Escuela ña̱ Galaad chíndeétáʼanña xíʼin ndiʼiyó

Ndiʼi ku̱i̱ya̱ ku̱a̱ʼání na̱ hermano na̱ káchíñu ndiʼi tiempo na̱ íyo iníísaá ñuyǐví xáʼa̱nna Escuela Bíblica ña̱ Galaad ña̱ Watchtower, ta ña̱yóʼo xíyoña ti̱xin Centro Educativo ña̱ Watchtower chí Patterson (Nueva York).a Na̱ xáʼa̱n escuela yóʼo sákuaʼana ña̱ viíka keʼéna chiñu ti̱xin ñuu Ndióxi̱. Ña̱ sákuaʼana yóʼo chíndeétáʼanna xíʼin na̱ congregación ña̱ vií koona ta saátu xíʼin sucursal ña̱ íyo iníísaá ñuyǐví.

Ndiʼi na̱ hermano na̱ íyo iníísaá ñuyǐví kivi ku̱ʼu̱nna Escuela ña̱ Galaad. Tá kúú, clase ña̱ 147 ña̱ ke̱ʼéna ku̱i̱ya̱ 2019 ni̱xa̱ʼa̱n 56 na̱ hermano na̱ íyo 29 país. Na̱ xáʼa̱n escuela yóʼo xa̱a̱ ku̱a̱ʼá tiempo káchíñuna nu̱ú Jehová tá kúú na̱ betelita, na̱ misionero, precursor especial á na̱ superintendente ña̱ circuito.

Tá kúma̱níka koo ña̱ escuela yóʼo xíniñúʼu ixatu̱ʼvana ku̱a̱ʼá ña̱ʼa ña̱ va̱ʼa kuʼun na̱ hermano. Tá kúú Departamento ña̱ Viaje ña̱ íyo chí Central Mundial xa̱a̱ ya̱chi̱ka sátana boleto ña̱ avión ña̱ va̱ʼa ku̱ʼu̱n na̱ hermano escuela yóʼo. Tá ni̱xi̱yo clase ña̱ 147 ña̱ va̱ʼa ku̱ʼu̱nna Patterson ta ndikóna, ki̱ʼva 1,075 dólar xi̱niñúʼu iin iinna. Na̱ hermano na̱ kee chí islas Salomón ku̱mi̱ avión ki̱ʼinna ña̱ va̱ʼa xa̱a̱na chí Patterson ta u̱ni̱ tú yóʼo ki̱ʼinna ña̱ va̱ʼa ndikóna ñuuna. Ta yáʼaka 35,400 kilómetro (22,000 millas) ni̱xa̱ʼa̱nna ta ndi̱kóna. Ta boleto yóʼo ka̱naña 2,300 dólar ña̱ iin tá iinna. Ña̱ va̱ʼa va̱ása ku̱a̱ʼá xu̱ʼún kuniñúʼuna, Departamento ña̱ Viaje xíniñúʼuna iin programa ña̱ va̱ʼa ndani̱ʼína boleto ña̱ va̱ása yaʼvi. Ni xa̱a̱ sa̱sina boleto, ña̱ programa kán nándukúkaña ña̱ núu loʼoka yaʼvi nda̱a̱ semana á nda̱a̱ yo̱o̱ nándukúña boleto. Na̱ Departamento ña̱ Viaje xíniñúʼuna crédito ña̱ aerolínea á milla ña̱ táxi na̱ ku̱a̱ʼání yichi̱ xíka xíʼin tú avión ña̱ va̱ʼa satána boleto.

Ku̱a̱ʼání na̱ xáʼa̱n escuela yóʼo xíniñúʼuna visa ña̱ va̱ʼa ki̱ʼvina Estados Unidos. Na̱ Departamento na̱ kíʼin kuenta xíʼin ña̱ Asunto Legal na̱ íyo chí Central Mundial chíndeétáʼanna xíʼinna ña̱ va̱ʼa kuumiína visa na̱ estudiante. Ña̱ va̱ʼa tavána ña̱yóʼo xíniñúʼuna ki̱ʼva 510 dólar xíʼin iin iin na̱ hermano.

¿Ndáa ki̱ʼva chíndeétáʼan ña̱ sákuaʼa na̱ hermano yóʼo xíʼinyó? Ta̱ Hendra Gunawan ta̱ kúú anciano ti̱xin iin congregación chí Sureste ña̱ Asia, ta ti̱xin congregación kán ndíka̱a̱ iin matrimonio na̱ ni̱xa̱ʼa̱n Escuela ña̱ Galaad. Ta̱yóʼo káchira: “Tá ya̱chi̱ kǒo nda̱a̱ ni na̱ precursor regular níxi̱yo ti̱xin congregación yóʼo. Soo tá ki̱xaa̱ na̱ matrimonio yóʼo chi̱ka̱a̱nína ndee̱ xíʼin na̱ hermano, ta sava na̱yóʼo ndu̱una precursor. Ta tá ni̱ya̱ʼa loʼo tiempo iin ñá hermana ñá ndíka̱a̱ ti̱xin congregación yóʼo ni̱xa̱ʼa̱nñá Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱”.

Ta̱ Sergio Panjaitan ta̱ káchíñu xíʼin sava na̱ hermano na̱ ni̱xa̱ʼa̱n Escuela ña̱ Galaad ti̱xin sucursal ña̱ íyo chí Sureste ña̱ Asia, káchira: “Ña̱ sa̱kuaʼa na̱ hermano yóʼo iin bendición kúúña ta saátu chíndeétáʼanña xíʼinndi̱. Ku̱a̱ʼání ña̱ʼa sa̱kuaʼana, soo nu̱úka ña̱ ni̱nu kunina nu̱ú inkana, na̱yóʼo sánáʼa̱na inkana xa̱ʼa̱ ña̱ sa̱kuaʼana, ña̱yóʼo chíka̱a̱ña ndee̱ xíʼinndi̱ ta saátu ndi̱ʼi̱ chíka̱a̱ndi̱ ndee̱ xíʼin inkana”.

¿Míí kíʼinna xu̱ʼún ña̱ xíniñúʼuna tá xíyo escuela yóʼo? Xíniñúʼuna donación ña̱ táxina ti̱xin obra mundial. Ta ku̱a̱ʼání ña̱yóʼo táxinaña xa̱a̱ síín síín ki̱ʼva tá kúú ña̱ ndániʼiyó nu̱ú donate.jw.org. Tíxa̱ʼviníndó xa̱ʼa̱ ña̱ va̱ʼaní-inindó xa̱ʼa̱ ña̱ donación ña̱ táxindó tasaá kúú ña̱ kivi keʼéna escuela nu̱ú kivi ku̱ʼu̱n ku̱a̱ʼání na̱ hermano.