Ta̱ Gedeón na̱kuchiñura xíʼin na̱ ñuu Madián

Ni̱ya̱ʼa tiempo, na̱ ñuu Israel ki̱xaʼá ndásakáʼnuna ndióxi̱ vatá ta sa̱ndákoona Jehová. Xa̱a̱ u̱xa̱ ku̱i̱ya̱ íxakui̱ʼná na̱ ñuu Madían kití sa̱na̱na ta sándiʼi-xa̱ʼana ña̱ chíʼina. Ña̱ va̱ʼa kǒo ña̱ ndoʼona chíse̱ʼéna miína ini kavá á chí yuku̱. Saáví kúú ña̱ ni̱ka̱ʼa̱nna xíʼin Jehová ña̱ ná chindeérana. Ña̱kán chi̱ndaʼára iin ángel ña̱ ka̱ʼa̱nra xíʼin ta̱ Gedeón: “Jehová nda̱ka̱xin yóʼó ña̱ ku̱ʼún kanitáʼún”. Soo ta̱ Gedeón ni̱ka̱ʼa̱nra: “¿Ndáa ta̱a kúi̱ ña̱ va̱ʼa saka̱kui̱ na̱ ñuu Israel?”.

Ta̱ Gedeón kúni̱ra kunda̱a̱-inira á ndixa Jehová nda̱ka̱xinñaʼá. ¿Ndáaña ke̱ʼéra? Ki̱ʼinra yixí ndikachi ta chi̱ndúʼúraña nu̱ú ñuʼú ta ni̱ka̱ʼa̱nra xíʼin Jehová: “Tá ná ndaxi ña̱yóʼo xi̱ta̱an, soo yichi̱ nu̱ú ñuʼú, saá kunda̱a̱-inii̱ ña̱ nda̱ka̱xiún yi̱ʼi̱ ña̱ saka̱kui̱ na̱ ñuu Israel”. Tá ni̱tu̱vi, yixí yóʼo nda̱xivaña, soo ñuʼú yi̱chívaña. Saá ni̱ka̱ʼa̱n ta̱ Gedeón xíʼin Jehová ña̱ ná yi̱chi̱ ña̱yóʼo inka ki̱vi̱, ta ná ndaxi ñuʼú. Nda̱a̱ táki̱ʼva ni̱ka̱ʼa̱n ta̱ Gedeón saá ku̱u. Vitin kándíxa ta̱ Gedeón ña̱ ndixa Jehová nda̱ka̱xinñaʼá. Xa̱ʼa ña̱yóʼo sa̱ndátakara na̱ soldado ña̱ ku̱ʼu̱nna kanitáʼanna xíʼin na̱ ñuu Madián.

Jehová ni̱ka̱ʼa̱nra xíʼin ta̱ Gedeón: “Miíi̱ chindeé na̱ ñuu Israel ña̱ kanitáʼanna. Soo ku̱a̱ʼání kúú na̱ soldado ta sana ndakanixi̱nína ña̱ ndée miína kuniñúʼuna. Va̱ʼaka ka̱ʼa̱n xíʼin na̱ yíʼvi ná ndikóna veʼena”. Xa̱ʼa ña̱yóʼo 22,000 kúú na̱ ndi̱kó veʼena, ta nda̱a̱ 10,000 kúú na̱ ni̱ndo̱o. Ta ni̱ka̱ʼa̱n Jehová: “Ku̱a̱ʼákava kúúna. Kúaʼan xíʼinna yu̱ta ta ka̱ʼa̱n xíʼinna ná koʼona ti̱kui̱í. Na̱ xíʼi kuití ti̱kui̱í ta íyo tu̱ʼvana ña̱ xíʼinará, náyóʼo kúú na̱ ki̱ndoo xíʼún”. Ta 300 kuití kúú na̱ ni̱xi̱yo tu̱ʼva tá xi̱ʼina ti̱kui̱í. Soo Jehová ni̱ka̱ʼa̱nra na̱yóʼo kuchiñuna sandiʼi-xa̱ʼana 135,000 na̱ soldado ñuu Madián.

Ñu̱ú saá Jehová ni̱ka̱ʼa̱nra xíʼin ta̱ Gedeón: “Vitin kúúña xíniñúʼu kanitáʼanndó xíʼin na̱ ñuu Madián”. Ta̱ Gedeón ta̱xira ndiki̱ ndaʼa̱ na̱yóʼo xíʼin ki̱si ta ndíka̱a̱ iin yití iniña ta káchira xíʼinna: “Kotondó, nda̱a̱ táki̱ʼva kéʼíi̱ saá keʼéndó”. Ta̱ Gedeón ti̱vira ndiki̱, ta ta̱ʼvíra ki̱si ta sakánda̱a̱ra yití tú níʼira ta ka̱na kóʼóra: “Yuchu̱ Jehová xíʼin ta̱ Gedeón”. Saá ke̱ʼé 300 na̱ ta̱a yóʼo. Na̱ ñuu Madián ni̱yi̱ʼvínína ta ndáa xi̱nu miína xíkana. Ta xa̱ʼa ña̱yóʼo ki̱xaʼá xáʼní-táʼan miína. Tuku chi̱ndeé Jehová na̱ ñuura ña̱ kanitáʼanna xíʼin na̱ sáa̱-ini xíniñaʼá.