PREGUNTA 9

¿Á xíniñúʼu kandíxai̱ ña̱ evolución?

NDA̱CHUN NDÁYÁʼVINÍÑA

Tá ña̱ ndixa kúú ña̱ káʼa̱nna xa̱ʼa̱ ña̱ evolución, na̱ yiví loʼo kuitíva ku̱i̱ya̱ ndátuna kutakuna. Soo ¿á xa̱ʼa̱ ña̱kán na̱kuva̱ʼayó? ¿Ndáa xa̱ʼa̱ kúú ña̱ tákuyó? Ña̱yóʼo kivi kunda̱a̱-iniyó xa̱ʼa̱ña tá íyo iin na̱ i̱xava̱ʼa miíyó.

¿NDÁAÑA KEʼÚN?

Ndakanixi̱ní xa̱ʼa̱ ña̱yóʼo: Ta̱ Alex ni kǒo xíni̱kara ndáaña ndakanixi̱níra. Nani tá loʼovíra kándíxara ña̱ mií Ndióxi̱ kúú ta̱ i̱xava̱ʼa ndiʼi ña̱ʼa. Soo vitin, ta̱ sánáʼa̱ miíra xa̱ʼa̱ ña̱ Biología káʼa̱nra ña̱ na̱ científico káʼa̱nna ña̱ ndixa kúú ña̱ evolución. Xa̱ʼa̱ ña̱ kǒo kúni̱ra kindo̱ora táki̱ʼva íyo iin ta̱ kíʼvi, ndákanixi̱níra ña̱yóʼo: “Tá mií na̱ científico káʼa̱nna ña̱ ndixa kúú ña̱ evolución, ¿nda̱chun ka̱ʼi̱n ña̱ kúúna na̱ vatá?”.

Tá miíún kúú ta̱ Alex, ¿á kandíxaún ña̱ evolución xa̱ʼa̱ ña̱ káʼa̱n kuití libro ña̱ ndixa kúúña?

NDAKANIXI̱NÍ XA̱ʼA̱ ÑA̱YÓʼO

Íyo ku̱a̱ʼání na̱ yiví na̱ va̱ása ndákanixi̱ní xa̱ʼa̱ ña̱ ndakuiinna ta káʼa̱nna ña̱ kándíxana ña̱ evolución á ña̱ íyo iin na̱ i̱xava̱ʼa miíyó, soo va̱ása kúchiñuna ka̱ʼa̱nna nda̱chun ndákanixi̱nína saá.

Savana kándíxana ña̱ íyo iin na̱ i̱xava̱ʼa miíyó saáchi saá kúú ña̱ sánáʼa̱nana ti̱xin veʼe-ñu̱ʼu.
Inkatuna kándíxana ña̱ evolución saáchi ña̱kán kúú ña̱ sa̱kuaʼana escuela.

I̱ÑU̱ PREGUNTA ÑA̱ XÍNIÑÚʼU NDA̱KA̱TU̱ʼÚN MIÍÚN

Hebreos 3:4 káchiña: “Ndiʼi veʼe íyo iin na̱ íxava̱ʼaña, soo ta̱ i̱xava̱ʼa ndiʼi ña̱ʼa kúú Ndióxi̱”. ¿Á ña̱ ndixa kúú ña̱ káʼa̱n Biblia túviún?

Iin ta̱ loʼo xítora iin veʼe — Tá káʼa̱nyó ña̱ kǒo ni iinna ní ixava̱ʼa miíyó nda̱a̱ táki̱ʼva íyo ña̱ ka̱ʼa̱nyó ña̱ ku̱va̱ʼa mií iin veʼe saá íyoña.

ÑA̱ KÁʼA̱NNA: Ndiʼi ña̱ʼa ña̱ íyo ka̱na miíña tá ndeéní ni̱ka̱ʼndi iin ña̱ʼa, ña̱yóʼo káʼa̱nna xíʼinña Big Bang.

1. ¿Míí ka̱na xa̱ʼa̱ ña̱ Big Bang á ndáana ke̱ʼéña?

2. ¿Ndáaña kúú ña̱ va̱ʼaka kandíxayó? ¿Ña̱ iin kama kuití ka̱na ndiʼi ña̱ʼa á ña̱ íyo iin na̱ i̱xava̱ʼaña?

ÑA̱ KÁʼA̱NNA: Ti̱xin kití va̱xi miíyó na̱ yiví.

3. Tá ti̱xin kití va̱xiyó, tá kúú tí mono, ¿nda̱chun ndíchiníka miíyó nu̱ú tíyóʼo?

4. ¿Nda̱chun nda̱a̱ sava ña̱ʼa válí ña̱ “va̱ása ndáyáʼvi” ndíchiní na̱kuva̱ʼaña?

ÑA̱ KÁʼA̱NNA: Ña̱ evolución íyo na̱ káʼa̱n xa̱ʼa̱ña ña̱ ndixa ku̱uña.

5. ¿Á xa̱a̱ ni̱xa̱ʼa̱n mií na̱ yiví na̱ káʼa̱n xa̱ʼa̱ ña̱yóʼo na̱ndukúna xa̱ʼa̱ña?

6. ¿Nda̱saa na̱ yiví kándíxa ña̱ evolución xa̱ʼa̱ ña̱ káʼa̱n kuitína xíʼinna ña̱ na̱ yiví na̱ xíni̱ní kúú na̱ kándíxa ña̱yóʼo?

“Ndakanixi̱ní ña̱ xíkaún ku̱a̱ʼún chí yukú ta xáún nu̱ú níndichi iin veʼe ña̱ ku̱va̱ʼa xíʼin yitu̱n. ¿Á ndakanixi̱níún ña̱ ni̱ko̱yo sava yitu̱n ta na̱kuva̱ʼa mií veʼe kán? Sana va̱ása ndakanixi̱níún ña̱yóʼo. ¿Nda̱chun ndakanixi̱níyó ña̱ na̱kuva̱ʼa mií ndiʼi ña̱ xítoyó tá saá?” (Julia).

“Tá iinna ná ka̱ʼa̱nna xíʼún ña̱ ni̱ka̱ʼndi iin veʼe nu̱ú távána tutu, ta ni̱xi̱ta ndiʼi tinta, ta xa̱ʼa̱ ña̱kán na̱kuva̱ʼa mií iin diccionario, ¿á kandíxaún ña̱ ka̱ʼa̱nna saá xíʼún?” (Gwen).

¿NDÁA XA̱ʼA̱ KÚÚ ÑA̱ KIVI KANDÍXAI̱ NDIÓXI̱?

Tu̱ʼun Ndióxi̱ káʼa̱nña xíʼún ña̱ viíní ná kuniñúʼún ña̱ ndíchi kúúmiíún (Romanos 12:1). Ña̱yóʼo kúni̱ kachiña ña̱ va̱ása kandíxa kuitíún iin ña̱ʼa xa̱ʼa̱:

IIN ÑA̱ TÚVI KUITÍÚN: “Íyova iin na̱ káʼnuka túvii̱”.
ÑA̱ KÁNDÍXA INKANA: “Ku̱a̱ʼání na̱ yiví kándíxa Ndióxi̱”.
ÑA̱ KÚNI̱ INKANA KANDÍXAÚN: “Veʼi̱ káʼa̱nna xíʼi̱n ña̱ xíniñúʼu kandíxai̱ Ndióxi̱”.

Xíniñúʼu káxi va̱ʼa kunda̱a̱-iniún xa̱ʼa̱ ña̱ kándíxaún ta va̱ása kandíxa kuitíún iin ña̱ʼa xa̱ʼa̱ ña̱ káʼa̱n inkana xíʼún.

“Tá nátúʼun ta̱ maestro xíʼinndi̱ ndáa ki̱ʼva kúú ña̱ káchíñu ku̱ñuyó, saá kúú ña̱ kándíxakai̱ ña̱ íyo Ndióxi̱. Ni iin táʼví loʼo kuití kúúña túviyó á ña̱ va̱ása ndáyáʼviña, soo kúúmiíña iin chiñu. Sava ni loʼo kǒo kíʼinyó kuenta ndáaña kúú chí iniyó. Ndákanda̱ní-inii̱ xíʼin ña̱yóʼo” (Teresa).

“Tá xítoi̱ iin veʼe ña̱ káʼnuní, iin barco á iin carro, ndákanixi̱níi̱: ‘¿Ndáana ke̱ʼé ña̱yóʼo?ʼ. Tá kúú na̱ íxava̱ʼa iin carro, xíniñúʼu ndíchiní koona saáchi ku̱a̱ʼání ka̱a válí kúúmiínú, ta ndiʼi ña̱kán viíní xíniñúʼu kutáʼanña ña̱ va̱ʼa kachíñuña. Ña̱kán, tá iin carro íyo iin na̱ i̱xava̱ʼanú, saátu xíniñúʼu koo iin na̱ i̱xava̱ʼa miíyó” (Richard).

Ta̱ Anthony káchira: “Tá ku̱a̱ʼáka sa̱kuaʼi̱ xa̱ʼa̱ ña̱ ciencia, va̱ása níkandíxakai̱ ña̱ evolución”. Ni̱ka̱ʼa̱ntura ña̱ íxayo̱ʼvi̱kavaña xíʼinra ña̱ kandíxara ña̱ evolución nu̱úka ña̱ kandíxara Ndióxi̱”.

NDAKANIXI̱NÍ XA̱ʼA̱ ÑA̱YÓʼO

Ni xa̱a̱ ku̱a̱ʼání tiempo káʼvi na̱ científico xa̱ʼa̱ ña̱ evolución, soo ni saá va̱ása inkáchi ndákanixi̱ní xa̱ʼa̱ña. Tá nda̱a̱ na̱kán va̱ása inkáchi íyo ña̱ káʼa̱nna xa̱ʼa̱ña, ta na̱kán kúú mií na̱ xíni̱ka, ¿á iin ku̱a̱chi kooña tá na̱ kaka-iniún xa̱ʼa̱ña?