Yáa̱ tí mícho

Ndiʼina xíni̱ ndiʼi tiempo tíʼvindaarí miírí á ndáya̱kúnrí miírí ta ku̱a̱ʼání tiempo kéʼérí ña̱yóʼo. Va̱ʼaní ndáya̱kún tí mícho miírí xa̱ʼa̱ ña̱ va̱ʼaní íyo yáa̱rí.

Ndakanixi̱ní xa̱ʼa̱ ña̱yóʼo: Yáa̱ tí mícho kúúmiíña 290 ña̱ naní papilas, ña̱yóʼo íyoña nda̱a̱ táki̱ʼva íyo iñú válí ña̱ xíto chí sa̱tá ta téʼéña nda̱a̱ táki̱ʼva íyo chíinyó. Ta ña̱yóʼo íyo yaví ti̱xinña ña̱kán kamaní ndákiʼinña tásií tá chíka̱a̱ tí mícho yáa̱rí yuʼúrí. Tá ndáya̱kún tí mícho miírí, iñú válí ña̱ íyo nu̱ú yáarí kíʼvina tañu yixírí tasaá kíndo̱o tásiírí sa̱tá ñii̱rí.

Ndiʼi ki̱vi̱ kivi kindo̱o 48 mililitro (1,6 onzas) tásií tí mícho sa̱tá yixírí ta saátu ñii̱rí. Tásiírí yóʼo kúúmiíña ña̱ nani enzimas ña̱ sándiʼi-xa̱ʼa̱ ña̱ yaku̱a̱, ta tá siírí loʼo tá loʼo yíchi̱rá, ta chíndeétáʼanrá xíʼinrí ña̱ va̱ása niʼníní kunirí chi sándi̱korá ñii̱rí saáchi va̱ása kána tá ti̱inrí.

Tá iñú yóʼo ndáni̱ʼíña nu̱ú ku̱ta̱ka yixírí kúnúka kíʼviña tañu yixírí ta ña̱yóʼo chíndeétáʼanña xíʼinrí ña̱ va̱ʼa ndataniña. Ña̱yóʼo chíndeétáʼanña xíʼin ñii̱rí ña̱ viíka kooña. Na̱ ná ndukú va̱ʼa xa̱ʼa̱ ña̱yóʼo xi̱tondaana yáa̱ tí mícho tasaá ke̱ʼéna iin cepillo. Ta tú cepillo yóʼo vitáka chúʼunnú xi̱nína nu̱ú inkaka cepillo, ta va̱ása yo̱ʼvi̱ ndakatana cepillo yóʼo ta vií ndákaninú nu̱ú ku̱ta̱ka yixí. Na̱ científico ndákanixi̱nína ña̱ ki̱ʼva íyo yáa̱ tí mícho kivi chindeétáʼanña xíʼinna ña̱ viíka sakúaʼana ndaya̱kúna nu̱ú íyo yixí á nu̱ú ku̱ta̱kaña. Ta kivi viíka chindeétáʼanña xíʼinna ña̱ chika̱a̱na crema á ta̱tán ñii̱ iin na̱ yiví na̱ kúúmiíní yixí.

¿Ndáaña ndákanixi̱níún xa̱ʼa̱ ña̱yóʼo? Yáa̱ tí mícho, ¿á íyo iin na̱ i̱xava̱ʼaña á ña̱ na̱ kuva̱ʼa miíva kúúña?