Ndióxi̱ ki̱xaʼára i̱xava̱ʼara ña̱ʼa

NDIʼI ña̱ va̱ʼa ña̱ íyo nu̱úyó ndióxi̱ ta̱xiña. ta̱kán i̱xava̱ʼa ñu̱ʼu á ña̱ Ka̱ndii ña̱ va̱ʼa sándáye̱ʼe̱ña nu̱úyó, i̱xava̱ʼara Yo̱o̱ xíʼin ki̱mi ña̱ va̱ʼa sándáye̱ʼe̱ña nu̱úyó ñu̱ú. I̱xava̱ʼara Ñuʼú ña̱ va̱ʼa kundooyó nu̱úña.

Soo Ñu̱ʼu á ña̱ Ka̱ndii, Yo̱o̱, ki̱mi xíʼin ñuʼú, su̱ví ña̱yóʼo kúú ña̱ siʼna níkeʼé Ndióxi̱. ¿Á xíni̱ún ndáaña kúú ña̱ siʼna i̱xava̱ʼara? Siʼna na̱ ángel i̱xava̱ʼara, na̱yóʼo va̱ása kívi kuniyóna. Ta na̱yóʼo kúú na̱ i̱xava̱ʼa Ndióxi̱ ña̱ kundoona xíʼinra chí ndiví.

Ta̱ ángel ta̱ siʼna i̱xava̱ʼa ndióxi̱ kúú se̱ʼe nu̱úra ta ma̱nírara, ta̱ ángel yóʼo chi̱ndeé táʼanra xíʼin yivára ña̱ i̱xava̱ʼara ndiʼi ña̱ʼa. Ta saátu ña̱ i̱xava̱ʼara Ñu̱ʼu á ña̱ Ka̱ndii, Yo̱o̱, ki̱mi xíʼin Ñuʼú nu̱ú ndóoyó.

¿Ndáa ki̱ʼva ni̱xi̱yo Ñuʼú yóʼo tá ya̱chi̱? Tá xa̱ʼa ni iin na̱ yiví kǒo níkivi kundoo nu̱úña. Chi nina ti̱kui̱í xi̱ndika̱a̱ iníísaá nu̱úña. Soo Ndióxi̱ xi̱kuni̱ra kundoo na̱ yiví nu̱úña. Tasaá ki̱xaʼára nda̱saviíraña ña̱ va̱ʼa kundooyó nu̱úña. ¿Ndáaña ke̱ʼéra?

Ndióxi̱ xi̱nira ña̱ kúma̱ní ndaye̱ʼe̱ nu̱ú ñuʼú yóʼo, ña̱kán sa̱ndáye̱ʼe̱ra Ñu̱ʼu á ña̱ Ka̱ndii nu̱úña, tasaá va̱ʼa koo káʼñu xíʼin ñu̱ú. Tándi̱ʼi sa̱nu̱úra ti̱kui̱í ta na̱kutu̱vi nu̱ú ñuʼú.

Tá ya̱chi̱ ni iin ña̱ʼa kǒo níxi̱yo nu̱úña, tá káa na̱ʼná ña̱ va̱xi yóʼo saá ni̱xi̱yoña. Va̱ása níxi̱yo yita ni yitu̱n ni kití nu̱úña. Ni ti̱a̱ká kǒo níxiñuʼu ini ti̱kui̱í. Ku̱a̱ʼá chiñu ke̱ʼé Ndióxi̱ ña̱kán va̱ʼa kundoo na̱ yiví xíʼin kití nu̱ú Ñuʼú yóʼo.