Kǒo ní ixato̱ʼóna Jehová

Xa̱a̱ ni̱ya̱ʼa tiempo ña̱ ndóo na̱ ñuu Israel nu̱ú ñuʼú yi̱chí, ta̱ Coré ta̱ Datán, ta̱ Abiram xíʼin inkaka 250 ta̱a kǒo íxato̱ʼóna ta̱ Moisés. Ni̱ka̱ʼa̱nna xíʼinra: “Va̱ása kándíxakandi̱ ndóʼó. ¿Nda̱chun iinlá yóʼó kúú ta̱ níʼi yichi̱ nu̱úndi̱? ¿Ta nda̱chun kúú ta̱ Aarón ta̱ su̱tu̱ káʼnu? Su̱ví iinlá yóʼó xíʼin ta̱ Aarón nda̱ka̱xin Jehová, kivi ndaka̱xintura ndi̱ʼi̱va”. Va̱ása níkutóo Jehová ña̱ ni̱ka̱ʼa̱n na̱yóʼo. Nu̱ú Jehová kǒo ní ixato̱ʼónara.

Ta̱ Moisés ni̱ka̱ʼa̱nra xíʼin ta̱ Coré xíʼin na̱ kítáʼan xíʼinra: “Xi̱ta̱an kixindó nu̱ú tabernáculo ta kuniʼindó ka̱a ña̱ chíʼmándó. Jehová na̱ʼa̱ nu̱úyó yukú na̱ nda̱ka̱xinra”.

Ta̱ Coré xíʼin na̱ 250 ta̱a ku̱a̱ʼa̱nna nu̱ú tabernáculo. Kán ki̱xaʼána chíʼmána nda̱a̱ táki̱ʼva kéʼé na̱ su̱tu̱. Jehová ni̱ka̱ʼa̱nra xíʼin ta̱ Moisés xíʼin ta̱ Aarón: “Kǒo kunditandó xíʼin ta̱ Coré xíʼin na̱ kítáʼan xíʼinra”.

Ta̱ Coré ni̱xa̱a̱ra nu̱ú tabernáculo nu̱ú ndíka̱a̱ ta̱ Moisés, soo ta̱ Datán, ta̱ Abiram xíʼin na̱ veʼena kǒo níxa̱a̱na. Jehová ni̱ka̱ʼa̱nra xíʼin na̱ ñuu Israel: “Kǒo kunditandó nu̱ú íyo veʼe ta̱ Coré, ta̱ Datán xíʼin ta̱ Abiram”. Na̱ ñuu Israel kama ku̱xíkana. Ta̱ Datán ta̱ Abiram xíʼin na̱ veʼera xi̱kundichina chí ke̱ʼe. Iin kama ni̱ndatá ñuʼú ta ko̱kóña na̱ kǒo ní ixato̱ʼó Jehová. Nu̱ú íyo tabernáculo, Jehová chi̱ndaʼára ñuʼu̱ ta sa̱ndíʼi-xa̱ʼaña ta̱ Coré xíʼin na̱ 250 ta̱a.

Tándi̱ʼi Jehová ni̱ka̱ʼa̱nra xíʼin ta̱ Moisés: “Ndiʼi na̱ xáʼndachíñu nu̱ú iin iin tribu ná kixi varana xíʼinna. Kaʼyíún ki̱vi̱na sa̱tánú. Soo nu̱ú na̱ veʼe ta̱ Leví, kaʼyíún ki̱vi̱ ta̱ Aarón. Taúnnú ini tabernáculo. Tú ndaka̱xii̱n, kana yita ndaʼa̱nú”.

Inka ki̱vi̱, ta̱vá ta̱ Moisés ndiʼi tú vara ta ni̱na̱ʼa̱ranú nu̱ú na̱yóʼo. Tú vara ta̱ Aarón ka̱na yita xíʼin ku̱i̱ʼi ndaʼa̱nú. Xíʼin ña̱yóʼo ni̱na̱ʼa̱ Jehová ña̱ nda̱ka̱xinra ta̱ Aarón ña̱ koora su̱tu̱ káʼnu.