Jehová ta̱xira ndeé ndaʼa̱ ta̱ Elías

Ñá Jezabel na̱kunda̱a̱-iniñá xa̱ʼa ña̱ ndo̱ʼo na̱ profeta ña̱ Baal ta ni̱sa̱a̱níñá. Xa̱ʼa ña̱yóʼo chi̱ndaʼáñá tu̱ʼun ku̱a̱ʼa̱n nu̱ú ta̱ Elías: “Ta̱an kuviún ndáa tá ndo̱ʼo na̱ profeta ña̱ Baal”. Ta̱ Elías ni̱yi̱ʼvíníra ta xi̱nura ku̱a̱ʼa̱nra chí ñuʼú yi̱chí. Ta ni̱ka̱ʼa̱nra: “Jehová, va̱ása kúndeéka-inii̱. Va̱ʼaka ná kuvii̱”. Ta̱ Elías na̱kunaaníra ta ni̱ki̱si̱ra xa̱ʼa iin yitu̱n.

Soo iin ángel sa̱ndúkáxi-inira ta ni̱ka̱ʼa̱nra xíʼinra: “Ndako̱o kuxún”. Ta̱ Elías xi̱nira iin si̱táva̱ʼa nu̱ú yu̱u̱ xíʼin iin ki̱si loʼo nu̱ú ñúʼu ti̱kui̱í. Xi̱xira ta xi̱ʼira ti̱kui̱í ta tuku ni̱ki̱si̱ra. Soo ta̱ ángel tuku ni̱ka̱ʼa̱nra xíʼinra: “Kuxu saáchi xíniñúʼu ndakú koún chí káni̱ nu̱ú ku̱ʼún”. Tasaá xi̱xi ta̱ Elías. Ta ke̱era ku̱a̱ʼa̱nra ki̱ʼva 40 ki̱vi̱ ta 40 ñu̱ú ni̱xi̱kara nda̱a̱ ni̱xa̱a̱ra yuku̱ Horeb. Ta kán ni̱ki̱ʼvira ini iin kavá ta ni̱ki̱si̱ra. Saá ni̱ka̱ʼa̱n Jehová xíʼinra: “¿Ndáaña kéʼún ndíka̱ún yóʼo Elías?”. Ta̱ Elías nda̱kuiinra: “Na̱ ñuu Israel va̱ása kéʼéna ña̱ ni̱ka̱ʼa̱nna xíʼún. Sa̱ndíʼi-xa̱ʼana altar ta xa̱ʼnína na̱ kúú profetaún. Ta vitin nda̱a̱ yi̱ʼi̱ kúni̱na kaʼnína”.

Jehová ni̱ka̱ʼa̱nra xíʼin ta̱ Elías: “Kita ini kavá ta kundichi xa̱ʼa yuku̱ yóʼo”. Tasaá iin ndeéní ka̱ni ta̱chí ta ndeéní ni̱taan, tándi̱ʼi ni̱kooyo ñuʼu̱. Saá xi̱niso̱ʼo ta̱ Elías iin na̱ vitání káʼa̱n. Ta va̱ʼaka nda̱sira nu̱úra xíʼin ti̱ko̱to̱ra tá níndichira chí yéʼé kavá. Jehová ni̱nda̱ka̱tu̱ʼunrara nda̱chun xínura. Ta̱ Elías ka̱chira: “Si̱ín iinlá yi̱ʼi̱ kúú profeta ta̱ kúma̱ní kuvi”. Soo Jehová ni̱ka̱ʼa̱nra xíʼinra: “Va̱ása íyo iinlá miíún. Íyoka 7,000 na̱ yiví na̱ ndásakáʼnu yi̱ʼi̱. Kúaʼan ta ka̱ʼún xíʼin ta̱ Eliseo ña̱ kuura profeta tá ná kuviún”. Tasaá kama ni̱xa̱ʼa̱nra ke̱ʼéra ña̱ ni̱ka̱ʼa̱n Jehová xíʼinra. ¿Á saá chindeé Ndióxi̱ yóʼó tá xíniso̱ʼún ña̱ káʼa̱nra? Chindeévara yóʼó. Soo vitin ná kotoyó ndáaña ku̱u tá kǒo sa̱vi̱ níxi̱yo.