U̱vi̱ ná ñaʼá xíʼin iin ta̱a ta̱ ndakú-ini

Ku̱a̱ʼání ku̱i̱ya̱ xa̱ʼndachíñu ta̱ Josué ñuu Israel ta ni̱xi̱ʼi̱ra tá ndíka̱a̱ra 110 ku̱i̱ya̱. Tá xi̱takura na̱ ñuu Israel xi̱ndasakáʼnuna Jehová, soo tá ni̱xi̱ʼi̱ra ki̱xaʼána ndásakáʼnuna ndióxi̱ vatá nda̱a̱ táki̱ʼva xi̱keʼé na̱ ñuu Canaán. Xa̱ʼa ña̱ kǒo níkandíxakana Jehová ta̱xira ña̱ xoʼvi̱na ixaa ta̱ Jabín rey ñuu Canaán. Tasaá ki̱xaʼána káʼa̱nna xíʼin Jehová ná chindeérana. Xa̱ʼa ña̱yóʼo Jehová nda̱ka̱xinra ta̱ Barac ña̱ chindeérana ta ndikóna ndasakáʼnu tukunara.

Iin ñá profeta ñá xi̱naní Débora ka̱nañá ta̱ Barac ña̱ natúʼunñá xíʼinra ña̱ ni̱ka̱ʼa̱n Jehová, ta ni̱ka̱ʼa̱nñá: “Kúaʼan chí yu̱ta Cisón ta ná ku̱ʼu̱n 10,000 na̱ ta̱a xíʼún ña̱ va̱ʼa kanitáʼún xíʼin na̱ soldado ta̱ Jabín, ta kán sandiʼi-xa̱ʼún ta̱ Sísara ta̱ xáʼndachíñu nu̱ú na̱ soldado”. Tasaá ni̱ka̱ʼa̱n ta̱ Barac: “Ku̱ʼi̱n tá ná ku̱ʼún xíʼi̱n”. Xa̱ʼa ña̱yóʼo ni̱ka̱ʼa̱n ñá Débora: “Ku̱ʼu̱nvai̱ xíʼún, soo xíniñúʼu kunda̱a̱-iniún su̱ví yóʼó kúú ta̱ kaʼní ta̱ Sísara. Saáchi Jehová ni̱ka̱ʼa̱nra iin ñaʼá kúú ñá kaʼní ta̱yóʼo”.

Ñá Débora ke̱eñá ku̱a̱ʼa̱nñá chí yuku̱ Tabor saátu ta̱ Barac xíʼin na̱ soldado na̱ kítáʼan xíʼinra. Tá na̱kunda̱a̱-ini ta̱ Sísara, nda̱kayara carro tú guerra xíʼin na̱ soldado ña̱ ku̱ʼu̱nna kanitáʼanna. Ta ñá Débora ni̱ka̱ʼa̱nñá xíʼin ta̱ Barac: “Vitin kúú ña̱ chindeé Jehová yóʼó ña̱ sandiʼi-xa̱ʼúnna”. Tasaá ta̱ Barac xíʼin 10,000 saá na̱ kítáʼan xíʼinra ki̱xaʼána kánitáʼanna xíʼin ta̱ Sísara.

Tándi̱ʼi, Jehová xu̱nára yu̱ta Cisón ta nu̱urá nda̱a̱ nu̱ú kánitáʼanna, ta ni̱ti̱in ndiʼi carro ta̱ Sísara xíʼin nda̱ʼyi̱. Saá nu̱u ta̱ Sísara sa̱tá carrora ta xi̱nura. Ta̱ Barac xíʼin na̱ soldadora na̱kuchiñuvana xíʼin na̱ soldado ta Sísara soo ta̱yóʼo xi̱nura ku̱a̱ʼa̱nra ta chi̱se̱ʼéra miíra veʼe iin ñaʼá ñá naní Jael. Ñáyóʼo ta̱xiñá loʼo leche xi̱ʼira ta chi̱núuñá iin ti̱ko̱to̱ sa̱tára. Xa̱ʼa ña̱ ku̱naaníra ta̱ Sísara ni̱ki̱si̱ra. Ta saá ñá Jael ki̱ʼinñá iin yitu̱n xi̱ín nu̱ú, ta xíʼin túyóʼo xa̱ʼníñára.

Tándi̱ʼi saá ni̱xa̱a̱ ta̱ Barac nándukúra ta̱ Sísara. Ñá Jael ki̱tañá ta ni̱ka̱ʼa̱nñá: “Ki̱ʼvi ini veʼe ta ná na̱ʼi̱ nu̱ún ta̱a ta̱ nándukún”. Ta̱ Barac ni̱ki̱ʼvira ini veʼeñá ta xi̱nira ni̱xi̱ʼi̱ ta̱ Sísara. Tasaá ta̱ Barac xíʼin ñá Débora xi̱tana iin yaa nu̱ú Jehová chi na̱kuchiñuna xíʼin na̱ sáa̱-ini xíniñaʼá. Ta ki̱ʼva 40 ku̱i̱ya̱ va̱ʼa xi̱ndoo na̱ ñuu Israel.