¿Nda̱saa kúni̱ Jehová koo Ñuʼú yóʼo?

1. ¿Ndachun i̱xava̱ʼa Jehová Ñuʼú yóʼo?

Jehová va̱ʼaní i̱xava̱ʼara Ñuʼú yóʼo ña̱kán va̱ʼa kundooyó nu̱úña. Tá i̱xava̱ʼara ta̱ Adán xíʼin ñá Eva, kǒo níkuva̱ʼana ña̱ kundoona chí ndiví. Saáchi na̱ ángel kúú na̱ i̱xava̱ʼa Ndióxi̱ ña̱ koona chí ndiví (Job 38:4, 7). Tá i̱xava̱ʼa Jehová ta̱ Adán chi̱ndúʼurara ña̱ koora nu̱ú iin ñuʼú livi ña̱ xi̱naní Edén (Génesis 2:15-17). Ndióxi̱ ni̱ka̱ʼa̱nra ña̱ kivi kutaku ta̱ Adán ndiʼi tíempo nu̱ú Ñuʼú yóʼo, ta saátu ndiʼi na̱ yiví kuvi kutakuna ndiʼi tíempo. Kaʼvi Salmo 37:29 xíʼin 115:16.

Ñuʼú livi ña̱ xi̱naní Edén, iin táʼví nu̱ú Ñuʼú yóʼo ni̱xi̱yoña. Ña̱kán ta̱ Adán xíʼin ñá Eva kaku se̱ʼena ta kuee kuee ndasalivina iníísaá nu̱ú Ñuʼú yóʼo (Génesis 1:28). Ñuʼú yóʼo ku̱va̱ʼaña ña̱ koo na̱ yiví nu̱úña, ña̱kán va̱ása xa̱a̱ iin ki̱vi̱ ndiʼi-xa̱ʼaña. Kaʼvi Salmo 104:5.

2. ¿Ndachun kǒo íyo livi Ñuʼú yóʼo tíempo vitin?

Saáchi ta Adán xíʼin ñá Eva kǒo níkandíxana Ndióxi̱, ña̱kán ta̱várana nu̱ú Ñuʼú livi. Ña̱kán ndiʼi-xa̱ʼa Ñuʼú livi kán, ­ta kǒo na̱ yiví kivi ndasalivi tukuña. Tu̱ʼun Ndióxi̱ káʼa̱n iin nda̱kutú nu̱ú Ñuʼú yóʼo xíʼin na̱ yiví na̱ kéʼé ña̱ kini (Job 9:24). Kaʼvi Génesis 3:23, 24.

Ña̱ kǒo livi Ñuʼú yóʼo, ¿á kúni̱ kachiña va̱ása kúchiñu Jehová ña̱ sáxi̱nura tu̱ʼun ña̱ ni̱ka̱ʼa̱nra? Kǒo kúni̱ kachi ña̱yóʼo saá, saáchi Ndióxi̱ íyo ndiʼi ndée ndaʼa̱ra ta va̱ʼava kéʼéra ndiʼi ña̱ kúni̱ra (Isaías 45:18). Chí nu̱únínu Ndióxi̱ taxira ña̱ kutaku na̱ yiví táki̱ʼva xi̱ku̱ni̱ra tá xa̱ʼa. Kaʼvi Salmo 37:11, 34.

3. ¿Yukú ndasalivi Ñuʼú yóʼo?

Jesús ta̱ ta̱xi Ndióxi̱ chiñu ndaʼa̱ kúú ta̱ ndasalivi iníísaá nu̱ú Ñuʼú yóʼo. Koo iin ku̱a̱chi ña̱ naní Armagedón, tasaá ta̱ Jesús xíʼin na̱ ángel sandiʼi-xa̱ʼana na̱ yiví na̱ kǒo kándixa Ndióxi̱. Tasaá mil ku̱i̱ya̱ chikasi Jesús ta̱ Ndiva̱ʼa ña̱ kǒo keʼékara ña̱ kini. Na̱ kándixa Ndióxi̱ kutakuna ki̱vi̱ kán chi Jesús sáka̱kurana, ta kutakuna ndiʼi tíempo nu̱ú Ñuʼú livi. Kaʼvi Revelación (Apocalipsis) 20:1-3 xíʼin 21:3, 4.

4. ¿Ama ndiʼi-xa̱ʼa tu̱ndóʼo?

¿Ama sandiʼi-xa̱ʼa Ndióxi̱ ña̱ kini? Jesús ni̱ka̱ʼa̱nra xa̱ʼa ña̱ kuniyó tá xa̱kuyatin ki̱vi̱ ndiʼi-xa̱ʼaña. Ña̱ kini ña̱ íyo tíempo vitin, náʼa̱ña nu̱úyó ña̱ xa̱kuyatin ndiʼi-xa̱ʼa ñuyǐví ña̱ kini. Kaʼvi Mateo 24:3, 7-14, 21, 22.

Ti̱xin mil ku̱i̱ya̱ ña̱ kaʼndachíñu Jesús nu̱ú Ñuʼú yóʼo, saá kuee kuee sandiʼi-xa̱ʼara ndiʼi tu̱ndóʼo (Isaías 9:6, 7; 11:9). Ta xa̱ʼa ña̱ kuura iin su̱tu̱ káʼnu, ña̱kán kivi sandiʼi-xa̱ʼara ku̱a̱chi na̱ kúʼvi̱-ini xíni Ndióxi̱. Saá íyoña, Ndióxi̱ kuniñúʼura ta̱ Jesús ña̱ va̱ʼa sandiʼi-xa̱ʼara kue̱ʼe̱, sandiʼi-xa̱ʼara ña̱ kúchéeyó ta va̱ása kuvikayó. Kaʼvi Isaías 25:8 xíʼin 33:24.

5. ¿Yukú na̱ koo nu̱ú Ñuʼú livi?

Na̱ yiví na̱ xíniso̱ʼo ña̱ káʼa̱n Ndióxi̱ kúú na̱ koo nu̱ú Ñuʼú livi (1 Juan 2:17). Jesús ni̱ka̱ʼa̱nra xíʼin na̱ ni̱xi̱ka xíʼinra ña̱ ná ku̱ʼu̱nna nandukúna na̱ yiví, ta sanáʼa̱na na̱yóʼo keʼéna ña̱ kúni̱ Ndióxi̱. Ki̱vi̱ vitin, Jehová xa̱sánáʼa̱ra millón na̱ yiví ña̱­kán kivi koona nu̱ú Ñuʼú livi (Sofonías 2:3). Na̱ xáʼa̱n nu̱ú ndákutáʼan na̱ testigo Jehová kán sákuaʼana koo viína xíʼin ñá síʼína á yíi̱na ta vií koona xíʼin se̱ʼena. Miína xíʼin se̱ʼena ndásakáʼnuna Ndióxi̱ ta sákuaʼana xa̱ʼa ña̱ va̱ʼa ña̱ káʼa̱n ­Ndióxi̱ taxira ndaʼa̱na. Kaʼvi Miqueas 4:1-4.