Jehová táxira ndée ndaʼa̱ ta̱ Sansón

Ku̱a̱ʼání na̱ ñuu Israel ndásakáʼnuna ndióxi̱ vatá. Xa̱ʼa ña̱yóʼo Jehová ta̱xira ña̱ kundi̱va̱ʼa na̱ ñuu Filistea xíʼinna. Soo íyo sava na̱ kúʼvi̱-ini xi̱ni Jehová ta kúú ta̱ Manóah. Ta̱yóʼo xíʼin ñá síʼíra kǒo se̱ʼena íyo. Ta iin ki̱vi̱, Jehová chi̱ndaʼára iin ta̱ ángel ña̱ ka̱ʼa̱nra xíʼin ñá síʼí ta̱ Manóah: “Koo iin se̱ʼún ta ta̱yóʼo kúú ta̱ saka̱ku na̱ ñuu Israel nu̱ú. Iin nazareo koora”. ¿Á xíniún ndáana xi̱kuu na̱ nazareo? Na̱yóʼo kúú na̱ xi̱ndasakáʼnu Jehová, ta kǒo nítaxira kaʼndana yixí xi̱nína.

Tá ni̱ya̱ʼa tiempo ka̱ku se̱ʼe ta̱ Manóah ta̱ xi̱naní Sansón. Tá xa̱ʼnura, Jehová ta̱xi ña̱ ndakúní koora. Xíʼin ndaʼa̱ra va̱ʼa xa̱ʼníra iin tí león. Iin ki̱vi̱ iinlá miíra na̱kuchiñu xa̱ʼní 30 na̱ ñuu Filistea. Xa̱ʼa ña̱yóʼo sáa̱ní-inina xíninara ta ndúkúna ndáa ki̱ʼva kaʼnínara. Iin ñu̱ú tá ni̱ki̱si̱ra ñuu Gaza ni̱xa̱ʼa̱nna xi̱kundoona yéʼé ñuu kán ña̱ kaʼnínara. Soo tá ma̱ʼñú ñu̱ú nda̱koora ta ni̱xa̱ʼa̱nra yéʼé ñuu kán ta ta̱vára yéʼé ña̱ ñuu kán ta ndísoraña ku̱a̱ʼa̱nra nda̱a̱ ni̱xa̱a̱ra xi̱ní iin yuku̱ ña̱ íyo yatin Hebrón.

Na̱ ñuu Filistea ni̱xa̱ʼa̱nna ni̱ka̱ʼa̱nna xíʼin ñá Dalila, ñá xi̱kutóo ta̱ Sansón ta ni̱ka̱ʼa̱nna xíʼinñá: “Ku̱a̱ʼání xu̱ʼún taxindi̱ ndaʼún tá ná nátúʼun xíʼinndi̱ nda̱chun ndakúní ta̱ Sansón. Chi kúni̱ndi̱ tiinndi̱ra ta chikaandi̱ra veʼeka̱a”. Ñá Dalila xi̱kuni̱ñá xu̱ʼún ta xa̱ʼa ña̱yóʼo ka̱ndíxañá. Tá xa̱ʼa ta̱ Sansón kǒo níka̱ʼa̱nra xíʼin ñá Dalila. Soo ki̱xaʼá tuku ta tuku ndáka̱tu̱ʼunñára ta va̱ʼaka ni̱ka̱ʼa̱nra xíʼinñá. Káchira: “Nda̱a̱ ni iin yichi̱ ta̱ʼán kaʼndana yixí xi̱níi̱ chi nazareo kúi̱. Tá ná kaʼndanaña ndiʼi ndeéi̱”. Va̱ása va̱ʼa ke̱ʼéra ña̱ na̱túʼunra ña̱yóʼo. ¿Á su̱ví saá túviún?

Kamaní ni̱ka̱ʼa̱n ñá Dalila xíʼin na̱ ñuu Filistea: “Xa̱a̱ xíni̱i̱ nda̱chun ndakúníra”. Sa̱kúsu̱nñára nu̱ú si̱ʼinñá tasaá ka̱nañá na̱ xa̱ʼnda yixí xi̱níra. Ta ni̱ka̱ʼa̱nñá: “Sansón xa̱a̱ ki̱xa̱a̱ na̱ ñuu Filistea”. Tá nda̱koo ta̱ Sansón, na̱kunda̱a̱-inira ña̱ kǒoka ndéera. Na̱ ñuu Filistea ti̱innara ku̱a̱ʼa̱n xíʼinna, ta ta̱vána u̱vi̱ saá nduchúnu̱úra ta chi̱ka̱a̱nara veʼeka̱a.

Iin ki̱vi̱, ku̱a̱ʼání na̱ ñuu Filistea nda̱kaya̱na ini veʼe-ñu̱ʼu ndióxi̱na Dagón. Ta káʼa̱nna: “Ta̱ Dagón ndióxi̱yó nda̱taxi ta̱ Sansón ndaʼa̱yó. Ta̱vándóra ná kusi̱kinda̱a̱yóra”. Ka̱nindichinara ma̱ʼñú u̱vi̱ saá nama̱ ta ki̱xaʼá kúsi̱kindaanara. Saá ndeé va̱ʼa ni̱ka̱ʼa̱n ta̱ Sansón: “Jehová, taxi tuku ndée ndaʼíi̱, ndáʼvii̱ ”. Xa̱a̱ xa̱ʼnu tuku yixí xi̱níra, chi̱ndaʼára u̱vi̱ saá nama̱ yóʼo xíʼin ndiʼi ndeéra. Tasaá veʼe yóʼo nda̱kavaña ta ni̱xi̱ʼi̱ ndiʼi na̱ ñúʼu iniña. Nda̱a̱ míi ta̱ Sansón ni̱xi̱ʼi̱.