Va̱ʼaní kundooyó nu̱ú ñuyǐví xa̱á
¿Ni̱saa kúniún á túviún tá xítoún nu̱ú na̱ʼna ña̱ va̱xi yóʼo? ¿Ásu̱ú kúsi̱í-iniún ta kúni̱ún xa̱a̱ún kooún nu̱ú iin ñuyǐví xa̱á tá ku̱ʼva íyo ña̱ va̱xi yóʼo nu̱ú va̱ása kooka ku̱a̱chi ta nu̱ú koo túkúndiʼi ña̱ʼa ña̱ xíniñúʼún? Ndí, ¿á ndixa kixa̱a̱ iin ki̱ví ña̱ koo ña̱yóʼo saá á iin xa̱ni kuitíva kúúña?
Ku̱a̱ʼání na̱ yiví káʼa̱na ndí, iin xa̱ni kuitíva kúú ña̱yóʼo. Saáchi tíempo vitin i̱yo na̱ xáʼní-táʼan, íyo na̱ va̱ása íxatǒʼo ley, íyo so̱ko, íyo kue̱ʼe̱, túkúndiʼiyó xáa̱yó kúchéeyó á kúxiku̱a̱ʼáyó ta íyo ku̱a̱ʼáka nu̱ú ña̱ íyo. Ta ni saáví íyo xa̱ʼá ña̱ kuvi kundatunyó ña̱ kixa̱a̱ iin ki̱ví ña̱ koo va̱ʼayó. Tu̱ʼun Ndióxi̱ káʼa̱ña kixa̱a̱ iin ki̱ví koo “iin ndiví xa̱á xíʼin iin ñuʼú xa̱á ña̱ ndátunyó kuniyó chi saá ni̱ka̱ʼa̱n Ndióxi̱, ta nina chiñu nda̱kú koo nu̱ú ña̱yóʼo” (2 Pedro 3:13; Isaías 65:17).
“Ndiví xa̱á” xíʼin “ñuʼú xa̱á” ña̱ káʼa̱n Tu̱ʼun Ndióxi̱ xa̱ʼá, su̱ví Ñuʼú nu̱ú ndooyó yóʼo kúúña ta ni su̱ví ndiví ña̱ íyo ni̱nu kúúña, chi iin ña̱ ndána̱ʼa̱ kuitíva kúúña. Chi Ndióxi̱ va̱ʼaní ke̱ʼéra Ñuʼú nu̱ú ndooyó yóʼo xíʼin ndiví ña̱ íyo nu̱ú ni̱nu, ta Tu̱ʼun Ndióxi̱ káʼa̱ña ndí ña̱yóʼo va̱ása ndiʼi-xa̱ʼáña (Salmo 89:36, 37; 104:5). Ñuʼú xa̱á ña̱ káʼa̱n Tu̱ʼun Ndióxi̱ xa̱ʼá, ña̱yóʼo kúú iin tiʼvi na̱ yiví na̱ kéʼé nina ña̱ káʼa̱n Ndióxi̱ ta na̱yóʼo kúú na̱ kundoo nu̱ú Ñuʼú yóʼo. Ta tá káʼa̱ña xa̱ʼá iin “ndiví xa̱á”, káʼa̱ña xa̱ʼá iin ra̱ kaʼndiachíñu nu̱ú na̱ kundoo nu̱ú Ñuʼú yóʼo. Ndí, ¿á va̱ʼa íxaayó ña̱ ndátunyó kixa̱a̱ iin ki̱ví ña̱ kundooyó nu̱ú iin “ñuʼú xa̱á” á iin ñuyǐví xa̱á?
Ndakani-xiní xa̱ʼá ña̱yóʼo, chi ña̱yóʼo kúú ña̱ ku̱ni̱ Ndióxi̱ ki̱ví nu̱ú. Ra̱ ikán i̱xava̱ʼara ta̱ Adán xíʼin ñá Eva ta ta̱xira iin Ñuʼú luvi ndaʼána nu̱ú ni̱xi̱yona, ta xi̱naníña Edén, saátu ta̱xira iin chiñu ndaʼána: “Koo se̱ʼendó ta nduku̱a̱ʼándó ta sándakutúndó nu̱ú ñuʼú yóʼo ta kiʼindó kuenta xíʼiña” (Génesis 1:28). Saá íyoña, Ndióxi̱ xi̱ku̱ni̱ra koo ku̱a̱ʼá se̱ʼena ta na̱yóʼo ndasaluvina iníí saá nu̱ú Ñuʼú yóʼo. Tá ndi̱ʼi, na̱yóʼo va̱ása níxiniso̱ʼona ña̱ ni̱ka̱ʼa̱n Ndióxi̱, xa̱ʼá ña̱yóʼo va̱ása níxitiakuna ndisaá tíempo ta ña̱ xi̱ku̱ni̱ Ndióxi̱ xa̱ʼa̱ á ki̱ví nu̱ú va̱ása níndasamaña. ¡Ta ña̱yóʼo ndaxi̱nu nu̱úña ta ná nduu Ñuʼú yóʼo iin ñuyǐví xa̱á! (Isaías 55:11.)
Jesús sa̱náʼa̱ra na̱ ni̱xi̱ka xíʼinra ña̱ ná ka̱ʼa̱na xíʼin Ndióxi̱, ña̱ ná kixa̱a̱ ki̱ví kaʼndiachíñura. Tá ná kixa̱a̱ ki̱ví kaʼndiachíñu Ndióxi̱ nu̱ú Ñuʼú yóʼo saá kúú ña̱ ndiʼi-xa̱ʼá ña̱ vǎʼá (Mateo 6:9, 10). Kuvi kandíxayó ña̱ káʼa̱n Ndióxi̱, saáchi saá káʼa̱n Tu̱ʼunra: “Ndióxi̱ taxira ñuʼú yóʼo ndaʼá na̱ xíka nda̱kú xíʼinra, ta kundoona nu̱úña ndisaá tíempo” (Salmo 37:29).
¿Ni̱saa koo ñuyǐví xa̱á ña̱ taxi Ndióxi̱ ndaʼáyó?
Tá ná kaʼndiachíñu Ndióxi̱ nu̱ú Ñuʼú yóʼo ku̱a̱ʼání ña̱ va̱ʼa koo, saá kúú ña̱ xi̱nu ndiʼi ña̱ ku̱ni̱ra ki̱ví nu̱ú. Va̱ása kooka na̱ yiví na̱ kundasí nu̱ú inka na̱ va̱ása íyo ndi̱a̱ tá íyo miína, ni na̱ sâá-ini xínitáʼan, túkúndiʼi na̱ kundoo nu̱ú Ñuʼú yóʼo va̱ʼaní kutáʼana. Ndióxi̱ káʼa̱nra sandiʼira xa̱ʼá ku̱a̱chi ña̱ xáʼní-táʼana iníí saá nu̱ú Ñuʼú. “Va̱ása kanitáʼanka iin ñuu xíʼin inka ñuu ni va̱ása kiʼvikana ku̱a̱chi náʼnu.” (Salmo 46:9; Isaías 2:4.)
Tá ná ndaxi̱nu ndiʼi ña̱yóʼo, iníí saá nu̱ú Ñuʼú, luviní kooña ndi̱a̱ tá ni̱xi̱yoña ki̱ví nu̱ú. Tu̱ʼun Ndióxi̱ káʼa̱ña: “Yukú íchi xíʼin ñuʼú íchi ndi̱a̱kua kusi̱í-ini ña̱yóʼo ta saátu yosó íchi, ta kooní ita luvi nu̱úña. [...] Chi nu̱ú yukú íchi iin kana koo mií ti̱kuíi, ta nu̱ú yosó íchi iin kunu mií ti̱kuíi nu̱úña. Ta ñuʼú nu̱ú niʼníní luviní nduu ña̱yóʼo ndi̱a̱ tá íyo ndo̱ʼyo; ta ñuʼú nu̱ú íchiní ndakoo mii̱ni nu̱úña” (Isaías 35:1, 6, 7).
Nu̱ú Ñuʼú ikán yâʼaní kusi̱í-iniyó, chi ku̱a̱ʼání ña̱ luvi koo nu̱úña. Na̱ yiví, ndi̱a̱ ni iin ichí va̱ása kuma̱níka ña̱ kuxina. Tu̱ʼun Ndióxi̱ káʼa̱n: “Ña̱ ndixa kúú ña̱ koo ku̱a̱ʼá ña̱ʼa va̱ʼa [kuxiyó] nu̱ú ñuʼú yóʼo” (Salmo 67:6; 72:16). Túkúndiʼi na̱ koo ikán nina chiñu ña̱ kúsi̱í-inina keʼéna, ndi̱a̱ tá káchi Yiváyó Jehová: “Ña̱ ndixa kúú ña̱ asava̱ʼana veʼe ta kundoona iniña; ta chiʼina tú uva ta miína kaxí kui̱ʼi ndaʼánú. [...] Va̱ása chiʼina ta inkana kaxiña” (Isaías 65:21, 22).
Tíempo vitin íyo na̱ yiví na̱ kǒó veʼe nu̱ú kundoo, ta iin veʼe ndákutáʼan ndiʼina ndóona ta ndáʼviní íyo nu̱ú ndóona, ndí ñuyǐví xa̱á síínva kooña ikán, Ndióxi̱ káʼa̱nra ña̱ saá kooña: “Ña̱ ndixa kúú ña̱ asava̱ʼana veʼe ta kundoona iniña [...]. Va̱ása asava̱ʼana ña ta inkana kundoo iniña”. Tu̱ʼun Ndióxi̱ káʼa̱n: “Va̱ása kunaána tá ná kachíñuna” (Isaías 65:21-23). Ta saá kúú ña̱ keʼéna nina chiñu ña̱ kúsi̱í-inina ta ku̱a̱ʼání ña̱ va̱ʼa ni̱ʼina xa̱ʼá chiñu ña̱ keʼéna. Si̱íní kuu-inina túkúndiʼi ki̱ví.
Tá ná ya̱ʼa tíempo, ra̱ kaʼndiachíñu ikán va̱ʼaní ndasaara Ñuʼú yóʼo ndi̱a̱ tá ni̱xi̱yo Ñuʼú luvi ña̱ xi̱naní Edén, túkú kití va̱ása kue̱ʼe̱ka koorí xíʼin táʼanrí ni xíʼin na̱ yiví. Tu̱ʼun Ndióxi̱ káʼa̱n: “Ña̱ ndixa kúúña, tí lobo kutáʼanrí iin tíempo xíʼin ndikachi, ta tí ku̱i̱i̱n inkáchi kandúʼurí xíʼin ti̱xuʼú loʼo, ta tí si̱ndikí loʼo xíʼin ndikaʼa tí xa̱ ni̱xi̱nu [...] inkáchi kutáʼan ndiʼirí kakarí; ta iin ra̱ loʼo chíín kundiaarí” (Isaías 11:6-9; Oseas 2:18).
Ndakani-xiní xa̱ʼá Ñuʼú luvi ikán chi va̱ása kooka kue̱ʼe̱, túkú na̱ kǔví kaka nduva̱ʼana á na̱ kuáa nu̱ú ndakotona. Tu̱ʼun Ndióxi̱ káʼa̱n: “Ndi̱a̱ ni iin na̱ kundoo ikán, va̱ása ka̱ʼa̱na: ‘Ndieéní ndóʼiʼ” (Isaías 33:24). “[Ndióxi̱] ndaya̱kunra ti̱kuíi nu̱úna, va̱ása kuvikana, ni va̱ása kooka ña̱ kusuchí-inina ni va̱ása kuakukana, ni va̱ása kooka ña̱ xúʼvi̱na. Túkúndiʼi ña̱yóʼo xa̱ ni̱ya̱ʼa ndiʼiña.” (Revelación 21:4.)
¿Ndíá ña̱ xíniñúʼu keʼún ta va̱ʼa xa̱a̱ún kooún nu̱ú ña̱yóʼo?
Kusana kúsi̱í-iniún ña̱ ku̱nda̱a̱-iniún xa̱ʼá ña̱ káʼa̱n Ndióxi̱ ña̱ kundooyó nu̱ú ñuyǐví xa̱á nu̱ú va̱ása kooka ku̱a̱chi. Ku̱a̱ʼání na̱ yiví va̱ása kándíxana ña̱ ndaxi̱nu ña̱ káʼa̱n Ndióxi̱, chi ni̱ya̱ʼaní va̱ʼa ña̱yóʼo ña̱kán va̱ása xíina kandíxana ña̱ kúúña ña̱ nda̱a̱, va̱ʼani yâʼaní va̱ʼa ña̱yóʼo ndí Ndióxi̱ kuviva taxira ña̱yóʼo ndaʼáyó (Salmo 145:16; Miqueas 4:4).
Átu kúni̱yó kundooyó nu̱ú ñuyǐví xa̱á, xíniñúʼu keʼéyó ña̱ kúni̱ Ndióxi̱, Jesús ni̱ka̱ʼa̱nra xíʼin Yivára xa̱ʼá iin ña̱ xíniñúʼu keʼéyó tá ka̱chira: “Ña̱ va̱ʼa kutiakuna ndisaá tíempo xíniñúʼu nda̱kundieéna sákuaʼana xa̱ʼá yóʼo̱, mitúʼun Ndióxi̱ ra̱ nda̱a̱, ta saátu xa̱ʼá ra̱ chi̱nda̱ʼún nu̱ú ñuʼú yóʼo, Jesucristo” (Juan 17:3).
Ña̱kán átu ndixa kúni̱yó kundooyó nu̱ú ñuyǐví xa̱á, xiʼnaka sákuaʼayó ndíá ña̱ kúú ña̱ kúni̱ Ndióxi̱ keʼéyó ta saá keʼéyó ña, chi ñuyǐví yóʼo ña̱ ndiʼi xa̱ʼá kúúña ta saátu ña̱ʼa íyo nu̱úña, ta na̱ kéʼé ña̱ kúni̱ Ndióxi̱, na̱yóʼo kúú na̱ kutiaku ndisaá tíempo. Átu ná keʼéyó ña̱ kúni̱ Ndióxi̱ saára kutiakuyó ndisaá tíempo ta ndakiʼinyó túkúndiʼi ña̱ va̱ʼa ña̱ taxi Yiváyó Jehová ndaʼáyó (1 Juan 2:17).