Carta na̱ Cuerpo Gobernante

Ndiʼi na̱ kúʼvi̱-ini xíni Jehová xíʼin tu̱ʼunra ña̱ Biblia:

Ta̱ Jesús ni̱ka̱ʼa̱nra: “Kunda̱a̱-inindó xa̱ʼa̱ ña̱ nda̱a̱ ta ña̱yóʼo sañá ndóʼó” (Juan 8:32). Ndakaʼán ndáa ki̱ʼva ndo̱ʼún tá na̱kunda̱a̱-iniún xa̱ʼa̱ ña̱ nda̱a̱ ña̱ sánáʼa̱ ña̱ Biblia. Ni̱kusi̱íní-iniyó tá na̱kunda̱a̱-iniyó ña̱ kiviva sakuaʼayó ña̱ nda̱a̱ nu̱ú ñuyǐví yóʼo ni íyoní ña̱ vatá (2 Timoteo 3:1).

Jehová kúni̱ra ná kunda̱a̱-iniyó xa̱ʼa̱ ña̱ nda̱a̱, ta miíyó kúni̱yó ka̱ʼa̱nyó xa̱ʼa̱ña xíʼin inka na̱ yiví chi kúʼvi̱-iniyó xíniyóna. Soo íyo ku̱a̱ʼáka ña̱ʼa xíniñúʼu keʼéyó ña̱ va̱ʼa ndasakáʼnuyó Ndióxi̱. Xa̱ʼa̱ ña̱ íxato̱ʼóyó tu̱ʼun Ndióxi̱ xíniñúʼu chika̱a̱yó ndee̱ ña̱ keʼéyó ña̱ káʼa̱nña. Ta̱ Jesús ni̱ka̱ʼa̱nra ña̱ íyo iin ña̱ xíniñúʼu keʼéyó ña̱ va̱ʼa na̱ʼa̱yó ña̱ kúʼvi̱-iniyó xíniyó Jehová. Ka̱chira: “Tá ná keʼéndó ña̱ káʼi̱n xíʼinndó, va̱ása kuxíkandó nu̱úi̱, nda̱a̱ táki̱ʼva kéʼíi̱ ña̱ káʼa̱n yivái̱ ta va̱ása kúxíkai̱ nu̱úra” (Juan 15:10).

Ta̱ Jesús kúʼvi̱ní-inira xínira yivára ta kéʼéra ndiʼi ña̱ káʼa̱nra xíʼinra. Tá ná kundiku̱nyó yichi̱ ta̱ Jesús, Jehová kuʼvi̱-inira kunira miíyó ta si̱íní kundooyó. Táki̱ʼva ni̱ka̱ʼa̱n ta̱ Jesús: “Tá xíni̱ndó xa̱ʼa̱ ña̱yóʼo, si̱íní koondó tá ná keʼéndóña” (Juan 13:17).

Kúni̱ndi̱ ná chindeétáʼan libro yóʼo xíʼún ña̱ sakuaʼún keʼún ña̱ káʼa̱n Biblia ta xa̱ún koún migo Ndióxi̱. Káʼa̱nndi̱ xa̱ʼún xíʼin Ndióxi̱ ña̱ ná kǒo sandákoún ña̱ kuʼvi̱-iniún kuniúnra ta va̱ʼa xa̱ún kutakún ndiʼi tiempo (Judas 21).