¿Yóó kúú na̱ ítáʼan va̱ʼa xíʼin Ndióxi̱?

Jesucristo kúú Se̱ʼe Jehová ta va̱ʼaní ítáʼanra xíʼin ra, ta kúʼvi̱ní-inira xíniñaʼára. Tá kúni̱ka kixi Jesús nu̱ú Ñuʼú yóʼo, iin ángel xi̱kuura nu̱ú ndiví (Juan 17:5). Saá ki̱xira nu̱ú Ñuʼú yóʼo sa̱náʼa̱ra na̱ yiví ña̱ nda̱a̱ xa̱ʼá Ndióxi̱ (Juan 18:37). Ta̱xira miíra xa̱ʼá na̱ yiví na̱ kándixañaʼá, ña̱ sáka̱kura na nu̱ú kua̱chi ta va̱ása kuvikana (Romanos 6:23). Tá ni̱xi̱ʼi̱ Jesús, Ndióxi̱ sa̱ndatiakuñaʼá. Tá ndi̱ʼi chi̱ndúʼuñaʼára ña̱ kúúra Rey ta̱ xáʼndiachíñu nu̱ú ndiví, ta ndasaluvira Ñuʼú yóʼo (Revelación 19:16).

Saátu íyo na̱ ángel va̱ʼaní ítáʼana xíʼin Ndióxi̱. Na̱ ángel yóʼo su̱ví nu̱ú Ñuʼú níkuva̱ʼana ña̱ koona ndi̱a̱ tá íyo na̱ yiví. Xinaʼá tá kúni̱ka kuva̱ʼa Ñuʼú yóʼo, xiʼnaka na̱ ángel ku̱váʼa̱ nu̱ú ndiví (Job 38:4-7). Ku̱a̱ʼánína íyo (Daniel 7:10). Na̱ ángel na̱ va̱ʼaní ítáʼan xíʼin Ndióxi̱, kúni̱na ná kunda̱a̱-ini na̱ yiví ña̱ nda̱a̱ xa̱ʼá Jehová (Revelación 14:6, 7).

Íyotu na̱ ítáʼan va̱ʼa xíʼin Ndióxi̱ nu̱ú Ñuʼú yóʼo; nanína Testigora. Iin testigo kúú iin na̱ kua̱ʼa̱n nu̱ú na̱ chíñu ta káʼa̱na xa̱ʼá iin na̱ yiví á iin ña̱ xínina xa̱ʼá. Na̱ testigo ra̱ Jehová káʼa̱na xíʼin na̱ yiví xa̱ʼá Jehová ta xa̱ʼá ña̱ kúni̱ ra (Isaías 43:10). Tá íyo na̱ ángel, saátu íyo na̱ Testigo, kúni̱na chindiétáʼana xíʼún ña̱ sakuaʼún ña̱ nda̱a̱ xa̱ʼá Jehová. Kúni̱na ná kutáʼan va̱ʼún xíʼin Ndióxi̱.