¿Nda̱saa táana tutu tu̱ʼun Ndióxi̱ ta sáyáʼanaña inka tu̱ʼun?

Ña̱ va̱ʼa ku̱ʼu̱n tu̱ʼun Ndióxi̱ nu̱ú na̱ yiví, na̱ inka ñuu, na̱ káʼa̱n inka tu̱ʼun, xa̱yáʼa u̱xa̱ ciento u̱vi̱ xiko u̱xu̱ nu̱ú tu̱ʼun kána tutu ña̱ káʼa̱n xa̱ʼa Ndióxi̱ (Revelación 14:6). ¿Nda̱saa kéʼéna ña̱yóʼo ta ku̱a̱ʼání nu̱ú tu̱ʼun kúúña? Iin grupo kúú na̱ tává tutu yóʼo ta xa̱síín ñuu iin iinna, ta ndiʼi na̱yóʼo kúúna testigo Jehová.

Siʼna tu̱ʼun inglés táanaña. Na̱ kíʼin kuenta xíʼin Ñuu Ndióxi̱ kúúna kíʼin kuenta xíʼin na̱ Oficina na̱ káʼyí Tutu na̱ íyo Estados Unidos. Na̱ oficina yóʼo kúú na̱ táxi yichi̱ nu̱ú na̱ káʼyí tutu ña̱ iin iin Betel. Xa̱ʼa ña̱ xa̱síín síín país íyo na̱ káʼyí tutu yóʼo xa̱síín ña̱ʼa káʼa̱n iin iinna xa̱ʼa, ña̱kán tutu tu̱ʼun Ndióxi̱ ku̱a̱ʼání ña̱ʼa káʼa̱nña xa̱ʼa.

Tutu tu̱ʼun inglés ku̱a̱ʼa̱nña nu̱ú na̱ sáyáʼaña inka tu̱ʼun. Tá xa̱ka̱na va̱ʼa tutu tu̱ʼun inglés saá chíndaʼánaña ku̱a̱ʼa̱nña nu̱ú na̱ sáyáʼaña inka tu̱ʼun ña̱ iníí ñuyǐví, ta na̱yóʼo sáyáʼanaña tu̱ʼun miína, tándíʼi ta̱anaña i̱xaa kuentana á va̱ʼa ta̱anaña. Ta na̱ sáyáʼa inka tu̱ʼun chíka̱a̱na ndée ña̱ vií va̱ʼa káʼyínaña, tasaá inkáchi ka̱ʼa̱nña xíʼin tu̱ʼun inglés (Eclesiastés 12:10).

Tú computadora chindeénú ña̱ kama kana chiñu. Tú computadora kǒo kívi keʼénú táʼan ña̱ kéʼé na̱ yiví, soo ña̱ kúúmiínú diccionario ta ku̱a̱ʼáka ña̱ʼa va̱xi ininú ña̱kán va̱ʼa chindeénú na̱ sáyáʼa inka tu̱ʼun ña̱ kama kéʼéna chiñuna. Na̱ testigo Jehová kúúmiína iin programa ña̱ naní Sistema Electrónico de Edición Plurilingüe (MEPS, siʼa káʼa̱nna xíʼinña tu̱ʼun inglés), programa yóʼo chindeé na̱ sáyáʼa inka tu̱ʼun ña̱ va̱ʼaka taana tu̱ʼun miína ta saátú ña̱ va̱ʼa chinu̱úna na̱ʼná nu̱ú tutu yóʼo. Tasaá koo tuʼvaña ña̱ va̱ʼa kanaña xíʼin máquina.

Ni loʼo kúú na̱ yiví na̱ káʼa̱n inka tu̱ʼun, ¿ndachun ndíʼi̱-inindi̱ xa̱ʼana? Chi ña̱ kúni̱ Jehová kúúña, ndiʼi “na̱ yiví ná xa̱a̱na kunda̱a̱-inina xa̱ʼara tasaá va̱ʼa ka̱kuna” (1 Timoteo 2:3, 4).

• ¿Ndáaña kéʼé ndiʼi na̱ káʼyí tutu ña̱ va̱ʼa ná kanaña?

• ¿Ndachun ku̱a̱ʼání tu̱ʼun táanaña?