Na̱ soldado Jehová

Ta̱ Ben-Hadad rey ñuu Siria xi̱kanitáʼanníra xíʼin na̱ ñuu Israel. Soo ta̱ Eliseo nina xi̱ndatúʼunra xíʼin ta̱ rey ñuu Israel ña̱ chise̱ʼéra miíra. Xa̱ʼa ña̱yóʼo ta̱ Ben-Hadad kúni̱ra kiʼin kúiʼnára ta̱ Eliseo. Na̱kunda̱a̱-inira ña̱ íyora ñuu Dotán ta chi̱ndaʼára na̱ soldado ña̱ tiinnara.

Na̱ ñuu Siria ni̱xa̱a̱na ñuu Dotán tá xa̱a̱ ñu̱ú. Tá ni̱tu̱vi ta̱ kítáʼan xíʼin ta̱ Eliseo ki̱tara ta xi̱nira ku̱a̱ʼání na̱ soldado ni̱xa̱a̱. Xa̱ʼa ña̱yóʼo ni̱yi̱ʼvíníra ta káchira: “Eliseo, ¿ndáaña keʼéyó vitin?”. Ta̱ Eliseo nda̱kuiinra: “Ku̱a̱ʼáníka kúú na̱ kítáʼan xíʼin miíyó nu̱ú na̱ kítáʼan xíʼin ta̱ káa”. Tasaá Jehová chi̱ndeé táʼanra xíʼin ta̱ kítáʼan xíʼin ta̱ Eliseo ta xi̱nira chí sa̱ta ñuu kán ku̱a̱ʼání kuáyi̱ xíʼin carro tú kúúmií ñuʼu̱ xi̱nira.

Tá kúni̱ na̱ soldado tiinna ta̱ Eliseo, ta̱yóʼo ni̱ka̱ʼa̱nra xíʼin Ndióxi̱: “Jehová, keʼé ña̱ ma̱ní ndasi nu̱úna”. Ta na̱yóʼo kǒo níkunda̱a̱-inina ndáa mií ñúʼuna ni va̱ʼava xítona. Ta̱ Eliseo ni̱ka̱ʼa̱nra xíʼinna: “Su̱ví ñuu yóʼo kúúña. Kundiku̱nndó yi̱ʼi̱ ná ku̱ʼi̱n xíʼinndó ndáa nu̱ú íyo ta̱ nándukúndó”. Na̱yóʼo ndíku̱nna ta̱ Eliseo nda̱a̱ ni̱xa̱a̱na ñuu Samaria, nu̱ú íyo ta̱ rey na̱ ñuu Israel.

Nda̱a̱ vitinví na̱kunda̱a̱-ini na̱ ñuu Siria nu̱ú ni̱xa̱a̱na soo va̱ása níkivika kununa. Ta̱ rey na̱ ñuu Israel ni̱nda̱ka̱tu̱ʼunra ta̱ Eliseo: “¿Á kaʼníi̱na?”. Na̱ ñuu Siria xi̱kuni̱na kaʼnína ta̱ Eliseo, ¿á kúni̱ra kaʼnírana xa̱ʼa ña̱ ke̱ʼéna? Va̱ása. Ni̱ka̱ʼa̱nra xíʼin ta̱ rey: “Va̱ása kaʼníúnna. Taxi ña̱ kuxuna ta taxiún ná ku̱ʼu̱nna”. Tasaá ke̱ʼé ta̱ rey xíʼinna.