Ta̱ rey ta̱ nda̱kaxin Ndióxi̱ kaʼndachíñu nu̱ú Ñuʼú yóʼo

Xa̱ni̱nu̱mí kaʼndachíñu ta̱ rey ta̱ nda̱kaxin Ndióxi̱ nu̱ú Ñuʼú yóʼo. ¿Á kúni̱ún kunda̱a̱-iniún ndáaña keʼéra?... Ndasalivira iníísaá nu̱ú Ñuʼú yóʼo ña̱ va̱ʼa kundooyó nu̱úña. ¿Á kúni̱ún kunda̱a̱ka-iniún xa̱ʼara?...

Siʼna ná ka̱ʼa̱nyó xa̱ʼa iin na̱ kúú rey ndáa chiñu kéʼé na̱yóʼo. Iin rey kúú iin na̱ xáʼndachíñu nu̱ú iin ñuu káʼnu. Ndióxi̱ nda̱kaxinra iin rey. ¿Á xíni̱ún ndáana nda̱kaxinra kuu rey?... Ta̱ Jesús nda̱kaxinra. Vitin chí ndiví íyora, xa̱ni̱nu̱mí kaʼndachíñura iníísaá ñuyǐví. Soo, ¿á si̱í kooyó tá ná kaʼndachíñura?...

Si̱íva kundooyó. Tá ná ndulivi nu̱ú Ñuʼú yóʼo kǒoka ku̱a̱chi̱ koo. Na̱ yiví va̱ása kanitáʼankana. Ni kǒoka kue̱ʼe̱ koo ni va̱ása kuvikana. Na̱ yiví na̱ va̱ása túvi nu̱ú tiempo vitin ndatuvi nu̱úna, na̱ va̱ása xíniso̱ʼo va̱ʼa kuniso̱ʼona. Na̱ kǒo kívi kaka va̱ʼa kununa ta va̱ʼa kanditana. Ndiʼi na̱ yiví kooní ña̱ʼa kuxuna. Tí kití va̱ása kaxí táʼankarí, ta va̱ʼa kusíkíyó xíʼinrí. Na̱ yiví na̱ ni̱xi̱ʼi̱ ndatakuna. Saátu na̱ sa̱kuaʼayó xa̱ʼa nu̱ú tutu yóʼo tá kúú ñá Rebeca, ñá Rahab, ta̱ David, ta̱ Elías ndatakutu na̱yóʼova. ¿Á kǒo kútóún kuniún na̱yóʼo tá ná ndatakuna?...

Jehová kúni̱níra xínira yóʼó ta kúni̱ra si̱í koún. Tá ná sakuaʼakaún xa̱ʼara ta kandíxaún ndiʼi ña̱ káʼa̱nra xíʼún, xa̱ún koún nu̱ú ñuyǐví xa̱á ndiʼi tiempo. ¿Á kǒo kútóún koún nu̱ú iin ñuyǐví xa̱á?...