Ña̱ kandíxaún na̱ yiváún íyoña nda̱a̱ táki̱ʼva íyo ña̱ ndachaʼviún xu̱ʼún ña̱ níkáún nu̱ú iin banco, tá kamaka ná saxínún ña̱ ki̱ndoún keʼún va̱ʼaka kandíxa na̱ yiváún yóʼó, ta taxikana keʼún ku̱a̱ʼá ña̱ʼa.
ÑA̱ KIVI CHINDEÉTÁʼAN XÍʼIN NA̱ VA̱LÍ KÚA̱AN
10 Ña̱ va̱ʼa kundaa-inina yóʼó
¿NDÁAÑA KÚNI̱ KACHI ÑA̱YÓʼO?
Na̱ yiví na̱ íxato̱ʼó ña̱ káʼa̱nna xíʼinna, sáxi̱nuna ña̱ ki̱ndoona keʼéna ta ndiʼi tiempo káʼa̱nna ña̱ nda̱a̱, na̱ yivána, na̱ migona xíʼin na̱ káchíñuna nu̱ú kivi kundaa-inina na̱yóʼo.
¿NDA̱CHUN NDÁYÁʼVINÍ ÑA̱YÓʼO?
Ña̱ va̱ʼa taxina ña̱ keʼún ña̱ kúni̱ún, xíniñúʼu na̱ʼún ña̱ kivi kundaa-inina yóʼó.
“Ña̱ va̱ʼa kandíxa na̱ yiváún yóʼó xíniñúʼu na̱ʼún ña̱ xu̱xa-iniún, ta saxínún ña̱ ki̱ndoún keʼún ta va̱ása keʼé kuitíún ña̱yóʼo tá íyoún xíʼinna” (ñá Sarahi).
TEXTO ÑA̱ VA̱XI NU̱Ú BIBLIA: “Na̱ʼa̱kandó xíʼin ña̱ kéʼéndó ndáa na̱ yiví kúúndó” (2 Corintios 13:5).
¿NDÁAÑA KIVI KEʼÚN?
Consejo ña̱ va̱xi yóʼo, chindeétáʼanña xíʼún ña̱ va̱ʼa kandíxaka na̱ yiváún yóʼó.
Ka̱ʼa̱n ña̱ nda̱a̱. Saáchi tá ná ka̱ʼún ña̱ vatá, na̱ yiví va̱ása kandíxakana yóʼó. Soo tá ke̱ʼún iin ña̱ va̱ása va̱ʼa ta káʼún ña̱ nda̱a̱ ta va̱ása sándaʼviún, na̱ yiví va̱ʼaka kandíxana yóʼó.
“Tá ña̱ va̱ʼa miíún kúúña, va̱ása íxayo̱ʼvi̱ña xíʼún ña̱ ka̱ʼún ña̱ nda̱a̱, soo tá ná ka̱ʼún ña̱ nda̱a̱ xa̱ʼa̱ iin ña̱ va̱ása va̱ʼa ke̱ʼún, na̱ yiví kivi kandíxakana yóʼó” (ñá Caiman).
TEXTO ÑA̱ VA̱XI NU̱Ú BIBLIA: “Kúni̱ndi̱ ña̱ viíní keʼéndi̱ ndiʼi ña̱ʼa” (Hebreos 13:18).
Saxínu ña̱ ki̱ndoún keʼún. Ña̱ ni̱ka̱ʼa̱n ku̱a̱ʼání na̱ káchíñu ti̱xin recursos humanos chí Estados Unidos náʼa̱ña, ña̱ iin ña̱ ndáyáʼviní xíniñúʼu keʼé iin na̱ yiví ña̱ va̱ʼa taxina iin chiñu ndaʼa̱na kúú ña̱ saxínuna ña̱ ki̱ndoona keʼéna. Tá ná sakuaʼún saxínún ña̱ ki̱ndoún keʼún, ña̱yóʼo chindeétáʼanña xíʼún tá ná kuchéún.
“Tá kéʼíi̱ iin ña̱ʼa soo va̱ása xíniñúʼu ku̱a̱ʼání yichi̱ ka̱ʼa̱nna xíʼi̱n ña̱ keʼíi̱ña, na̱ yivái̱ kíʼinna kuenta xíʼin ña̱yóʼo. Tá kamaka sáxi̱nui̱ ña̱ ki̱ndoi̱ keʼíi̱, va̱ʼaníka kándíxana yi̱ʼi̱” (ñá Sarah).
TEXTO ÑA̱ VA̱XI NU̱Ú BIBLIA: “Kúnda̱a̱-inii̱ ña̱ keʼún ndiʼi ña̱ káʼi̱n xíʼún [...] kúnda̱a̱va-inii̱ ña̱ ku̱a̱ʼákava ña̱ keʼún” (Filemón 21, nota).
Kúee koo iniún. Kamava kíʼinyó kuenta tá nása̱ma ki̱ʼva ña̱ náʼa̱ iin na̱ yiví, soo íxayo̱ʼvi̱vaña xíʼinyó ña̱ kunda̱a̱-iniyó á xa̱a̱ xu̱xa-inina.
“Ku̱a̱ʼáva tiempo xíniñúʼu ya̱ʼa ña̱ va̱ʼa kandíxa na̱ yiváún yóʼó á inka na̱ yiví, soo tá ndiʼi tiempo sáxi̱nún ña̱ ki̱ndoún keʼún va̱ʼaníka kandíxana yóʼó” (ta̱ Brandon).
TEXTO ÑA̱ VA̱XI NU̱Ú BIBLIA: “Kúee koo inindó” (Colosenses 3:12).