Na̱ ta̱chí ndi̱va̱ʼa kúni̱na sakúxíkana miíyó nu̱ú Ndióxi̱

¿Nda̱chun kúni̱ní ta̱ Ndi̱va̱ʼa xíʼin na̱ ta̱chí ndi̱va̱ʼa sandáʼvina na̱ yiví? Saáchi kúni̱na ña̱ ná ixaso̱ʼoyó nu̱ú Ndióxi̱ nda̱a̱ táki̱ʼva ke̱ʼé miína. Kúni̱na ña̱ ná ndasakáʼnuyóna, kandíxayó ña̱ káʼa̱nna ta keʼéyó ña̱ʼa ña̱ kǒo kútóo Jehová. Ku̱a̱ʼání ña̱ kúni̱ na̱yóʼo keʼéyó kítáʼanña xíʼin costumbre ña̱ kéʼé ku̱a̱ʼání na̱ yiví tá xíʼi̱ iin na̱ veʼena.

Tá xíʼi̱ iin na̱ veʼeyó ndeéní kusuchí-iniyó, ña̱kán su̱ví iin ku̱a̱chiví kúú ña̱ kuakuyó. Tá na̱kunda̱a̱-ini ta̱ Jesús ña̱ ni̱xi̱ʼi̱ migora ta̱ Lázaro, xa̱kura (Juan 11:35).

Ku̱a̱ʼání kúú costumbre ña̱ kéʼé na̱ yiví tá xa̱a̱ ni̱xi̱ʼi̱ iinna ta ña̱yóʼo xa̱a̱ síín síín kéʼénaña iníísaá nu̱ú ñuʼú. Sava costumbre ña̱ kúúmií na̱yóʼo va̱ása yáʼandosóña ña̱ káʼa̱n tu̱ʼun Ndióxi̱. Soo savaña va̱ása va̱ʼaña chi ndákanixi̱nína ña̱ kúnda̱a̱kava-ini na̱ ni̱xi̱ʼi̱ ta xíniso̱ʼona ña̱ káʼa̱nna xíʼinna. Ña̱kán savana iníí ñuú ndóona xíʼinna, ndeéní xákuna xa̱ʼa̱na. Ta xa̱ʼa̱ ña̱ yíʼvina xíninana, káʼnuní vikó kéʼéna xa̱ʼa̱na ña̱ va̱ʼa ná kǒo keʼéna nda̱a̱ ni iin ña̱ʼa ña̱ va̱ása va̱ʼa xíʼinna. Soo na̱ ni̱xi̱ʼi̱ kǒoka ña̱ xíni̱na xa̱ʼa̱, ña̱kán na̱ ndíku̱n costumbre yóʼo kéʼéna ña̱ kútóo ta̱ Ndi̱va̱ʼa (Eclesiastés 9:5).

Íyo sava costumbre ña̱ kúúmií na̱ yiví ña̱ ndákanixi̱nína ña̱ kivi chindeétáʼanna xíʼin na̱ ni̱xi̱ʼi̱ chi tá ná kǒo keʼéna ña̱yóʼo, na̱ ni̱xi̱ʼi̱ yóʼo kivi ixandi̱va̱ʼana xíʼinna. Sava ñuu tá xíʼi̱ iin na̱ yiví tá xínu i̱i̱n ki̱vi̱ ndániʼina cruz na̱yóʼo ta saátu kéʼéna tá xínu iin ku̱i̱ya̱ ña̱ ni̱xi̱ʼi̱na. Ndákanixi̱nína ña̱ tá kéʼéna ña̱yóʼo chíndeétáʼanna xíʼinna ña̱ va̱ʼa xa̱a̱na ñuu xi̱ʼí. Inkatu ña̱ kéʼéna kúú ña̱ chíndoona ña̱ʼa nu̱ú na̱ ni̱xi̱ʼi̱ chi túvina ña̱ kivi kuxunaña á koʼonaña.

Ña̱ kéʼéna yóʼo su̱ví ña̱ va̱ʼa kúúña chi ña̱ vatá ña̱ sánáʼa̱ ta̱ Ndi̱va̱ʼa xa̱ʼa̱ na̱ ni̱xi̱ʼi̱ kúúña. ¿Á kusi̱í-ini Jehová tá ná kundiku̱nyó costumbre ña̱ kúú kuenta na̱ ta̱chí ndi̱va̱ʼa? Va̱ásaví (2 Corintios 6:14-18).

Na̱ ndásakáʼnu Ndióxi̱ ta̱ nda̱a̱, ni loʼoví va̱ása kéʼéna ña̱yóʼo chi ndiʼi ña̱yóʼo ña̱ vatá ña̱ kúú kuenta ta̱ Ndi̱va̱ʼa kúúña. Nu̱úka ña̱ kundiku̱nna ña̱ vatá ña̱ sánáʼa̱ ta̱ Ndi̱va̱ʼa, chíka̱a̱nína ndee̱ ña̱ chindeétáʼanna xíʼin na̱ ni̱xi̱ʼi̱ táʼan ta sándi̱kona-inina. Chi kúnda̱a̱-inina tá xa̱a̱ ni̱xi̱ʼi̱ iin na̱ yiví, iinlá kuití Jehová kúú ta̱ kivi chindeétáʼan xíʼinna (Job 14:14, 15).

Ndióxi̱ va̱ása kúni̱ra ña̱ keʼéyó ña̱ʼa ña̱ kúú kuenta na̱ ta̱chí ndi̱va̱ʼa

Sava na̱ yiví káʼa̱nna xíʼin na̱ ta̱chí ndi̱va̱ʼa á xíniñúʼuna inka na̱ yiví ña̱ kivi keʼéna ña̱yóʼo. Ta na̱ kéʼé ña̱yóʼo ñúʼuna ndaʼa̱ na̱ ta̱chí ndi̱va̱ʼa. Tá kúú na̱ kéʼé ña̱ tási, na̱ ndákuati, na̱ ku̱a̱ʼa̱n nu̱ú na̱ ndáku, na̱ xíto xa̱ʼa̱ inkana, na̱ káʼa̱n xíʼin na̱ ni̱xi̱ʼi̱, ndiʼi na̱ kéʼé ña̱yóʼo ndaʼa̱ na̱ ta̱chí ndi̱va̱ʼa ñúʼuna.

Ña̱ Biblia káʼa̱nña ña̱ va̱ása va̱ʼa keʼéyó ña̱yóʼo chi káchiña: “Ñuu nu̱ú íyoún va̱ása va̱ʼa koo [...] na̱ kéʼé ña̱ ndáku, ni na̱ kéʼé magia, á na̱ xíni iin ña̱ʼa ta káʼa̱nna ña̱ kúyíʼna kúúña, ni na̱ kéʼé ña̱ tási, ni na̱ sándu̱xu̱n yixí xi̱ní inkana á ti̱ko̱to̱na ña̱ keʼéna ña̱ tási xíʼinna, ni na̱ ku̱a̱ʼa̱n nándukú na̱ tu̱ʼva á na̱ ndáku, ni na̱ nátúʼun xíʼin na̱ ni̱xi̱ʼi̱. Chi ndiʼi na̱ yiví na̱ kéʼé ña̱ kini yóʼo kúndasí nu̱ú Jehová xínirana” (Deuteronomio 18:​10-12).

¿Nda̱chun káxiní káʼa̱n Jehová xíʼinyó ña̱ va̱ása va̱ʼa keʼéyó nda̱a̱ ni iin ña̱yóʼo?

Xa̱ʼa̱ ña̱ va̱ʼa miíyó kúú ña̱ káʼa̱n Jehová xíʼinyó ña̱ ná va̱ása keʼéyó ña̱ʼa ña̱ kúú kuenta na̱ ta̱chí ndi̱va̱ʼa. Ta̱yóʼo kúʼvi̱ní-inira xínira miíyó ta ndíʼi̱ní-inira xa̱ʼa̱yó chi kúnda̱a̱-inira ña̱ ndiʼi na̱ kéʼé ña̱ʼa ña̱ kúú kuenta na̱ ta̱chí ndi̱va̱ʼa xóʼvi̱nína.

Iin ñá ndo̱ʼo saá kúú ñá Nilda, ñáyóʼo ñá ñuu Brasil kúúñá ta xi̱keʼéñá ña̱ tási. Na̱ ta̱chí ndi̱va̱ʼa i̱xandi̱va̱ʼanína xíʼinñá. Ñáyóʼo káchiñá: “Na̱ ta̱chí ndi̱va̱ʼa [...] xi̱kiʼvina inii̱ ta xi̱keʼéna ña̱ xi̱kuni̱ miína xíʼi̱n. Sava yichi̱ xi̱kiʼi̱n kuenta ndáaña xi̱keʼéna xíʼi̱n ta sava yichi̱ nda̱a̱ xi̱ndañúʼu-inii̱, nda̱a̱ sa̱sánana yi̱ʼi̱, ña̱kán ku̱a̱ʼá yichi̱ ni̱xa̱ʼi̱n hospital. Na̱ ta̱chí ndi̱va̱ʼa ndeéní xi̱ndiku̱nna sa̱tái̱, xa̱ʼa̱ ña̱yóʼo ndiʼi tiempo xi̱yiʼvíi̱. Ña̱ va̱ʼa kunii̱ ki̱xáʼíi̱ xíʼi̱ ta̱tán, ki̱xáʼíi̱ xíʼi̱ ndixi ta xi̱xaʼminíi̱. Ku̱a̱ʼání ku̱i̱ya̱ ndo̱ʼi̱ ña̱yóʼo”.

Tá ni̱ya̱ʼa tiempo, mií Jehová xíʼin na̱ testigora chi̱ndeétáʼanna xíʼin ñá Nilda ña̱ ki̱tañá ndaʼa̱ na̱ ta̱chí ndi̱va̱ʼa. Ta vitin nda̱ʼavañá ta si̱íní kúniñá. Ñáyóʼo káchiñá: “Káʼi̱n xíʼin ndiʼina ña̱ nda̱a̱ ni iin yichi̱ ni loʼo ná va̱ása keʼéna ña̱ kútóo na̱ ta̱chí ndi̱va̱ʼa”.