehová?

Va̱ása. Ndi̱ʼi̱ na̱ testigo Jehová cristiano kúúndi̱ ta ña̱ va̱xi nu̱ú Biblia kúú ña̱ kándíxandi̱. Sava na̱ religión kándíxana ña̱ sava profecía ña̱ va̱xi nu̱ú Biblia káʼa̱nña ña̱ xíniñúʼu ndakutáʼan ndiʼi na̱ judío chí Palestina, soo ndi̱ʼi̱ na̱ testigo Jehová kǒo kándíxandi̱ ña̱yóʼo. Kǒo kándíxandi̱ ña̱ va̱xi iin profecía nu̱ú Biblia ña̱ káʼa̱n ña̱ xíniñúʼu keʼé na̱ político yóʼo saá. Saátu ña̱ Biblia va̱ása chíndeétáʼanña xíʼin nda̱a̱ ni iin gobierno na̱ íyo ñuyǐví yóʼo ta ni xíʼin inkaka cultura ña̱ kaʼndachíñuna. Ña̱ La Atalaya ña̱ tává na̱ testigo Jehová káxiní káʼa̱nña, ña̱ “va̱ása chíndeétáʼan ña̱ Biblia xíʼin na̱ sionismo político”.

Ña̱ Encyclopædia Britannica káʼa̱nña, na̱ sionismo kúúna iin tiʼvi na̱ yiví na̱ kúú judío na̱ kúni̱ kaʼndachíñu chí Palestina. Ta na̱yóʼo kítáʼanna xíʼin na̱ veʼe-ñu̱ʼu ta saátu xíʼin na̱ político. Ndi̱ʼi̱ na̱ testigo Jehová kǒo chíndeétáʼanndi̱ xíʼin ña̱ kándíxa na̱ sionismo ti̱xin veʼe-ñu̱ʼuna ta saátu kǒo kéʼéndi̱ ña̱ kéʼé na̱ político na̱ kítáʼan xíʼin na̱yóʼo.

Ndiʼi na̱ testigo Jehová iinlá Ndióxi̱ ndásakáʼnundi̱, ta kǒo chíndeétáʼanndi̱ xíʼin ña̱ kéʼé na̱ político ta ni xíʼin ña̱ kéʼé na̱ sionismo. Ta ndiʼina xíni̱ ña̱ va̱ása kíʼvindi̱ xíʼin ña̱ política, ta xa̱ʼa̱ ña̱yóʼo ndeéní íxandi̱va̱ʼana xíʼinndi̱ sava país. Ta kúnda̱a̱ káxi inindi̱ nda̱a̱ ni iin na̱ gobierno á inkakana kǒo kivi chindeétáʼan xíʼin na̱ yiví ña̱ vií kundoona ñuyǐví yóʼo. Chi iinlá Reino Ndióxi̱ kúú ña̱ kivi keʼé ña̱yóʼo.

Iin ña̱ kéʼé ndiʼi na̱ testigo Jehová ni nda̱a̱ ndáaka ñuu nu̱ú ndóona kúú ña̱ xíniso̱ʼona ña̱ káʼa̱n na̱ gobierno. Ndiʼivandi̱ xíniso̱ʼo ña̱ káʼa̱n na̱ chíñu ta saátu va̱ása xáʼa̱nndi̱ nu̱ú ku̱a̱chi.