¿Á ndixa Ndióxi̱ kúú ta̱ káʼa̱n tu̱ʼun ña̱ va̱xi nu̱ú Biblia?

1. ¿Yukú tu̱ʼun kúú ña̱ va̱xi nu̱ú Biblia?

Nu̱ú Biblia va̱xi tu̱ʼun va̱ʼa ña̱ káʼa̱n xíʼinyó ña̱ kooyó ndiʼi tíempo nu̱ú Ñuʼú yóʼo (Salmo 37:29). Nu̱ú Biblia yóʼo va̱xi 66 libro válí ta 40 ta̱a kúú na̱ nda̱kaxin Ndióxi̱ ta̱aña. Ta xa̱ku̱a̱ʼa̱n u̱ni̱ mil u̱ʼu̱n ciento ku̱i̱ya̱ ña̱ ka̱ʼyí ta̱ Moisés u̱ʼu̱n libro válí ña̱ kíxaʼá xa̱ʼa ña̱ Biblia. Ta ta̱ apóstol Juan kúú ta̱ ka̱ʼyí libro nu̱ú ndiʼi va̱ʼa. Xa̱ku̱a̱ʼa̱n mil i̱i̱n ciento ku̱i̱ya̱ ña̱ ka̱ʼyíra ña̱yóʼo.

¿Yukú tu̱ʼun kúú ndiʼi ña̱ va̱xi nu̱ú Biblia? Ndióxi̱ xi̱niñúʼura ndéera ña̱ ni̱ka̱ʼa̱nra xíʼin ta̱a na̱ ka̱ʼyí ña̱ Biblia (2 Samuel 23:2). Ndiʼi ta̱a yóʼo va̱ása níkaʼyína ña̱ kúni̱ miína chi ña̱ ni̱ka̱ʼa̱n Ndióxi̱ xíʼinna kúú ña̱ ka̱ʼyína. Ña̱kán, tu̱ʼun ña̱ va̱xi nu̱ú Biblia tu̱ʼun Jehová kúúña. Kaʼvi 2 Timoteo 3:16 xíʼin 2 Pedro 1:20, 21.

2. ¿Ndachun xíniñúʼu kandíxayó ndiʼi tu̱ʼun ña̱ va̱xi nu̱ú Biblia?

Saáchi tu̱ʼun ña̱ va̱xi nu̱ú Biblia tu̱ʼun Ndióxi̱va kúúña. Kándixayó ña̱ káʼa̱nña, chi tá kúú káʼa̱nña xa̱ʼa ña̱ koo chí nu̱únínu va̱ʼaní xínuña. Ta ni iin na̱ yiví kǒo kúchiñu ka̱ʼa̱n xa̱ʼa ña̱ koo chí nu̱únínu (Josué 23:14). Iinlaa Ndióxi̱ kúú ta̱ kuchiñu ka̱ʼa̱n xa̱ʼa ndiʼi ña̱yóʼo. Kaʼvi Isaías 42:9 xíʼin 46:10.

Tu̱ʼun Ndióxi̱ kúú ña̱ va̱xi nu̱ú Biblia ña̱kán ndáyáʼviníña. Ta xa̱yâʼa millón Biblia ku̱a̱ʼa̱n xáxa̱, ta yâʼa ciento nu̱ú tu̱ʼun xa̱ni̱kaʼyi̱ña. Ni xa̱yataní íyo ña̱ Biblia ni saáví va̱ʼaní kítáʼan yu̱ʼu̱ña xíʼin tu̱ʼun káʼa̱n na̱ ka̱ʼvi va̱ʼa. Ni 40 kúú ta̱a ka̱ʼyíña iin nu̱ú káʼa̱n ndiʼina.a Ta ndiʼi libro ña̱ va̱xi nu̱ú Biblia náʼa̱ña nu̱úyó ña̱ kúni̱ní Ndióxi̱ xínira miíyó. Ta nda̱a̱ vitin íyoní ndée ña̱yóʼo chi va̱ʼa násamaña na̱ yiví. Ña̱kán millón na̱ yiví kándixana ña̱ kúúña Tu̱ʼun Ndióxi̱. Kaʼvi 1 Tesalonicenses 2:13.

3. ¿Ndáaña káʼa̱n ña̱ Biblia xa̱ʼa?

Ña̱ Biblia káʼa̱nña xíʼinyó xa̱ʼa ña̱ va̱ʼa ña̱ ta̱xi Ndióxi̱ ndaʼa̱yó. Káʼa̱nña xíʼinyó xa̱ʼa ta̱ Adán xíʼin ñá Eva na̱ nu̱ú i̱xava̱ʼa Ndióxi̱, ta kǒo níkivika koona nu̱ú Ñuʼú livi. Ta káʼa̱n-tuña xíʼinyó ndáaña keʼéra ña̱ va̱ʼa ndasalivi tukura nu̱ú Ñuʼú yóʼo. Kaʼvi Revelación (Apocalipsis) 21:4, 5.

Ña̱ Biblia táxiña yichi̱ nu̱úyó, táxiña konsejo ndaʼa̱yó ta va̱xitu ley Ndióxi̱ nu̱úña. Ta káʼa̱nña xíʼinyó ndáaña xi̱keʼé Ndióxi̱ xíʼin na̱ xi̱ndoo xi̱naʼá, ta ña̱yóʼo náʼa̱ña nu̱úyó á ta̱ va̱ʼa ini kúúra. Ña̱ Biblia chíndeé táʼanña xíʼinyó ña̱ va̱ʼa sakuaʼayó xa̱ʼa Ndióxi̱. Sánáʼa̱tuña miíyó ndáaña xíniñúʼu keʼéyó ña̱ va̱ʼa xa̱a̱yó kooyó mígora. Kaʼvi Salmo 19:7, 11; Santiago 2:23, xíʼin 4:8.

4. ¿Ndáaña xíniñúʼu kéʼéyó ña̱ va̱ʼa kunda̱a̱-iniyó ña̱ káʼa̱n Biblia?

Tutu yóʼo chindeé táʼan xíʼún ña̱ va̱ʼa kunda̱a̱-iniún xa̱ʼa ña̱ sánáʼa̱ Ndióxi̱, chi nda̱a̱ táki̱ʼva sa̱náʼa̱ Jesús saá va̱xiña. Chi ta̱yóʼo xi̱niñúʼura Tu̱ʼun Ndióxi̱, ta xi̱natúʼunra xa̱ʼaña xíʼin na̱ yiví ña̱ va̱ʼa ná “kunda̱a̱-inina ña̱ sánáʼa̱ Tu̱ʼun Ndióxi̱”. Kaʼvi Lucas 24:27, 45.

Ku̱a̱ʼání ña̱ va̱ʼa káʼa̱n Ndióxi̱ taxira ndaʼa̱yó. Soo ku̱a̱ʼá na̱ yiví kǒo kúni̱na sakuaʼana xa̱ʼa ña̱yóʼo, ta savana nda̱a̱ sáa̱na tá káʼa̱nyó xíʼinna xa̱ʼa Ndióxi̱. Soo va̱ása taxiún sandákava na̱yóʼo iniún. Chi ná sakuaʼún xa̱ʼa Ndióxi̱ saá kúú ña̱ va̱ʼa kutakuún ndiʼi tíempo. Kaʼvi Juan 17:3.