Templo Jehová

Tá ki̱xaʼá xáʼndachíñu ta̱ Salomón nu̱ú na̱ ñuu Israel, Jehová ni̱ka̱ʼa̱nra xíʼinra: “¿Ndáaña kúni̱ún taxii̱ ndaʼún?”. Ta̱ Salomón nda̱kuiinra: “Ta̱ loʼova kúi̱ ta va̱ása xíni̱ ndáaña keʼíi̱. Ña̱ ndíchi taxiún ndaʼíi̱ ña̱ va̱ʼa kaʼndachíñui̱ nu̱ú na̱ ñuún”. Jehová nda̱kuiinra: “Xa̱ʼa ña̱ ndu̱kún ña̱ ndíchi nu̱úi̱, taxii̱ ña̱ ndíchiní koún nu̱ú na̱ yiví. Taxii̱ ña̱ ku̱i̱ká ndaʼún ta ku̱a̱ʼání ku̱i̱ya̱ taxii̱ koún ta ná kandíxaún yi̱ʼi̱”.

Ta̱ Salomón ki̱xaʼá íxava̱ʼara templo. Xi̱niñúʼura oro, plata, yitu̱n xíʼin yu̱u̱, mií ña̱ va̱ʼa. Ku̱a̱ʼání na̱ yiví na̱ xíni̱ va̱ʼa ka̱chíñu ña̱ ku̱va̱ʼaña. Tá ni̱ya̱ʼa u̱xa̱ ku̱i̱ya̱ saá ni̱xi̱nuña. Saá ki̱xa̱a̱ ki̱vi̱ ña̱ ndataxina templo yóʼo ndaʼa̱ Jehová, ta chi̱ndoona kití nu̱ú altar. Ta̱ Salomón xi̱kuxítíra nu̱ú altar ta ni̱ka̱ʼa̱nra xíʼin Jehová: “Táta Jehová, iin templo káʼnuka nu̱ú ña̱yóʼo, ña̱ livika nu̱ú ña̱yóʼo kúú ña̱ xíniñúʼu taxindi̱ ndaʼún. Soo káʼa̱nndi̱ ña̱ kiʼún ña̱ táxindi̱ ndaʼún ta kuniso̱ʼo loʼo ña̱ káʼa̱nndi̱”. ¿Á ni̱kutóo Jehová templo yóʼo? ¿Á xi̱niso̱ʼora ña̱ ni̱ka̱ʼa̱n ta̱ Salomón xíʼinra? Tándi̱ʼi ni̱ka̱ʼa̱n ta̱ Salomón xíʼin Ndióxi̱, ke̱e ñuʼu̱ chí ndiví ta xa̱ʼmiña ndiʼi ña̱ʼa ña̱ ndósó nu̱ú altar. Xíʼin ña̱yóʼo ni̱na̱ʼa̱ Jehová ña̱ kútóora templo yóʼo. Tá xi̱ni na̱ ñuu Israel ña̱yóʼo ni̱kusi̱íní-inina.

Ki̱xaʼá káʼa̱n va̱ʼanína xa̱ʼa ta̱ rey Salomón iníísaá ñuu Israel ta nda̱a̱ ñuu ña̱ íyo xíka, xa̱ʼa ña̱ ndíchiníra. Na̱ yiví xi̱kixina nu̱úra ña̱ chindeérana xíʼin tu̱ndóʼo ña̱ kúúmiína. Nda̱a̱ ñá reina ñá ñuu Seba ni̱xa̱ʼa̱nñá nu̱ú íyora ña̱ ku̱a̱ʼá ña̱ʼa nda̱ka̱tu̱ʼunñára tasaá kunda̱a̱-iniñá á ndixa ndíchiníra. Tá xi̱niso̱ʼoñá ña̱ nda̱kuiin ta̱ Salomón ni̱ka̱ʼa̱nñá: “Va̱ása kándíxai̱ ña̱ káʼa̱nna xa̱ʼún, soo vitin na̱kunda̱a̱-inii̱ ña̱ ndíchiníkavaún. Va̱ʼaní i̱xaa Ndióxi̱ Jehová xíʼún”. Na̱ ñuu Israel va̱ʼaní ndóona ta si̱íní ndóona. Soo ni̱ya̱ʼa tiempo na̱samavaña.