¿Ndáa chiñu kéʼéna Betel?

Na̱ káchíñu Betel xa̱síín chiñu kéʼé iin iinna, savana sáyáʼana tutu tu̱ʼun Ndióxi̱ inka tu̱ʼun, savana távána tutu xíʼin máquina, savana chíndaʼána tutu yóʼo ku̱a̱ʼa̱nña inka ñuu, savana íxaa gravana tu̱ʼun Ndióxi̱ ña̱ kuniso̱ʼoyó á ña̱ʼa ña̱ kotondeʼéyó. Ndiʼi chiñu ña̱ kéʼé na̱yóʼo kúúña ña̱ va̱ʼa ná ku̱ʼu̱n tu̱ʼun Ndióxi̱ nu̱ú na̱ yiví.

Na̱ kíʼin kuenta xíʼin Betel na̱yóʼo kúú na̱ kíʼin kuenta xíʼin ndiʼi chiñu. Na̱ kíʼin kuenta xíʼin Ñuu Ndióxi̱ na̱yóʼo kúú na̱ táxi chiñu ndaʼa̱ u̱ni̱ á ku̱a̱ʼáka na̱ xi̱ku̱aʼa na̱ xíni va̱ʼa ña̱ kiʼinna kuenta xíʼin Betel. Ta na̱yóʼo kúú na̱ nátúʼun xíʼin na̱ kíʼin kuenta xíʼin ñuura nda̱saa ku̱a̱ʼa̱n chiñu ña̱ país ña̱ kíʼin Betel kuenta xíʼin, ta ndáa tu̱ndóʼo kúú ña̱ kúúmií ta iin ta iin país yóʼo, ta ña̱yóʼo kúúña chíndeé Na̱ kíʼin kuenta xíʼin Ñuu Ndióxi̱ ña̱ va̱ʼa kotona ndáaña kúú ña̱ ka̱ʼa̱nna xa̱ʼa nu̱ú tutu ña̱ tavána, ta ndáaña kúú ña̱ sanáʼa̱na miíyó nu̱ú ndátakayó sákuaʼayó xa̱ʼa Ndióxi̱. Sava yichi̱ Na̱ kíʼin kuenta xíʼin Ñuu Ndióxi̱ chíndaʼána na̱ ku̱a̱ʼa̱n nu̱úna ña̱ kotona iin iin Betel, ta na̱yóʼo táxina yichi̱ nu̱ú na̱ kíʼin kuenta xíʼin Betel ña̱ va̱ʼa sáxi̱nuna chiñu ña̱ kúúmiína (Proverbios 11:14). Ta ndátakatu sava na̱ congregación na̱ kíʼin Betel kuenta xíʼin ña̱ kuniso̱ʼona ña̱ ka̱ʼa̱nndosó ta̱ va̱xi xítoniʼni Betel ndiʼi ña̱ káʼa̱n ta̱yóʼo chíndeéñana.

Chíndeéna na̱ congregación. Na̱ Betel káʼa̱n ndáa ñuu kivi koo congregación. Níʼituna yichi̱ nu̱ú na̱ kúú precursor, na̱ kúú misionero xíʼin na̱ kúú circuito. Ta káʼa̱nna míí koo asamblea á míí kuva̱ʼaka Veʼe nu̱ú Ndákutáʼan na̱ Testigo Jehová ta chíndaʼána tutu ku̱a̱ʼa̱n congregación. Ndiʼi chiñu ña̱ kéʼé na̱ Betel yóʼo chíndeéña ña̱ va̱ʼaka ku̱ʼu̱n tu̱ʼun Ndióxi̱ nu̱ú na̱ yiví (1 Corintios 14:33, 40).

• Na̱ kíʼin kuenta xíʼin Betel, ¿nda̱saa chindeéna Na̱ kíʼin kuenta xíʼin Ñuu Ndióxi̱?

• ¿Ndáa chiñu kéʼé na̱ ñúʼu Betel?