U̱ni̱ tu̱ndóʼo

Na̱ ñuu Israel ndo̱ʼonína i̱xaa na̱ ñuu Egipto chi xi̱kachíñunína nu̱úna. Jehová chi̱ndaʼára ta̱ Moisés xíʼin ta̱ Aarón ña̱ ka̱ʼa̱nna xíʼin ta̱ faraón: “Taxi ná ku̱ʼu̱n na̱ ñui̱ ndasakáʼnuna yi̱ʼi̱ chí ñuʼú yi̱chí”. Xa̱ʼa ña̱ ni̱nuní ni̱xi̱yo ini ta̱ faraón ni̱ka̱ʼa̱nra: “Kǒo xa̱ʼa ña̱ káʼa̱n Jehová nu̱úi̱, va̱ása taxii̱ ku̱ʼu̱n na̱ ñuu Israel”. Xa̱ʼa ña̱yóʼo ku̱a̱ʼáka chiñu ta̱xira ndaʼa̱na. ¿Ndáaña ke̱ʼé Jehová xíʼin ta̱ faraón? Chi̱ndaʼára 10 tu̱ndóʼo nu̱úna. Jehová ni̱ka̱ʼa̱nra xíʼin ta̱ Moisés: “Ta̱ faraón kǒo xíniso̱ʼora ña̱ káʼi̱n. Ta̱an ku̱ʼu̱nra yu̱ta Nilo. Kúaʼan ta ka̱ʼún xíʼinra ña̱ nduu tá yu̱ta Nilo ni̱i̱ chi va̱ása xíínra taxira ku̱ʼu̱n na̱ ñui̱”. Ta̱ Moisés xi̱niso̱ʼora ta ni̱xa̱ʼa̱nra nu̱ú ta̱ faraón. Ta̱ faraón xi̱nira tá ka̱ni ta̱ Aarón varara nu̱ú yu̱ta Nilo ta ndu̱urá ni̱i̱. Ki̱xaʼá xáʼa̱n kininírá, ta va̱ása kívi koʼonará ta ni̱xi̱ʼi̱ ndiʼi ti̱a̱ká. Soo ta̱ faraón va̱ása nítaxira ku̱ʼu̱nna.

Tá ni̱ya̱ʼa u̱xa̱ ki̱vi̱, tuku chi̱ndaʼá Jehová ta̱ Moisés nu̱ú ta̱ faraón: “Tá kǒo táxiún ku̱ʼu̱n na̱ ñui̱, sakútui̱ ñuu Egipto xíʼin saʼva̱”. Kǒo níxiniso̱ʼo ta̱ faraón, ta xa̱ʼa ña̱yóʼo ta̱ Aarón nda̱niʼira tú varara ta ke̱e ku̱a̱ʼání saʼva̱. Ni̱ki̱ʼvirí veʼena, nu̱ú kísi̱na, ini koʼo̱ nu̱ú xíxina... iníísaá chu̱túrí. Soo ta̱ faraón ni̱ka̱ʼa̱nra: “Ka̱ʼa̱n xíʼin Jehová ná sakútaʼara tu̱ndóʼo yóʼo tasaá taxii̱ ku̱ʼu̱n na̱ ñuu Israel”. Tá sa̱kútaʼa Jehová tu̱ndóʼo nu̱úna, nda̱kaya̱na ku̱a̱ʼání saʼva̱ tí xa̱a̱ ni̱xi̱ʼi̱. Kinikaví xi̱xa̱ʼa̱n iníísaá ñuuna. Soo tuku, ta̱ faraón kǒo nítaxira ku̱ʼu̱n na̱ ñuu Israel.

Tándi̱ʼi Jehová ni̱ka̱ʼa̱nra xíʼin ta̱ Moisés: “Ná kani ta̱ Aarón nu̱ú ñuʼú xíʼin tú vara, ta ndakui̱ta yáká ta nduuña ti̱xe̱ʼe válí tí kue̱ʼe̱”. Tasaá ku̱u, ke̱e ku̱a̱ʼání ti̱xe̱ʼe válí nu̱ú ndiʼi na̱ ñuu, ta xi̱kanirí na̱ yiví. Sava na̱ ñuu Egipto ni̱ka̱ʼa̱nna xíʼin ta̱ faraón: “Ndióxi̱va chi̱ndaʼá tu̱ndóʼo yóʼo nu̱úyó”. Soo ni saá kǒo nítaxi ta̱ faraón ku̱ʼu̱n na̱ ñuu Israel.