Jehová chi̱ndeéra ta̱ Jehosafat nu̱ú na̱ sáa̱-ini xíniñaʼá

Ta̱ Jehosafat xi̱kuura rey ñuu Judá ta sa̱ndiʼi-xa̱ʼa altar nu̱ú xi̱ndasakáʼnuna ña̱ Baal xíʼin ndiʼi na̱ ndióxi̱ vatá na̱ íyo ñuura. Xi̱kuni̱ra kunda̱a̱-ini ndiʼi na̱ yiví xa̱ʼa ley Ndióxi̱. Xa̱ʼa ña̱yóʼo chi̱ndaʼára na̱ príncipe xíʼin na̱ levita ña̱ sanáʼa̱na na̱ ñuu Judá xa̱ʼa ley Jehová.

Xa̱ʼa ña̱ chíndeé táʼan Jehová xíʼin na̱ ñuu Judá ku̱a̱ʼání na̱ ni̱yi̱ʼví kanitáʼan xíʼinna. Nda̱a̱ xi̱taxina ña̱ʼa ndaʼa̱ ta̱ Jehosafat. Soo na̱ ñuu Moab, na̱ ñuu Ammón xíʼin savaka na̱ ke̱e ñuu Seír nda̱kutáʼanna ña̱ kanitáʼanna xíʼin na̱ ñuu Judá. Xíni̱va ta̱ Jehosafat ña̱ xíniñúʼu chindeé táʼan Jehová xíʼinra. Xa̱ʼa ña̱yóʼo nda̱kayara na̱ ta̱a, ná si̱ʼí xíʼin na̱ va̱lí chí ñuu Jerusalén. Ta nu̱ú ndiʼina ni̱ka̱ʼa̱nra xíʼin Ndióxi̱: “Jehová tá ná kǒo chindeún ndi̱ʼi̱ va̱ása kuchiñundi̱. Ka̱ʼa̱n xíʼinndi̱ ndáaña xíniñúʼu keʼéndi̱”.

Jehová xi̱niso̱ʼora ña̱ ni̱ka̱ʼa̱n ta̱ Jehosafat ta nda̱kuiinra: “Kǒo yi̱ʼvíndó, yi̱ʼi̱ chindeé ndóʼó, kúaʼanndó keʼéndó chiñundó, ta kotondó ndáa ki̱ʼva sáka̱kui̱ ndóʼó”. ¿Ndáa ki̱ʼva saka̱ku Jehová miína?

Tá ni̱tu̱vi inka ki̱vi̱, ta̱ Jehosafat nda̱ka̱xinra na̱ kata yaa ta ni̱ka̱ʼa̱nra xíʼinna ná ku̱ʼu̱n siʼnana nu̱ú na̱ ku̱a̱ʼa̱n kanitáʼan. Ke̱ena chí ñuu Jerusalén ta ku̱a̱ʼa̱nna chí Tecoa nu̱ú kanitáʼanna.

Na̱ xíta yaa kúsi̱íní-inina ta ndeé va̱ʼa xítana nu̱ú Jehová ku̱a̱ʼa̱nna. Ta mií Jehová ka̱nitáʼan xa̱ʼana. Sa̱sánara xi̱ní na̱ ñuu Ammón xíʼin na̱ ñuu Moab ta ki̱xaʼána kánitáʼanna xíʼin táʼanna, ta ni̱xi̱ʼi̱ ndiʼina. Soo Jehová xi̱ndaara na̱ ñuu Judá, na̱ soldado xíʼin na̱ su̱tu̱. Ndiʼi na̱ ñuu na̱ íyo yatin na̱kunda̱a̱-inina xa̱ʼa ña̱ kéʼé Jehová ta na̱kunda̱a̱-inina ña̱ sáka̱kuvara na̱ ñuura. ¿Ndáaña íxaa Jehová ña̱ va̱ʼa sáka̱kura na̱ ñuura? Ku̱a̱ʼání ña̱ kéʼéra. Ta va̱ása xíniñúʼura chindeé táʼan na̱ yiví xíʼinra.