¿Nda̱saa va̱ʼa kuyatinyó nu̱ú Ndióxi̱?

1. ¿Á xíniso̱ʼo Ndióxi̱ ndiʼi ña̱ káʼa̱nyó xíʼinra?

Ndióxi̱ káʼa̱nra xíʼin ndiʼi na̱ yiví ña̱ ná ka̱ʼa̱nna xíʼinra (Salmo 65:2). Soo kǒo kúni̱ kachiña ña̱ xíniso̱ʼora ña̱ káʼa̱n ndiʼi na̱ yiví xíʼinra. Ña̱ Biblia káʼa̱nña xíʼinyó va̱ása xíniso̱ʼo Ndióxi̱ ña̱ káʼa̱n na̱ íxandiva̱ʼa xíʼin ñá síʼína (1 Pedro 3:7). Tá ki̱vi̱ xi̱keʼé na̱ ñuu Israel ña̱ va̱ása va̱ʼa nu̱ú Ndióxi̱, ta va̱ása níxixiniso̱ʼokara ña̱ xi̱ka̱ʼa̱nna xíʼinra. Nda̱a̱ na̱ kéʼé ña̱ kini tá ndixa sandákoona ña̱ kéʼéna ta kúni̱so̱ʼova Ndióxi̱ ña̱ ka̱ʼa̱nna xíʼinra. Kaʼvi Isaías 1:15 xíʼin 55:7.

2. ¿Ndáa ki̱ʼva ka̱ʼa̱nyó xíʼin Ndióxi̱?

Iinlaa Jehová kúú ta̱ ka̱ʼa̱nyó xíʼin chi ta̱yóʼo kúú Yiváyó ta ta̱yóʼo kúú ta̱ i̱xava̱ʼa ndiʼi ña̱ʼa (Mateo 4:10; 6:9). Xa̱ʼa ña̱ kúúyó na̱ yiví ku̱a̱chi tá ki̱vi̱ káʼa̱nyó xíʼin Ndióxi̱ xíniñúʼu ­kuniñúʼuyó ki̱vi̱ Jesús chi ta̱yóʼo kúú ta̱ ni̱xi̱ʼi̱ xa̱ʼa ku̱a̱chiyó (Juan 14:6). Va̱ása kútóo Jehová ña̱ sákuaʼa xíʼin xi̱níyó á ña̱ kaʼviyó iin tutu ña̱ káʼyína ña̱ ka̱ʼa̱nyó xíʼinra. Ña̱ kúni̱ ta̱­kán kúú ña̱ ndinuʼu níma̱yó ná ka̱ʼa̱nyó xíʼinra. Kaʼvi Mateo 6:7 xíʼin Filipenses 4:6, 7.

Yiváyó Jehová xíniso̱ʼora ndiʼi ña̱ káʼa̱nyó, nda̱a̱ tá ndákani kuití xi̱níyóña kúnda̱a̱va-inira ña̱ káʼa̱nyó xíʼinra (1 Samuel 1:12, 13). Káʼa̱nra xíʼinyó ña̱ ná ka̱ʼa̱n ni̱ʼiyó xíʼinra tá sa̱ka̱n ndákooyó, tá xa̱ku̱su̱nyó, tá xa̱kuxuyó á tá íyo tu̱ndóʼo nu̱úyó. Kaʼvi Salmo 55:22 xíʼin Mateo 15:36.

3. ¿Ndachun xíniñúʼu ndakutáʼanyó ña̱ sákuaʼayó xa̱ʼa Ndióxi̱?

Saáchi íyoyó nu̱ú íyo na̱ yiví na̱ kǒo kándíxa Ndióxi̱ ta nda̱a̱ kúsikindaana miíyó chi káʼa̱nyó ña̱ ndasalivi Ndióxi̱ nu̱ú ñuʼú yóʼo. Ña̱yóʼo kivi sandákavaña-iniyó ta kǒo ku̱nikayó kuyatinyó nu̱ú Ndióxi̱ (2 Timoteo 3:1, 4; 2 Pedro 3:3, 13). Xa̱ʼa ña̱yóʼo kúúña xíniñúʼu ndakutáʼanyó tasaá va̱ʼa taxiyó ndée ndaʼá-táʼanyó. Kaʼvi Hebreos 10:24, 25.

Tá ndákutáʼanyó xíʼin na̱ kúni̱ xíni Ndióxi̱ saá kúú ña̱ kúyatinkayó nu̱úra. Ta ná ku̱ʼu̱nyó Veʼe nu̱ú Ndákutáʼan na̱ Testigo Jehová saá kúú ña̱ sakuaʼayó kandíxayó Ndióxi̱ chi ku̱a̱ʼání na̱ ku̱a̱ʼa̱n kán kándíxanara xíʼin ndiʼi níma̱na. Kaʼvi Romanos 1:11, 12.

4. ¿Nda̱saa vaʼa kuyatiún nu̱ú Ndióxi̱?

Ña̱ va̱ʼa chindeé yóʼó ña̱ kivi kuyatiún nu̱ú Ndióxi̱ kúúña tá káʼviún Biblia xíniñúʼu ndakanixi̱níún xa̱ʼa ña̱ káʼviún, xa̱ʼa konsejora ña̱ va̱xi nu̱úña, xa̱ʼa ña̱ káʼa̱nra taxira ndaʼa̱yó chí nu̱únínu. Chi ta̱yóʼo ndíchiníra tá ná ndakanixi̱níún xa̱ʼa ndiʼi ña̱yóʼo tá kaʼún xíʼinra ña̱yóʼo chindeé yóʼó ña̱ va̱ʼaka kunda̱a̱ka-iniún ña̱ kúʼvi̱-ini Ndióxi̱ xínira miíyó. Kaʼvi Josué 1:8 xíʼin Salmo 1:1-3.

Kivi kuyatiún nu̱ú Ndióxi̱ tá ndinuʼu-iniún kándíxaúnra. Tá íyo iin yitún loʼo chíʼiyó chi xíniñúʼu ko̱so̱yonú ña̱ va̱ʼa kuaʼnunú, saá íyo ña̱ kándíxayó Ndióxi̱ xíniñúʼu ndakanixi̱­níyó xa̱ʼa ña̱ sákuaʼayó ta saá va̱ʼaka kúnda̱a̱-iniyó. Kaʼvi Mateo 4:4 xíʼin Hebreos 11:1, 6.

5. ¿Ndáaña va̱ʼa ndakiʼinyó tá ná kuyatinyó nu̱ú Ndióxi̱?

Jehová ndíʼi̱-inira xa̱ʼa na̱ kúni̱ xíniñaʼá. Ta ndáarana ña̱ ná kǒo sándákoona ña̱ kándíxanará ta ná kǒo nandosó-inina xa̱ʼa ña̱ káʼa̱nra ña̱ koona ndiʼi tíempo chí nu̱únínu (Salmo 91:1, 2, 7-10). Xa̱ya̱chi̱ka káʼa̱nra xíʼinyó ña̱ kundaayó miíyó nu̱ú tu̱ndóʼo, ta sánáʼa̱ra miíyó ndáaña keʼéyó ta va̱ʼa si̱í kundooyó. Kaʼvi Salmo 73:27, 28 xíʼin Santiago 4:4, 8.