¿Nda̱saa va̱ʼa kundaandó xu̱ʼúnndó?

Ndiʼivayó xíniñúʼu xu̱ʼún ña̱ va̱ʼa kuniñúʼuyóña xíʼin na̱ veʼeyó (Proverbios 30:8). Xu̱ʼún ña̱ chíndeé kuitíva kúúña miíyó (Eclesiastés 7:12). Sana íxayo̱ʼvi̱ña xíʼinndó ña̱ natúʼunndó xa̱ʼa xu̱ʼún xíʼin na̱ veʼendó, soo va̱ása nda̱ʼyi̱ nu̱ú táʼanndó xa̱ʼa xu̱ʼún (Efesios 4:32). Xíniñúʼu kandíxa táʼanndó ta ka̱ʼa̱n xíʼin táʼanndó míí kuniñúʼundóña.

1 NDAKANI VIÍ XI̱NÍNDÓ MÍÍ KUNIÑÚʼUNDÓ XU̱ʼÚN

ÑA̱ KÁʼA̱N BIBLIA: “¿Ndáa ndóʼó kúni̱ keʼé iin veʼe, á su̱ví siʼna távándó kuenta á nani xu̱ʼúnndó saxinundóña?” (Lucas 14:28). Xíniñúʼu natúʼun xíʼin táʼanndó ndáa ki̱ʼva kuniñúʼundó xu̱ʼún (Amós 3:3). Natúʼun xíʼin táʼanndó ndáa ña̱ʼa satándó á kueendó ta nda̱saa xu̱ʼún kuniñúʼundó (Proverbios 31:16). Ni íyova xu̱ʼúnndó kǒo kúni̱ kachiña ña̱ satándo á kueendó ndiʼi ña̱ʼa ña̱ kúni̱víndó. Kuentaní koondó ña̱ va̱ʼa ná kǒo kunisakandó á kondikándó, xu̱ʼún ña̱ íyo nu̱úvandó tiinndó (Proverbios 21:5; 22:7).

ÑA̱ VA̱ʼA KEʼÉNDÓ:

• Tá ndíʼi iin iin yo̱o̱ ta ndóo loʼoka xu̱ʼúnndó, ka̱ʼa̱n xíʼin táʼanndó ndáa míí va̱ʼa kuniñúʼundóña

• Tá kǒo ku̱a̱ʼá xu̱ʼúnndó, vivií ka̱ʼa̱n xíʼin táʼanndó ña̱ loʼova ña̱ʼa satándó. Tá kúni̱ndó kuxundó, va̱ʼaka veʼendó kuxundó va̱ása kuxundó nu̱ú íxikonaña

2 MÍÍ ÑA̱ NDA̱A̱ KA̱ʼA̱NNDÓ

ÑA̱ KÁʼA̱N BIBLIA: “Su̱ví nu̱ú Jehová kuití kéʼéndi̱ [ña̱ va̱ʼa] nda̱a̱ nu̱ú na̱ yiví kéʼéndi̱ña” (2 Corintios 8:21). Ka̱ʼa̱n ña̱ nda̱a̱ xíʼin ñá síʼún á xíʼin yiíún nda̱saa xu̱ʼún cháʼvina yóʼó ta nda̱saaña tíún.

Ndáaka ña̱ʼa kúni̱ún kiʼún siʼnaka xíʼin ñá síʼún á xíʼin yiíún ka̱ʼún (Proverbios 13:10). Tá ná natúʼunndó xa̱ʼa ña̱yóʼo saá kúú ña̱ va̱ʼaka kundoondó. Kǒo ndakanixi̱níún ña̱ xu̱ʼún iinlá miíún kúúña chi xu̱ʼún u̱vi̱ saándó kúúña (1 Timoteo 5:8).

ÑA̱ VA̱ʼA KEʼÉNDÓ:

• Natúʼun xíʼin táʼanndó nda̱saa xu̱ʼún kivi kuniñúʼu iin iinndó

• Kǒo kundatundó nda̱a̱ tá kúma̱ní xu̱ʼún nu̱úndó saáví natúʼunndó xa̱ʼaña