Ku̱a̱ʼá xi̱kuu se̱ʼe ta̱ Jacob

KOTO nu̱ú na̱ʼná, yóʼo va̱xi 12 saá se̱ʼe ta̱ Jacob. Ni̱xi̱yotu ná si̱ʼí se̱ʼevara. ¿Á xíni̱ún ki̱vi̱ sava na̱yóʼo? Vitin sakuaʼayó ki̱vi̱ savana.

Ta̱ Rubén, ta̱ Simeón, ta̱ Leví xíʼin ta̱ Judá se̱ʼe ñá Lea xi̱kuu na̱yóʼo. Soo ñá Raquel kǒo níkivi koo se̱ʼeñá, xa̱ʼa ña̱yóʼo ni̱kusuchí-iniñá. Ña̱kán ta̱xiñá ñá Bilha ñá káchíñu nu̱úñá ndaʼa̱ ta̱ Jacob, ta ñáyóʼo ka̱ku u̱vi̱ se̱ʼeñá xíʼinra, iinra xi̱naní Dan ta inkara xi̱naní Neftalí. Ta saátu ñá Lea ta̱xiñá ñá Zilpa ñá káchíñu nu̱úñá ndaʼa̱ ta̱ Jacob, ta ka̱kutu se̱ʼe ñáyóʼova xíʼinra, iinra xi̱naní Gad ta inkara xi̱naní Aser. Tándi̱ʼi, ñá Lea ka̱kuka inka u̱vi̱ se̱ʼeñá, iinra xi̱naní Isacar ta inkara xi̱naní Zabulón.

Nda̱a̱ vitinví ka̱ku se̱ʼe ñá Raquel, ta chi̱núuñá ki̱vi̱ra ña̱ kunaníra José. Chí nu̱ú loʼoka sakuaʼayó xa̱ʼa ta̱ José chi ta̱yóʼo ni̱xa̱a̱ra ku̱ura iin ta̱ káʼnu nu̱ú ndiʼina. Na̱ 11 yóʼo kúú na̱ ka̱ku tá ni̱xi̱yo ta̱ Jacob veʼe ta̱ Labán yivá ñá Raquel.

Tu̱ʼun Ndióxi̱ káʼa̱nña ña̱ ni̱xi̱yotu ná si̱ʼí se̱ʼevara, ta káʼa̱nña xa̱ʼa iin ñá xi̱naní Dina.

Ki̱xa̱a̱ tiempo ña̱ nda̱kanixi̱ní ta̱ Jacob ña̱ sandákoora ta̱ Labán ta ndikóra ñuu Canaán. Ña̱kán sa̱ndátakara na̱ veʼera ta nda̱kayara kití sa̱na̱ra ta ke̱era ku̱a̱ʼa̱nra.

Tá xa̱ku̱a̱ʼa̱nna yichi̱ ña̱ chí ñuu Canaán, kán ka̱ku inka se̱ʼe ñá Raquel, soo ña̱yóʼo kǒo níxiinña kaku va̱ʼaña tasaá ni̱xi̱ʼi̱vañá. Soo ta̱ loʼo yóʼo kǒo ña̱ níndoʼora chi ka̱ku va̱ʼavara, ta yivára chi̱núura ki̱vi̱ra ña̱ kunaníra Benjamín.

Ná ndakaʼányó xa̱ʼa 12 saá se̱ʼe ta̱ Jacob chi ti̱xin na̱yóʼo ki̱xi na̱ ñuu Israel. Saáchi 12 saá ñuu ña̱ íyo ti̱xin ñuu Israel níʼiña ki̱vi̱ u̱xu̱ se̱ʼe ta̱ Jacob ta u̱vi̱ña níʼi u̱vi̱ ki̱vi̱ se̱ʼe ta̱ José. Ta̱ Isaac ku̱a̱ʼání ku̱i̱ya̱ xi̱takura, ña̱kán va̱ʼa xi̱nira ka̱ku ndiʼi na̱ va̱lí yóʼo, ta̱ sana ni̱kusi̱íní-inira xa̱ʼa ña̱ ni̱xi̱yo ku̱a̱ʼá se̱ʼeñánira. Ná kotoyó ndáaña ndo̱ʼo iin ñá se̱ʼeñánira ñá xi̱naní Dina.