Na̱ kǒo níxiinka kandíxa Ndióxi̱ chí ndiví

Ndiʼi na̱ espíritu na̱ i̱xava̱ʼa Jehová na̱ va̱ʼa xi̱kuuna. Soo iin ta̱ ángel ki̱xáʼara kéʼéra ña̱ va̱ása va̱ʼa. Ta̱yóʼo kúú ta̱ Ndi̱va̱ʼa. Ta̱yóʼo xi̱kuni̱ra ña̱ ndiʼi na̱ yiví na̱ ndóo nu̱ú ñuʼú ná ndasakáʼnuna miíra nu̱úka ña̱ ndasakáʼnuna Jehová. Vitin ná kotoyó ndáa ki̱ʼva ku̱u ña̱yóʼo.

Nu̱ú jardín ña̱ Edén ku̱a̱ʼání yitu̱n ni̱xi̱yo ta ku̱a̱ʼání ku̱i̱ʼi xi̱taxinú. Jehová ni̱ka̱ʼa̱nra xíʼin ta̱ Adán saátu xíʼin ñá síʼira ñá Eva, ña̱ kiviva kaxína nda̱a̱ ndáaka ku̱i̱ʼi kúni̱ miína. Soo ni̱xi̱yo iin yitu̱n tú ni̱ka̱ʼa̱n Ndióxi̱ xíʼinna ña̱ kǒo kívi kaxína ku̱i̱ʼi ndaʼa̱nú. Chi tá ná kaxína ña̱yóʼo kuvivana (Génesis 2:​9, 16, 17).

Iin ki̱vi̱ tá íyo mitúʼun ñá Eva iin ko̱o̱ ni̱ka̱ʼa̱nrí xíʼinñá. Soo su̱ví ko̱o̱ví kúú tí níka̱ʼa̱n xíʼinñá; ta̱ Ndi̱va̱ʼa xi̱kuura ta xi̱niñúʼura iin ko̱o̱ ña̱ va̱ʼa ke̱ʼéra ña̱yóʼo. Ta̱ Ndi̱va̱ʼa ni̱ka̱ʼa̱nra xíʼin ñá Eva tá ná kaxíñá ku̱i̱ʼi ña̱ kǒo kívi kaxína xa̱a̱na ndíchi koona nda̱a̱ táki̱ʼva íyo Ndióxi̱. Ta ni̱ka̱ʼa̱ntura xíʼinñá ña̱ va̱ása kuvivína. U̱vi̱ saá ña̱ ni̱ka̱ʼa̱nra xíʼinñá ña̱ vatá xi̱kuuña. Soo ni saá ñá Eva ka̱ndíxañá ña̱ ni̱ka̱ʼa̱n ta̱ Ndi̱va̱ʼa xíʼinñá ta xa̱xíñá ku̱i̱ʼi yóʼo. Tándi̱ʼi ta̱xiñá ku̱i̱ʼi yóʼo xa̱xí ta̱ Adán (Génesis 3:​1-6).

Xíʼin ña̱yóʼo sákuaʼayó, ta̱ Ndi̱va̱ʼa iin ta̱ vatá kúúra ta yáʼandosóra ña̱ káʼa̱n Ndióxi̱. Ni̱ka̱ʼa̱nra xíʼin ñá Eva ña̱ va̱ása kuvivíñá ta ná ya̱ʼandosóñá ña̱ ni̱ka̱ʼa̱n Ndióxi̱. Iin ña̱ vatá xi̱kuu ña̱yóʼo chi ni̱xi̱ʼi̱vañá ta saátu ndo̱ʼo ta̱ Adán. Ta̱ Ndi̱va̱ʼa va̱ása níxi̱ʼi̱víra, soo kixaa̱ iin ki̱vi̱ ña̱ ndiʼi-xa̱ʼa̱ra xa̱ʼa̱ ku̱a̱chi ña̱ ni̱ki̱ʼvira. Soo nani tákura ndákundeéra sándaʼvira na̱ yiví. Ta̱yóʼo ndákundeéra káʼa̱nra ña̱ vatá ta kúni̱ra sandáʼvira na̱ yiví ña̱ kǒo keʼéna ña̱ káʼa̱n Ndióxi̱ (Juan 8:44).

Na̱ ángel na̱ ni̱ya̱ʼandosó ña̱ ni̱ka̱ʼa̱n Ndióxi̱

Tá ni̱ya̱ʼa tiempo savaka na̱ ángel ki̱xáʼana kéʼéna ña̱ va̱ása va̱ʼa. Na̱yóʼo xi̱nina ña̱ liviní ná ñaʼá ná íyo nu̱ú ñuʼú yóʼo ta ki̱xáʼana kúni̱na ku̱su̱nna xíʼinná. Xa̱ʼa̱ ña̱yóʼo ki̱xina nu̱ú ñuʼú yóʼo ta ndu̱una nda̱a̱ táki̱ʼva íyo na̱ yiví ta ki̱xáʼana tíndaʼa̱na xíʼin ná ñaʼá. Soo su̱ví ña̱yóʼo kúú ña̱ níxikuni̱ Ndióxi̱ (Génesis 6:​1, 2; Judas 6).

Xa̱ʼa̱ ña̱yóʼo ki̱xáʼa íyo ku̱a̱ʼání ña̱ va̱ása va̱ʼa nu̱ú ñuʼú yóʼo. Ná síʼi na̱ ángel ki̱xáʼa ka̱ku se̱ʼena soo síínní ni̱xi̱yona. Na̱yóʼo náʼnuní ni̱xi̱yona ta ndi̱va̱ʼaní ni̱xi̱yo inina. Tá ni̱ya̱ʼa tiempo ku̱a̱ʼání ña̱ʼa ña̱ va̱ása va̱ʼa ki̱xáʼa íyo nu̱ú ñuʼú yóʼo. Ña̱kán, Jehová ni̱ka̱ʼa̱nra ña̱ kuniñúʼura sa̱vi̱ kini ña̱ sandíʼi-xa̱ʼa̱ra na̱ kéʼé ña̱ va̱ása va̱ʼa. Iinlá ta̱ Noé xíʼin na̱ veʼera kúú na̱ ni̱ka̱ku tá ku̱un sa̱vi̱ kini (Génesis 6:​4, 11; 7:23).

Na̱ ángel na̱ ndi̱va̱ʼa-ini ndi̱kóna chí ndiví ta va̱ása níxi̱ʼi̱vína. Soo nda̱kiʼinvana castigo. Ndióxi̱ va̱ása nítaxikara ña̱ ndakutáʼanna xíʼin na̱ ángel na̱ va̱ʼa. Ta saátu kǒo nítaxikara ña̱ nduuna nda̱a̱ táki̱ʼva íyo miíyó na̱ yiví. Ta chí nu̱únínu sandíʼi-xa̱ʼa̱varana (2 Pedro 2:4; Judas 6).

Sa̱kánana ta̱ Ndi̱va̱ʼa ña̱ va̱xira chí nu̱ú ñuʼú

Tá ku̱i̱ya̱ 1914 ka̱nitáʼanna chí ndiví. Nu̱ú Apocalipsis káʼa̱nña xíʼinyó xa̱ʼa̱ ña̱ ku̱u ta káchiña: “Ta ki̱xáʼa kánitáʼanna chí ndiví, ta̱ Miguel [ta̱yóʼo kúú ta̱ Jesucristo] xíʼin na̱ ángel [na̱ va̱ʼa] na̱ kítáʼan xíʼinra ka̱nitáʼanna xíʼin tí dragón, ta tí dragón [ta̱ Ndi̱va̱ʼa], xíʼin na̱ ángel [na̱ va̱ása va̱ʼa], na̱ kítáʼan xíʼinrí ka̱nitáʼantu na̱yóʼova xíʼinra, soo va̱ása níkuchiñuna, ta va̱ása níkivika koo na̱yóʼo chí ndiví. Ta chí ni̱nu̱ sa̱kánana tí dragón tí kúú ko̱o̱ tí nu̱ú va̱ʼa, tí káʼa̱nna xíʼin ña̱ nanírí ta̱ Ndi̱va̱ʼa, tí sándaʼvi ndiʼi na̱ yiví, ta sa̱kánanarí nu̱ú ñuʼú ta saátu na̱ ángel [na̱ va̱ása va̱ʼa] na̱ kítáʼan xíʼinrí”.

¿Ta ndáaña ku̱u? Biblia káchiña: “Xa̱ʼa̱ ña̱yóʼo ndiví xíʼin na̱ íyo nu̱úña kusi̱í-inindó”. Na̱ ángel na̱ va̱ʼa kiviva kusi̱í-ini na̱yóʼo saáchi ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra va̱ása kookana chí ndiví. Soo, ¿ndáaña ndoʼo na̱ yiví na̱ ndóo nu̱ú ñuʼú yóʼo? Biblia káchiña: “Soo ndáʼviní ñuʼú xíʼin mar, saáchi ta̱ Ndi̱va̱ʼa ku̱xa̱a̱ra nu̱úndó ta sáa̱níra chi xíni̱ra ña̱ ndáa si̱lóʼo kuití tiempo kíndo̱o ndaʼa̱ra” (Apocalipsis 12:​7-9, 12).

Ndixava, ta̱ Ndi̱va̱ʼa xíʼin na̱ ángel ndi̱va̱ʼa na̱ kítáʼan xíʼinra sándaʼvina na̱ yiví ta xóʼvi̱nína íxaana. Na̱ ángel ndi̱va̱ʼa yóʼo nanína ta̱chí ndi̱va̱ʼa. Na̱yóʼo íyona contra Ndióxi̱ ta nina ña̱ va̱ása va̱ʼa kéʼéna.