Milagro ña̱ ku̱u chí mar Rojo

Tá na̱kunda̱a̱ ini ta̱ faraón ña̱ ke̱e na̱ ñuu Israel ñuu Egipto, ndi̱kóní-inira. Ni̱ka̱ʼa̱nra xíʼin na̱ káchíñu nu̱úra: “Tavándó ndiʼi carro tú xíka nu̱ú ku̱a̱chi, ta ná ku̱ʼu̱nyó sa̱tána. Nda̱chun ta̱xiyó ku̱a̱ʼa̱nna”. Tasaá ki̱tara xíʼin na̱ káchíñu nu̱úra ku̱a̱ʼa̱nna sa̱tá na̱ ñuu Israel.

Jehová xi̱niʼira yichi̱ nu̱úna xíʼin iin vi̱kó soo tá xa̱a̱ ku̱naa xi̱niʼira yichi̱ nu̱úna xíʼin ñuʼu̱. Iin saá nda̱a̱ tá ni̱xa̱a̱na nu̱ú mar rojo, takán xi̱kundoona.

Tándi̱ʼi na̱ ñuu Israel xi̱nina va̱xi ta̱ faraón sa̱tána xíʼin na̱ káchíñu nu̱úra. Kǒo nu̱ú ku̱ʼu̱nna chi iin táʼvi va̱xi na ñuu Egipto ta inka táʼvi ndíka̱a̱ mar. Ta ki̱xaʼána káʼa̱nna xíʼin ta̱ Moisés: “Kuvivayó. ¿Nda̱chun taváún ndi̱ʼi̱ ñuu Egipto?”. Soo ta̱ Moisés ni̱ka̱ʼa̱nra: “Va̱ása yi̱ʼvíndó. Kundatundó ta kunindó ndáa ki̱ʼva sakúka Jehová miíyó”. Ta̱ Moisés xi̱kandíxaníra Jehová.

Tándi̱ʼi, Jehová ni̱ka̱ʼa̱nra xíʼin na̱ ñuu Israel ná ndasaviína ña̱ʼana ña̱ ku̱ʼu̱nna. Mií ñu̱ú saá, Jehová chi̱ka̱a̱ra vi̱kó ma̱ʼñú na̱ ñuu Israel xíʼin na̱ ñuu Egipto. Nu̱ú va̱xi na̱ ñuu Egipto naá ni̱xi̱yo, soo nu̱ú ndóo na̱ ñuu Israel xi̱tuviva.

Ta ni̱ka̱ʼa̱n Jehová xíʼin ta̱ Moisés ña̱ ná ndaniʼira ndaʼa̱ra nu̱ú mar. Ta iníísaá ñu̱ú ndeéní ni̱xi̱ka ta̱chí. Tá mar yóʼo u̱vi̱ nda̱taʼvírá, ta ma̱ʼñú ni̱nuna iin yichi̱ nu̱ú ku̱ʼu̱nna. Ndiʼi na̱ ñuu Israel ni̱ya̱ʼana nu̱ú ñuʼú yi̱chí ta ni̱xa̱a̱na nda̱a̱ inka xiyo.

Na̱ va̱xi xíʼin ta̱ faraón xi̱kundiku̱nna sa̱tá na̱ ñuu Israel ta ni̱ki̱ʼvina ku̱a̱ʼa̱nna ma̱ʼñú tá mar. Soo Jehová, kǒo nítaxira, sa̱kóoyora llanta carrona. Ta ki̱xaʼá káʼa̱nna: “Va̱ʼaka ná ndikóyó, chi Jehová kúú ta̱ ndákiʼin tu̱ʼun na̱ ñuura”.

Jehová ni̱ka̱ʼa̱nra xíʼin ta̱ Moisés: “Ndaniʼi ndaʼún nu̱ú tá mar”. Tasaá ki̱xaʼá ni̱kooyo ti̱kui̱í sa̱tá ta̱ faraón xíʼin na̱ ku̱a̱ʼa̱n xíʼinra ta ni̱xi̱ʼi̱ ndiʼina. Ni iinna kǒo níka̱ku.

Chí inka xiyo tá mar, ndiʼi na̱ yiví xi̱tana iin yaa nu̱ú Jehová ña̱ nda̱sakáʼnunara: “Katai̱ nu̱ú Jehová chi nda̱sakáʼnura miíra ki̱vi̱ vitin. Chi chi̱ka̱a̱rana ini mar xíʼin kuáyi̱ sa̱na̱na”. Tá xítana, ná ñaʼá tíxaʼána ta sákaʼaná pandereta. Ndiʼina ni̱kusi̱í-inina chi vitin ni̱sa̱ña̱na.