Ña̱ káʼa̱n xa̱ʼa asamblea yóʼo

REUNIÓN ÑA̱ KOO TI̱XIN ASAMBLEA YÓʼO

NA̱ KÚNI̱ KU̱ʼU̱N KACHIÑU BETEL. Ndiʼi na̱ xa̱a̱ nda̱kuchi ta kúúmiína nda̱a̱ 35 ku̱i̱ya̱ ta kúni̱na ku̱ʼu̱nna kachíñuna Betel va̱ʼa ku̱ʼu̱nna iin reunión ña̱ koo ki̱vi̱ sábado tá xi̱ku̱aá. Nu̱ú plataforma ka̱ʼa̱nna ndáa hora kooña ta mií kooña.

ESCUELA NU̱Ú SÁKUAʼANA NÁTÚʼUNNA XA̱ʼA NDIÓXI̱. Ndiʼi na̱ precursor na̱ kúúmií 23 nda̱a̱ 65 ku̱i̱ya̱ ta kúni̱na ku̱a̱ʼáka kachíñuna nu̱ú Ndióxi̱ kivi ku̱ʼu̱nna iin reunión ki̱vi̱ domingo tá xi̱ku̱aá ña̱ koo xíʼin ndiʼi na̱ kúni̱ ku̱ʼu̱n escuela yóʼo. Nu̱ú plataforma ka̱ʼa̱nna ndáa hora kooña ta mií kooña.

ÑA̱ KÁʼA̱N XA̱ʼA ASAMBLEA YÓʼO

NA̱ NDÁA. Na̱yóʼo íyona ña̱ chindeé táʼanna xíʼún. Kuniso̱ʼún ndiʼi ña̱ káʼa̱nna xíʼún xa̱ʼa nu̱ú kundichi carroún, nu̱ú kivi kakaún, ña̱ kasiún tayi̱ xa̱ʼa inkana xíʼin inkaka ña̱ʼa.

NA̱ NDAKUCHI. Tayi̱ tú íyo chí nu̱ú plataforma tú kundoo na̱ ndakuchi kúú tú yóʼo. Ndiʼi na̱ ndakuchi yóʼo xíniñúʼu xa̱a̱ kán kundoona tá kúma̱níka ki̱xaʼá discurso ña̱ ndakuchina tá xi̱ta̱an ña̱ ki̱vi̱ sábado. Xíniñúʼu kuniʼina iin toalla ku̱ʼu̱n xíʼinna, ta ti̱ko̱to̱ ña̱ kundixina tá ná ndakuchina vií xíniñúʼu kooña.

DONACIÓN. Ni̱xi̱yo ku̱a̱ʼání gasto ña̱ va̱ʼa koo tayi̱ kundooyó, ña̱ va̱ʼa koo sonido xíʼin video, saátu ni̱xi̱yoka gasto ña̱ va̱ʼa kundooyó asamblea yóʼo tasaá sakuaʼakayó xa̱ʼa Jehová. Xu̱ʼún ña̱ táxindó chíndeé táʼanña xíʼinndi̱ ña̱ chaʼvindi̱ gasto yóʼo. Ña̱ va̱ʼa taxindó xu̱ʼún, ini veʼe yóʼo íyo caja válí nu̱ú kivi taánndóña. Táxiníndi̱ tixaʼvi ndaʼa̱ndó xa̱ʼa ña̱ táanndó xu̱ʼún ini caja yóʼo. Na̱ Cuerpo Gobernante táxina tixaʼvi ndaʼa̱ndó xa̱ʼa ña̱ ndíʼi̱-inindó xa̱ʼa chiñu Ndióxi̱.

TÁ NDEÉ NDÓʼONA. Káʼa̱nndi̱ xíʼún nda̱saa na̱ NDEÉNÍ NDÓʼO kúú na̱ va̱ʼa ku̱ʼu̱n yóʼo.

ÑA̱ʼA ÑA̱ NDA̱ÑÚʼÚ. Tá nda̱niʼún iin ña̱ʼa, kúaʼan nda̱kaña nu̱ú ndóo ña̱ʼa ña̱ nda̱ñúʼu yóʼo. Tá sa̱ndáñúʼún iin ña̱ʼa va̱ʼa ku̱ʼún nandukúnña yóʼo. Kuchiñutu ku̱ʼún ndakaún na̱ va̱lí na̱ nda̱ñúʼu. Soo su̱ví nu̱ú kundaana na̱ va̱lí kúú ña̱yóʼo. Ña̱kán kundaa va̱ʼún na̱ va̱lí se̱ʼún.

TAYI̱. Káʼa̱nndi̱ xíʼún ña̱ to̱ʼó ná koún xíʼin ndiʼi ña̱ kéʼún. Ndakaʼún, ña̱ va̱ása va̱ʼa kasiún ku̱a̱ʼá tayi̱, nda̱saa na̱ ku̱a̱ʼa̱n xíʼún xíʼin carro, á na̱ káʼviún Biblia xíʼin va̱ʼa kasiún tayi̱ koo. Va̱ása chindósoún ña̱ʼa nu̱ú tayi̱ tá va̱ása kuniñúʼúnnú.

NA̱ KÚNI̱ KACHÍÑU. Tá kúni̱ún tiún chiñu ti̱xin ña̱ asamblea yóʼo, kivi ku̱ʼún nu̱ú káʼa̱nña NA̱ KÚNI̱ KACHÍÑU.