Ndasakáʼnu Jehová su̱ví ta̱ Ndi̱va̱ʼa

Ndiʼiyó kivi ndaka̱xinyó á ndasakáʼnuyó Jehová á ndasakáʼnuyó ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra. Va̱ása kívi ndasakáʼnuyó u̱vi̱ saána. Iin ña̱ va̱ʼaní kúúña tá ná ndaka̱xinyó ndasakáʼnuyó Jehová.

Va̱ʼaní-ini Jehová

Nda̱a̱ táki̱ʼva sa̱kuaʼayó nu̱ú tutu yóʼo, na̱ ta̱chí ndi̱va̱ʼa kútóonína ixandi̱va̱ʼana xíʼin na̱ yiví ta saátu ña̱ sandáʼvinana. Jehová va̱ása kéʼéra ña̱yóʼo. Ta̱yóʼo kúʼvi̱ní-inira xínira na̱ yiví nda̱a̱ táki̱ʼva kúʼvi̱ní-ini iin ta̱a xínira na̱ se̱ʼera. “Ndiʼi ña̱ʼa ña̱ va̱ʼa, chí ndiví va̱xiña ta Ndióxi̱ kúú ta̱ táxi ña̱yóʼo” (Santiago 1:​17). Ku̱a̱ʼání ña̱ va̱ʼa táxira ndaʼa̱yó, nda̱a̱ ta̱xira se̱ʼera ni̱xi̱ʼi̱ra xa̱ʼa̱yó (Efesios 2:​4-7).

Ndakanixi̱ní xa̱ʼa̱ ndiʼi ña̱ʼa ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo. Na̱ kǒo kívi ka̱ʼa̱n xíʼin na̱ kǒo kívi koto, sa̱ndáʼarana. Saátu sa̱ndáʼara na̱ kúúmií lepra xíʼin na̱ kǒo kívi kaka. Ta̱vára ta̱chí ndi̱va̱ʼa ini na̱ yiví ta sa̱ndáʼara na̱ xi̱kuumií nda̱a̱ ndáaka kue̱ʼe̱. Ndióxi̱ ta̱xira ndee̱ ndaʼa̱ ta̱ Jesús ña̱kán nda̱a̱ sa̱ndátakura na̱ ni̱xi̱ʼi̱ (Mateo 9:​32-35; 15:​30, 31; Lucas 7:​11-15).

Ndióxi̱ nina ña̱ nda̱a̱ káʼa̱nra, nda̱a̱ ni iin yichi̱ va̱ása sándaʼvira nda̱a̱ ni iinna (Números 23:19).

Ná kǒo keʼéyó ña̱ʼa ña̱ yaku̱a̱

Nda̱a̱ táki̱ʼva ndóʼo iin ndikama tá ndákavarí nu̱ú xi̱ndu̱ʼva̱, saá ndóʼo ku̱a̱ʼání na̱ yiví chi ndákavana ndaʼa̱ ta̱ Ndi̱va̱ʼa ta kándíxana ña̱ vatá ña̱ sánáʼa̱ra. ¿Ndáaña kúú ña̱ vatá ña̱ sánáʼa̱ra? Tá kúú ña̱ yíʼvina xínina na̱ ni̱xi̱ʼi̱, yíʼvina xínina na̱ ta̱chí ndi̱va̱ʼa, yíʼvina ña̱ ki̱xi chiʼña sa̱tána, á tá kúú tá xáku iin tí mícho tí yíʼna kúúrí káchina, kéʼéna ña̱ tási, savatuna chíka̱a̱na ña̱ʼa su̱kúnna á ndaʼa̱na ña̱ va̱ʼa kundaaña miína. Ta̱ Ndi̱va̱ʼa xíniñúʼura costumbre ña̱ kúúmií na̱ yiví ña̱ sándaʼvirana ña̱ keʼéna ña̱ kútóo miíra. Soo na̱ ndásakáʼnu Jehová va̱ása táxina ña̱ sandáʼvirana ña̱ keʼéna ña̱yóʼo.

Jehová íyoníka ndee̱ra nu̱ú ta̱ Ndi̱va̱ʼa. Tá ná ndasakáʼnún Jehová miíra kundaa yóʼó nu̱ú na̱ ta̱chí ndi̱va̱ʼa (Santiago 4:7). Ni ná ixatásina xíʼún kǒo ña̱ kundoʼún. Ná ka̱ʼa̱nyó xa̱ʼa̱ ña̱ ku̱u chí ñuu Nigeria, u̱ni̱ na̱ ta̱a i̱xatásina xíʼin iin ta̱ testigo Jehová chi xi̱kuni̱na kaʼnínara xa̱ʼa̱ ña̱ kǒo níxiinra kitara ñuura. Tá xi̱nina ña̱ kǒo ña̱ʼa níndoʼora, iin ta̱ tási kán ni̱yi̱ʼvíníra ta ni̱xa̱ʼa̱nra nu̱ú ta̱ testigo kán ta ndu̱kúra ña̱ káʼnu-ini nu̱úra.

Tá kúni̱ na̱ ta̱chí ndi̱va̱ʼa ixandi̱va̱ʼana xíʼún, kuniñúʼu ki̱vi̱ Jehová ña̱ ka̱ʼún xíʼinra ta chindeétáʼanvara xíʼún (Proverbios 18:10). Soo ña̱ va̱ʼa chindeétáʼan Ndióxi̱ xíʼún, xíniñúʼu sandákoún ndiʼi ña̱ʼa ña̱ kítáʼan xíʼin ña̱ tási saátu sandákoún ña̱ʼa ña̱ kúú kuenta na̱ ta̱chí ndi̱va̱ʼa. Ña̱yóʼo kúú ña̱ ke̱ʼé na̱ xi̱ndasakáʼnu Ndióxi̱ na̱ xi̱ndoo chí ñuu Éfeso tá tiempo xi̱naʼá. Nda̱kayana ndiʼi libro ña̱ magia ña̱ xi̱kuumiína ta xa̱ʼminaña (Hechos 19:​19, 20). Tiempo vitin, saá kúú ña̱ xíniñúʼu keʼé ndiʼi na̱ ndásakáʼnu Ndióxi̱. Kǒo kuniñúʼún nda̱a̱ ni iin ña̱ʼa ña̱ ndákanixi̱ní na̱ yiví ña̱ íyoní ndee̱ ña̱ va̱ʼa chindeéña yóʼó. Tá kúú savana chíka̱a̱na ña̱ʼa su̱kúnna á ndaʼa̱na ña̱ va̱ʼa chindeéñana, kǒo keʼún ña̱yóʼo, ni kǒo kuniñúʼún libro ña̱ magia á nda̱a̱ ndáaka inka ña̱ʼa ña̱ kítáʼan xíʼin ña̱ tási.

Ndasakáʼnu Ndióxi̱ nda̱a̱ táki̱ʼva kúni̱ miíra

Tá kúni̱ún ña̱ ná kindo̱o-ini Ndióxi̱ xíʼin ña̱ kéʼún, su̱ví kuití sandákoún veʼe-ñu̱ʼu vatá á sandákoún keʼún ña̱ʼa ña̱ va̱ása va̱ʼa. Chi xíniñúʼu ndasakáʼnu ni̱ʼún Ndióxi̱ nda̱a̱ táki̱ʼva kúni̱ miíra. Ta ña̱ Biblia káʼa̱nña xíʼinyó ndáa ki̱ʼva keʼéyó ña̱yóʼo:

Kutáʼan xíʼin na̱ testigo Jehová

Íyo na̱ yiví na̱ kítáʼan xíʼin ta̱ Ndi̱va̱ʼa ta saátu xíʼin na̱ ta̱chí ndi̱va̱ʼa nu̱ú ñuʼú yóʼo ta nina ña̱ kini sánáʼa̱na ta saátu kéʼéna. Soo íyotu na̱ ñuu Jehová nu̱ú ñuʼú yóʼo, ta na̱yóʼo kúú na̱ testigo Jehová (Isaías 43:10). Iníísaá ñuyǐví xa̱a̱ yáʼaka u̱na̱ millónna íyo. Ndiʼi na̱yóʼo chíka̱a̱nína ndee̱ ña̱ keʼéna ña̱ va̱ʼa ta saátu ña̱ sanáʼa̱na ña̱ nda̱a̱. Ku̱a̱ʼání país kuniún ña̱ ndátaka na̱ testigo Jehová veʼe nu̱ú ndásakáʼnuna Ndióxi̱, tá ná ku̱ʼún yóʼo va̱ʼaní ndakiʼinna yóʼó.

Ña̱ kéʼéna kúúña chíndeétáʼanna xíʼin inkana ña̱ va̱ʼa sakúaʼana xa̱ʼa̱ Ndióxi̱. Na̱yóʼo kivi ku̱ʼu̱nna veʼún ña̱ sanáʼa̱na yóʼó xa̱ʼa̱ Biblia ta sanáʼa̱na yóʼó ña̱ ndasakáʼnún Jehová nda̱a̱ táki̱ʼva kúni̱ miíra. Ta va̱ása chaʼvivíún xa̱ʼa̱ ña̱ sanáʼa̱na yóʼó. Na̱ testigo kúsi̱íní-inina sánáʼa̱na na̱ yiví chi kúʼvi̱-inina xíninana ta saátu kúʼvi̱-inina xínina Jehová.