Ta̱ Jesús ma̱níra na̱ va̱lí

KOTO ta̱ Jesús númira iin ta̱ loʼo. Ndíʼi̱-inira xa̱ʼa na̱ va̱lí. Na̱ xíto ña̱ númira ta̱ loʼo yóʼo kúú na̱ apóstolra. ¿Á xíni̱ún ndáaña káʼa̱nra xíʼinna?

Ta̱ Jesús xíʼin na̱ apóstol káni̱ní ni̱xa̱ʼa̱nna ta sa̱kán ndi̱kóna ki̱xa̱a̱na. Na̱ apóstol tá va̱xina yichi̱ na̱ ni̱na̱ʼá táʼanva kúúna. Xa̱ʼa ña̱yóʼo, ta̱ Jesús ni̱nda̱ka̱tu̱ʼunrana: ʼ¿Ndáa ña̱ʼa kúúña ni̱na̱ʼá táʼanndó xa̱ʼa tá va̱xindó yichi̱?ʼ Soo xa̱xíni̱vara ndáa xa̱ʼa kúúña, ta ni̱nda̱ka̱tu̱ʼunrana á ka̱ʼa̱nna xa̱ʼaña xíʼinra.

Na̱yóʼo kǒo káʼa̱nna xa̱ʼaña xíʼinra, chi tá va̱xina yichi̱ ni̱na̱ʼá táʼanna ndáana kúú na̱ káʼnu va̱ʼaka nu̱ú táʼanna. Savana kúni̱na káʼnuka koona nu̱ú inkana. ¿Ndáaña ka̱ʼa̱n ta̱ Jesús xíʼinna vitin chi su̱ví ña̱ va̱ʼa kúú ña̱ kutóona ña̱ káʼnuka koona nu̱ú inkana?

Ta̱ Jesús ka̱nara iin ta̱ loʼo, ta̱ ka̱nindichira ta̱yóʼo nu̱ú ndiʼi na̱ apóstol. Tasaá ni̱ka̱ʼa̱nra xíʼinna: ʼKúni̱i̱ ná kunda̱a̱-inindó ña̱yóʼo: Tá kǒo xíínndó nasamandó miíndó ta xa̱a̱ndó koondó táki̱ʼva íyo na̱ va̱lí, kǒo ndakiʼinndó bendición Ndióxi̱. Na̱ yiví na̱ kúni̱ xa̱a̱ káʼnuka koo, xíniñúʼu koona táki̱ʼva íyo ta̱ loʼo yóʼoʼ. ¿Á xíni̱ún ndachun ni̱ka̱ʼa̱nra ña̱yóʼo?

Ni̱ka̱ʼa̱nra ña̱yóʼo, saáchi na̱ va̱lí kǒo ndákanixi̱nína ña̱ káʼnuka koona nu̱ú inkana. Xa̱ʼa ña̱yóʼo, na̱ apóstol xíniñúʼu sakuaʼana ta xa̱a̱na koona táki̱ʼva íyo na̱ va̱lí tá kǒo na̱ʼá táʼanna ndáana kúú na̱ káʼnu va̱ʼaka.

Inka yichi̱ tuku ni̱na̱ʼa̱ ta̱ Jesús ña̱ ma̱níra na̱ va̱lí. Tá ni̱ya̱ʼa loʼo yo̱o̱, ki̱xi savana xíʼin se̱ʼena ña̱ va̱ʼa kunina ta̱ Jesús. Na̱ apóstol kǒo níxiinna ña̱ ku̱ʼu̱nna nu̱úra. Soo ta̱ Jesús ni̱ka̱ʼa̱nra xíʼinna: ʼTaxindó ná kixi na̱ va̱lí nu̱íi̱, kǒo kasindóna, chi na̱ ndakiʼin bendición Ndióxi̱ kúú na̱ yiví na̱ íyo táki̱ʼva íyo na̱ va̱lí yóʼoʼ. Tasaá nu̱mira na̱ va̱lí yóʼo ta chi̱ka̱a̱ra bendiciónna. Kúsi̱í-iniyó sákuaʼayó xa̱ʼa ta̱ Jesús chi ma̱níra na̱ va̱lí.