¿Ndáaña keʼéyó ña̱ va̱ʼa kundaayó Veʼe nu̱ú Ndákutáʼanyó?

Ndiʼi Veʼe nu̱ú Ndákutáʼan na̱ Testigo Jehová níʼiña ki̱vi̱ Ndióxi̱, xa̱ʼa ña̱yóʼo va̱ása taxiyó kuya̱ku̱a̱ña xíniñúʼu kiʼinyó kuenta xíʼinña. Iin ña̱ va̱ʼaní kúú ña̱yóʼo ta ndiʼiyó va̱ʼa kéʼéyóña chi yóʼo kúú nu̱ú ndásakáʼnuyó Jehová.

Ná tiʼvíyó veʼe nu̱ú ndátakayó. Tá ndíʼi reunión kíxaʼána tíʼvina iniña. Tá sava yichi̱ vií va̱ʼaka tíʼvina iniña. Iin ta̱ xi̱ku̱aʼa ta kíʼin kuenta xíʼin congregación á iin ta̱ chindeé na̱ congregación, na̱yóʼo kúú na̱ káʼa̱n xíʼinna ndáaña keʼéna: á na̱ tiʼví koona, á tayi̱ ya̱kúnna á kandita viína tú yóʼo, á baño nakatana, á yu̱u̱ tátá ya̱kúnna á ventana ya̱kúnna, á taka katana á tiʼvituna chí sa̱tá veʼe á chí yéʼé. Iin yichi̱ nu̱ú ku̱i̱ya̱ á sava ku̱a̱ʼáka yichi̱ ndátaka ndiʼina ña̱ tiʼvi vií va̱ʼakana á ndasaviína veʼe yóʼo. Ta va̱ʼa taxituna iin chiñu ndaʼa̱ na̱ va̱lí chi saá sakuaʼana kundaana veʼe yóʼo chi yóʼo kúú nu̱ú ndásakáʼnuyó Ndióxi̱ (Eclesiastés 5:1).

Ná chindeéyóna tá sándáʼana veʼe. Ku̱i̱ya̱ tá ku̱i̱ya̱ xítoniʼnina-iniña á sa̱táña ndáa ña̱ʼa kúma̱ní á ndáa ña̱ʼa ndi̱ʼi-xa̱ʼa. Tasaá va̱ʼa ndasaviínaña ña̱kán ná kǒo ndiʼi-xa̱ʼa kamaña ta kǒo ku̱a̱ʼá xu̱ʼún chika̱a̱na xíʼinña chí nu̱únínu (2 Crónicas 24:13; 34:10). Ña̱ va̱ʼa kuna̱ʼa̱ iin veʼe nu̱ú ndásakáʼnuyó Jehová xíniñúʼu vií kooña va̱ása koo yaku̱a̱ña. Tá xáʼa̱nyó káchíñuyó Veʼe nu̱ú Ndákutáʼanyó ña̱ sákuaʼayó xa̱ʼa Ndióxi̱ saá kúú ña̱ náʼa̱yó ña̱ kúni̱yóra (Salmo 122:1). Tá vií ná koo veʼe yóʼo, va̱ʼa ka̱ʼa̱nna xa̱ʼayó (2 Corintios 6:3).

• ¿Ndachun xíniñúʼu kundaayó veʼe nu̱ú xáʼa̱nyó ndásakáʼnuyó Ndióxi̱?

• ¿Ndáaña keʼéyó ña̱ va̱ʼa kuna̱ʼa̱ veʼe nu̱ú ndásakáʼnuyó Ndióxi̱?