3 Ixato̱ʼó táʼanndó

¿NDÁAÑA KÚNI̱ KACHI ÑA̱YÓʼO?

Na̱ xa̱a̱ ti̱ndaʼa̱ na̱ íxato̱ʼó táʼan ndíʼi̱-inina xa̱ʼa̱ táʼanna, ni tá va̱ása inkáchi íyo ña̱ ndákanixi̱nína. Libro ña̱ nani Diez claves para transformar tu matrimonio káchiña: “Na̱ xa̱a̱ ti̱ndaʼa̱ va̱ása sándakoona ña̱ ka̱ʼa̱n xíʼin táʼanna ni tá kúúmiína iin ku̱a̱chi. Chi ña̱ kéʼéna kúú ña̱ chíka̱a̱na ndee̱ ña̱ ndasaviína ku̱a̱chi ña̱ kúúmiína. Xíʼin ña̱ to̱ʼó xíniso̱ʼona ña̱ káʼa̱n na̱ ti̱ndaʼa̱ xíʼinna tasaá vií kíndo̱ona ndáaña keʼé u̱vi̱ saána”.

TEXTO ÑA̱ VA̱XI NU̱Ú BIBLIA: “Na̱ kúʼvi̱-ini xíni inkana va̱ása [...] ndíʼi̱-inina xa̱ʼa̱ mií kuitína” (1 Corintios 13:4, 5).

“Ña̱ ixato̱ʼíi̱ ñá síʼíi̱ kúni̱ kachiña, ña̱ kundayáʼviñá nu̱úi̱ ta kǒo keʼíi̱ nda̱a̱ ni iin ña̱ʼa ña̱ saxóʼvi̱ñá á ña̱ sandíʼi-xa̱ʼa̱ ña̱ ti̱ndaʼa̱ndi̱” (ta̱ Micah).

¿NDA̱CHUN NDÁYÁʼVINÍ ÑA̱YÓʼO?

Tá na̱ xa̱a̱ ti̱ndaʼa̱ kǒo íxato̱ʼó táʼanna, tá nátúʼunna kivi ka̱ʼa̱n kúáchina xa̱ʼa̱ táʼanna á ka̱ʼa̱n ndaana xa̱ʼa̱ táʼanna ta ña̱yóʼo saxo̱ʼvi̱ña miína. Na̱ xíni̱ va̱ʼa káʼa̱nna, ña̱yóʼo náʼa̱ña ña̱ kivi xa̱a̱ na̱ ti̱ndaʼa̱ sandákootáʼanna.

“Tá va̱ása vií íyo ña̱ káʼa̱nyó xíʼin ñá síʼiyó, á káʼa̱n ndaayó xa̱ʼa̱ñá á kúsi̱kindaayóñá ña̱yóʼo kivi sandákavaña-iniñá ta va̱ása kuni̱kañá kandíxañá miíyó” (ta̱ Brian).

¿NDÁAÑA KIVI KEʼÚN?

NDAKANIXI̱NÍ XA̱ʼA̱ ÑA̱YÓʼO

Ndakanixi̱ní ndáa ki̱ʼva ni̱xi̱yo ña̱ na̱túʼún xíʼin na̱ ti̱ndaʼa̱ xíʼún semana ni̱ya̱ʼa, tándi̱ʼi ndakuiin pregunta ña̱ va̱xi yóʼo:

• ¿Nda̱saa yichi̱ ni̱ka̱ʼún ña̱ va̱ása va̱ʼa íyo ña̱ kéʼé na̱ ti̱ndaʼa̱ xíʼún, ta nda̱saa yichi̱ ni̱ka̱ʼún ña̱ va̱ʼa íyo ña̱ kéʼéna?

• ¿Ndáa ki̱ʼva ni̱na̱ʼún ña̱ íxato̱ʼún na̱ ti̱ndaʼa̱ xíʼún?

NATÚʼUN TÁʼANNDÓ XA̱ʼA̱ ÑA̱YÓʼO

• ¿Ndáa tu̱ʼun á ndáaña kéʼéyó náʼa̱ ña̱ íxato̱ʼó táʼanyó?

• ¿Ndáa tu̱ʼun á ndáaña kéʼéyó náʼa̱ ña̱ va̱ása íxato̱ʼó táʼanyó?

ÑA̱ KIVI KEʼÚN

• Iin tá iinndó kivi kaʼyíndó u̱ni̱ ña̱ʼa, ña̱ kúni̱ndó ña̱ ná na̱ʼa̱ na̱ ti̱ndaʼa̱ xíʼinndó ña̱ íxato̱ʼóna ndóʼó. Taxindó ña̱ ka̱ʼyíndó yóʼo ndaʼa̱ na̱ ti̱ndaʼa̱ xíʼinndó ta chika̱a̱ndó ndee̱ ña̱ saxínundó ña̱ kúni̱ na̱ ti̱ndaʼa̱ xíʼinndó.

• Keʼéndó iin lista xa̱ʼa̱ ña̱ va̱ʼa ña̱ kúúmií na̱ ti̱ndaʼa̱ xíʼinndó ta ka̱ʼa̱nndó xíʼinna ña̱ ndáyáʼviní ña̱yóʼo nu̱úndó.

“Ña̱ ixato̱ʼíi̱ yiíi̱ kúni̱ kachiña ña̱ na̱ʼi̱ xíʼin ña̱ kéʼíi̱ ña̱ ndáyáʼvira nu̱úi̱ ta kúni̱i̱ ña̱ si̱í ná koora. Va̱ása xíniñúʼuví keʼéyó ña̱ʼa ña̱ ndáyáʼviní ña̱ va̱ʼa na̱ʼa̱yó ña̱ íxato̱ʼóyó na̱ ti̱ndaʼa̱ xíʼinyó, chi xíʼin ña̱ kéʼéyó kivi na̱ʼa̱yó ña̱yóʼo” (ñá Megan).

Su̱ví ña̱ ndáyáʼvika kúú ña̱ ndakanixi̱níún ña̱ íxato̱ʼún na̱ ti̱ndaʼa̱ xíʼún, chi ña̱ ndáyáʼvika kúú ña̱ ndakuni mií na̱kán ña̱ ndixa íxato̱ʼúnna.

TEXTO ÑA̱ VA̱XI NU̱Ú BIBLIA: “Kundáʼvi-inindó kunindó inkana, va̱ʼa koo inindó, va̱ása ni̱nu kunindó, vitá koo inindó ta kúee koo inindó” (Colosenses 3:12).