Iin tabernáculo nu̱ú ndasakáʼnuna Ndióxi̱

Tá ndíka̱a̱ ta̱ Moisés chí yukú Sinaí, saá ni̱ka̱ʼa̱n Jehová xíʼinra ná keʼéra iin tabernáculo. Ña̱ tabernáculo yóʼo kúú iin veʼe nu̱ú ndasakáʼnu na̱ ñuu Israel Ndióxi̱. Ta va̱ʼatu ku̱ʼu̱nña xíʼinna nda̱a̱ ndáaka nu̱ú ku̱ʼu̱nna.

Jehová ni̱ka̱ʼa̱nra: “Ka̱ʼa̱n xíʼin na̱ ñuu Israel ná so̱kóna ña̱ʼa ña̱ kúúmiína ña̱ va̱ʼa keʼéndó tabernáculo”. Tasaá ndiʼi na̱ ñuu Israel ki̱xaʼána táxina oro, plata, cobre, yu̱u̱ livi. Ta̱xituna lana, lino, ñiín sa̱tá kití xíʼin inkaka ña̱ʼa. Va̱ʼaní ni̱xi̱yo inina chi ku̱a̱ʼání ña̱ʼa ta̱xina, ña̱kán ni̱ka̱ʼa̱n ta̱ Moisés xíʼinna: “Xa̱a̱ nani ña̱yóʼova, va̱ása taxikandóña”.

Ku̱a̱ʼání ta̱a xíʼin ñaʼá ka̱chíñuna ña̱ va̱ʼa na̱kuva̱ʼa tabernáculo yóʼo. Mií Jehová ta̱xi ña̱ ndíchi xi̱nína ña̱ va̱ʼa ke̱ʼénaña. Savana xi̱tavá yi̱ʼva ta xi̱kikuna. Savatuna xi̱ndasavií oro, xi̱taʼvína yu̱u̱ ta savana xi̱xiniñúʼuna yitu̱n ña̱ va̱ʼa xi̱keʼéna sava ña̱ʼa.

Na̱ ñuu yóʼo ke̱ʼéna tabernáculo nda̱a̱ táki̱ʼva ni̱ka̱ʼa̱n Jehová xíʼinna. Livikaví i̱xava̱ʼana iin ti̱ko̱to̱ ña̱ xi̱tikaa iniña tasaá ndu̱uña u̱vi̱ cuarto, iinña xi̱naní santo ta inkaña santísimo. Ini ña̱ santísimo xi̱ndika̱a̱ tú arca ña̱ pacto tú na̱kuva̱ʼa xíʼin yitu̱n ta saátu xíʼin oro, ta xi̱nanínú arca ña̱ pacto, ta ini ña̱ xi̱naní santo ni̱xi̱yo iin candelabro ña̱ oro, iin mesa xíʼin iin altar nu̱ú xi̱chiʼmána. Chí yéʼé ke̱ʼe ni̱xi̱yo iin xikóʼo ña̱ cobre xíʼin iin altar. Tá xi̱xini na̱ ñuu Israel tú arca yóʼo xi̱ndakaʼána xa̱ʼa ña̱ ki̱ndoona keʼéna nu̱ú Jehová. ¿Á xíni̱ún yukú iin pacto? Ña̱yóʼo kúú iin ña̱ kíndo̱oyó keʼéyó.

Jehová nda̱ka̱xinra ta̱ Aarón xíʼin na̱ se̱ʼera ña̱ kuuna su̱tu̱ ta kachíñuna ini tabernáculo yóʼo. Xíniñúʼu kundaanaña ta keʼéna ofrenda nu̱ú Jehová. Iinlá ta̱ Aarón kúú ta̱ xíniñúʼu ki̱ʼvi ini ña̱ xi̱naní santísimo chi su̱tu̱ káʼnu xi̱kuura. Iin yichi̱ nu̱ú ku̱i̱ya̱ xi̱kiʼvira ña̱ va̱ʼa xi̱taxira ña̱ʼa ndaʼa̱ Jehová xa̱ʼa ku̱a̱chira, xa̱ʼa ku̱a̱chi na̱ veʼera ta saátu xa̱ʼa ku̱a̱chi na̱ ñuu Israel.

Xa̱a̱ iin ku̱i̱ya̱ ni̱ya̱ʼa ta vitinví sa̱ndíʼi na̱ ñuu Israel ke̱ʼéna tabernáculo. Vitin xa̱a̱ íyo iin veʼe nu̱ú ndasakáʼnunna Ndióxi̱.

Jehová chi̱núura iin vi̱kó sa̱tá ña̱ tabernáculo yóʼo ta chi̱ka̱a̱ra bendición sa̱táña. Xíʼin ña̱yóʼo ni̱na̱ʼa̱ra ña̱ ni̱kusi̱íní-inira. Ta ndiʼi na̱ ñuu Israel xi̱ndiku̱nna vi̱kó yóʼo nda̱a̱ ndáaka nu̱ú ku̱a̱ʼa̱nña. Xi̱xanina tabernáculo ña̱ va̱ʼa ku̱ʼu̱nna sa̱táña.