Ke̱ena veʼeka̱a

KOTO ta̱ ángel ta̱ xúná yéʼé veʼeka̱a yóʼo. Xúnára nu̱ú na̱ apóstol ta̱ Jesús ña̱ ná keena ku̱ʼu̱nna. Ná kotoyó ndachun xi̱ñuʼuna veʼeka̱a.

Sa̱kán loʼo tiempo ni̱ya̱ʼa, tá nda̱kiʼin na̱ ndíku̱n sa̱tá ta̱ Jesús espíritu yi̱i̱ Ndióxi̱. Ta ña̱yóʼo kúú ña̱ kúú vitin: ta̱ Pedro xíʼin ta̱ Juan tá xi̱kuaá ku̱a̱ʼa̱nna chí templo ñuu Jerusalén. Yatin yéʼé templo kán níndúʼu iin ta̱ ndu̱chiʼña nani tá ka̱kuvíra kǒo kívi kakara. Ndiʼi ki̱vi̱ ku̱a̱ʼa̱n na̱ yiví chíndúʼunara kán ña̱ ndukúra xu̱ʼún nu̱ú na̱ ku̱a̱ʼa̱n templo. Tá xi̱nira ta̱ Pedro xíʼin ta̱ Juan ndu̱kúra iin ña̱ʼa nu̱úna. ¿Ndáaña taxi na̱yóʼo ndaʼa̱ra?

Ta̱ Pedro xíʼin ta̱ Juan xi̱kunditana ta xi̱tona nu̱úra. ʼKǒo xu̱ʼíi̱n, soo íyo iin ña̱ va̱ʼa taxii̱ ndaʼún. Xíʼin ki̱vi̱ ta̱ Jesús káʼi̱n xíʼún kundichi ta kuaʼánʼ, káchi ta̱ Pedro xíʼinra. Tasaá ti̱in ta̱ Pedro ndaʼa̱ kúaʼara, ta nda̱kundichira ta ke̱era ku̱a̱ʼa̱nra. Tá ni̱kunda̱a̱-ini na̱ yiví xa̱ʼa milagro yóʼo ni̱kusi̱íkaví-inina.

ʼXíʼin ndée Ndióxi̱, ta̱ sa̱ndátaku ta̱ Jesús, ke̱ʼéndi̱ milagro yóʼoʼ, kachi ta̱ Pedro. Ta̱ Pedro xíʼin ta̱ Juan tá káʼa̱nkana xíʼin na̱ yiví, saá ki̱xa̱a̱ sava na̱ su̱tu̱ nu̱úna. Sáa̱ní na̱ su̱tu̱ yóʼo xínina ta̱ Pedro xíʼin ta̱ Juan saáchi káʼa̱nna xíʼin na̱ yiví xa̱ʼa ña̱ nda̱taku ta̱ Jesús. Ña̱kán ti̱inna ta̱ Pedro xíʼin ta̱ Juan ta chi̱ka̱a̱nana veʼeka̱a.

Inka ki̱vi̱ na̱ su̱tu̱ nda̱takana ña̱ tiinna ku̱a̱chi xíʼin na̱yóʼo. Ni̱xa̱ʼa̱nna nda̱kiʼinna ta̱ Pedro, ta̱ Juan xíʼin ta̱a ta̱ sa̱ndáʼa ta̱ Pedro ki̱xa̱a̱ xíʼinna. ʼ¿Míí ni̱xa̱ʼa̱nndó ki̱ʼinndó ndée ña̱ ke̱ʼéndó milagro yóʼo?ʼ, káchina xíʼinna.

ʼXíʼin ndée Ndióxi̱ ke̱ʼéndi̱ña, ta̱ sa̱ndátaku ta̱ Jesúsʼ, káchi ta̱ Pedro. Na̱ su̱tu̱ kǒo xíni̱kana ndáaña ka̱ʼa̱nna, chi ña̱ nda̱a̱va ku̱u ña̱yóʼo. Ña̱kán káʼa̱nna xíʼinna ña̱ ná kǒo natúʼunkana xa̱ʼa ta̱ Jesús, ta sa̱ñánana ku̱a̱ʼa̱nna.

Yáʼa ki̱vi̱ ku̱a̱ʼa̱nña, na̱ apóstol yóʼo sánáʼa̱kana na̱ yiví xa̱ʼa ta̱ Jesús ta sándáʼana na̱ kúúmií kue̱ʼe̱. Iníí ni̱xa̱xa̱ tu̱ʼun xa̱ʼa na̱yóʼo ña̱ kéʼéna milagro. Nda̱a̱ na̱ inka ñuu na̱ íyo yatin xíʼin ñuu Jerusalén va̱xi na̱ kúúmií kue̱ʼe̱ xíʼinna nu̱ú na̱ apóstol ña̱ ná sandáʼanana. Xa̱ʼa ña̱yóʼo na̱ su̱tu̱ ti̱inna na̱ apóstol ta chi̱ka̱a̱nana veʼeka̱a. Soo íyo iin ña̱ ku̱u.

Tá ñu̱ú iin ángel xu̱nára yéʼé veʼeka̱a nu̱úna, táki̱ʼva xítoún nu̱ú na̱ʼná yóʼo. Ta̱ ángel káchira xíʼinna: ʼKuaʼánndó chí templo ta sanáʼa̱kandó na̱ yiví xa̱ʼa Ndióxi̱ʼ. Xi̱ta̱a̱n inka ki̱vi̱, na̱ su̱tu̱ chi̱ndaʼána savana ku̱a̱ʼa̱nna xa̱ʼa na̱ apóstol ná kixina nu̱úna soo kǒokana níndaniʼína. Tándi̱ʼi nda̱niʼínana ini templo ta nda̱kiʼinnana ku̱a̱ʼa̱n xíʼinna nu̱ú ndátakana tíinna ku̱a̱chi.

ʼXa̱ni̱ka̱ʼa̱nndi̱ xíʼinndó ña̱ kǒo sánáʼa̱kandó xa̱ʼa ta̱ Jesús, soo ndóʼó iníí ñuu Jerusalén xíkandó sánáʼa̱ndóʼ, káchi na̱ su̱tu̱ xíʼin na̱ apóstol. Soo na̱yóʼo káchina: ʼXíniñúʼu kuniso̱ʼondi̱ ña̱ káʼa̱n Ndióxi̱ su̱víka ña̱ káʼa̱n na̱ yivíʼ. Ta xíkana sánáʼa̱kana na̱ yiví, va̱ʼaní yichi̱ sa̱ndákoona nu̱úyó.