LECCIÓN 51

¿Ndáa ki̱ʼva sakusi̱íyó-ini Jehová xíʼin ña̱ káʼa̱nyó?

Siaʼa ka̱naña nu̱ú tutu

Tá i̱xava̱ʼa Jehová miíyó, ta̱xira iin ña̱ ndáyáʼvi ndaʼa̱yó: Ña̱yóʼo kúú ña̱ kivi ka̱ʼa̱nyó. ¿Á ndíʼi-inira ndáa ki̱ʼva xíniñúʼuyó ña̱yóʼo? Ndíʼiva-inira xa̱ʼa̱ña (kaʼvi Santiago 1:26). Tá saá, ¿ndáa ki̱ʼva kuniñúʼuyó ña̱yóʼo ña̱ va̱ʼa sakusi̱íyó-ini Jehová?

1. ¿Ndáa ki̱ʼva kuniñúʼuyó ña̱ ta̱xi Jehová ndaʼa̱yó?

Tu̱ʼun Ndióxi̱ káchiña: “Ndakundeéndó sandíkondó-ini táʼanndó ta ndasandakúndó-ini táʼanndó” (1 Tesalonicenses 5:11). ¿Á íyo iin na̱ xíniñúʼu chika̱a̱yó ndee̱ xíʼin? ¿Ndáaña kivi keʼún ña̱ va̱ʼa chindeétáʼún xíʼinna ña̱ va̱ʼa kunina? Káxi ka̱ʼún xíʼin na̱ yiví kán ña̱ ndáyáʼvina nu̱ún. Kivi ka̱ʼún xa̱ʼa̱ ña̱ va̱ʼa kéʼéna. ¿Á xíni̱ún iin texto ña̱ va̱xi nu̱ú Biblia ña̱ kivi chindeétáʼan xíʼinna? Íyo ku̱a̱ʼáníva ña̱ kivi kuniñúʼún, ndakaʼún chi xíʼin ki̱ʼva ña̱ káʼún kivi chindeétáʼún xíʼin inkana. Xa̱ʼa̱ ña̱yóʼo, ndiʼi tiempo kúee koo iniún ka̱ʼún xíʼinna ta viíní ka̱ʼún xíʼinna (Proverbios 15:1).

2. ¿Ndáaña va̱ása xíniñúʼu ka̱ʼa̱nyó xa̱ʼa̱?

Ña̱ Biblia káchiña: “Kǒo ka̱ʼa̱nndó tu̱ʼun ña̱ va̱ása va̱ʼa” (kaʼvi Efesios 4:29). Ña̱yóʼo kúni̱ kachiña ña̱ kǒo ka̱ʼa̱nyó xa̱ʼa̱ ña̱ kini á ka̱ʼa̱nyó xa̱ʼa̱ ña̱ sáxo̱ʼvi̱-ini inkana á ña̱ sakúkaʼan nu̱úna. Xa̱ʼa̱ ña̱kán va̱ása káʼa̱nyó ña̱ vatá xa̱ʼa̱ inkana ta ni va̱ása káʼa̱nyó ña̱ síkí xa̱ʼa̱na (kaʼvi Proverbios 16:28).

3. ¿Ndáaña chindeétáʼan xíʼinyó ña̱ vií koo ña̱ ka̱ʼa̱nyó?

Ña̱ káʼa̱nyó náʼa̱ña ña̱ ndákanixi̱níyó ta saátu ndáa ki̱ʼva kúniyó (Lucas 6:45). Ña̱kán ná chika̱a̱yó ndee̱ ña̱ ndakanixi̱níyó xa̱ʼa̱ ña̱ va̱ʼa, ndiʼi ña̱ʼa ña̱ nda̱kú, ndiʼi ña̱ʼa ña̱ va̱ása yaku̱a̱, ndiʼi ña̱ʼa ña̱ chíka̱a̱-iniyó kuʼvi̱-iniyó kunitáʼanyó, ndiʼi ña̱ʼa ña̱ káʼa̱n va̱ʼana xa̱ʼa̱ (Filipenses 4:8). Ña̱ va̱ʼa keʼéyó ña̱yóʼo xíniñúʼu vií ndaka̱xinyó ña̱ kusíkíyó á ña̱ kotonde̱ʼéyó ta saátu na̱ koo migoyó (Proverbios 13:20). Ta saátu siʼnaka ná ndakanixi̱níyó xa̱ʼa̱ ña̱ ka̱ʼa̱nyó. Ndakanixi̱ní ndáaña kundoʼo inkana xíʼin ña̱ káʼún. Biblia káchiña: “Na̱ kǒo ndákanixi̱ní xíʼin ña̱ káʼa̱nna, ña̱yóʼo íyoña nda̱a̱ táki̱ʼva íyo ña̱ kanina iinna xíʼin espada, soo na̱ ndákanixi̱ní xíʼin ña̱ káʼa̱nna sándi̱kona-ini na̱ ndóʼo-ini” (Proverbios 12:18).

NÁ SAKUAʼAKAYÓ XA̱ʼA̱ÑA

Ná kotoyó ndáa ki̱ʼva sakusi̱íyó-ini Jehová xíʼin ña̱ ka̱ʼa̱nyó ta saátu chika̱a̱yó ndee̱ xíʼin inkana.

4. Kiʼinníún kuenta xíʼin ña̱ káʼún

Ndiʼivayó sava yichi̱ káʼa̱nyó iin ña̱ʼa soo tá ndi̱ʼi ndíkó-iniyó xa̱ʼa̱ña (Santiago 3:2). Kaʼvindó Gálatas 5:22, 23 ta ka̱ʼa̱nndó xa̱ʼa̱ ña̱yóʼo:

Ña̱ va̱ʼa kiʼún kuenta xíʼin ña̱ káʼún, ¿ndáaña káʼa̱n texto yóʼo xa̱ʼa̱ ndukún nu̱ú Jehová? ¿Ndáa ki̱ʼva chindeétáʼan ña̱yóʼo xíʼún?

Kaʼvindó 1 Corintios 15:33 ta ka̱ʼa̱nndó xa̱ʼa̱ ña̱yóʼo:

Na̱ migoyó, ña̱ xítoyó, ta saátu ña̱ sísikíyó, ¿á kivi nasamaña ki̱ʼva ña̱ káʼa̱nyó? ¿Ndáa ki̱ʼva kivi keʼéña ña̱yóʼo?

Na̱ʼná ña̱ náʼa̱ ña̱ kéʼé iin ta̱a ta xa̱ʼa̱ ña̱kán ndáʼyi̱ra nu̱ú ñá síʼira: 1. Xíniso̱ʼora yaa ña̱ kini káʼa̱n. 2. Xítora xíʼin ta̱ migora na̱ káni táʼan nu̱ú televisión. — ¿Ndáaña kivi nasama ki̱ʼva ña̱ káʼún?

Na̱ʼná ña̱ náʼa̱ ña̱ kéʼé iin ta̱a ta xa̱ʼa̱ ña̱kán vií káʼa̱nra xíʼin ñá síʼira: 1. Káʼvira Biblia. 2. Miíra xíʼin ñá síʼira nátúʼunna xíʼin iin ta̱ migona ti̱xin Salón ña̱ Reino. — ¿Ndáaña kivi nasama ki̱ʼva ña̱ káʼún?

Kaʼvindó Eclesiastés 3:1, 7 ta ka̱ʼa̱nndó xa̱ʼa̱ ña̱yóʼo:

¿Ama kúú ña̱ xíniñúʼu ka̱ʼa̱nyó ta ama kúú ña̱ va̱ása xíniñúʼu ka̱ʼa̱nyó xa̱ʼa̱ iin ña̱ʼa?

5. Vií ka̱ʼún xa̱ʼa̱ inkana

¿Ndáa ki̱ʼva vií va̱ʼa ka̱ʼa̱nyó tasaá va̱ása sáxo̱ʼvi̱yó-ini inkana? Kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: “Ná ka̱ʼa̱nyó tu̱ʼun ña̱ chika̱a̱ ndee̱ inkana” (4:07)

¿Nda̱chun xi̱kuni̱ ta̱ hermano ta̱ xi̱niyó nu̱ú video nasamara ki̱ʼva ña̱ xi̱ka̱ʼa̱nra xa̱ʼa̱ inkana?
¿Ndáa ki̱ʼva ke̱ʼéraña?

Kaʼvindó Eclesiastés 7:16 ta̱ ka̱ʼa̱nndó xa̱ʼa̱ ña̱yóʼo:

¿Ndáaña xíniñúʼu ndakaʼányó tá kúni̱yó ka̱ʼa̱nyó ña̱ va̱ása va̱ʼa xa̱ʼa̱ inkana?

Kaʼvindó Eclesiastés 7:21, 22 ta̱ ka̱ʼa̱nndó xa̱ʼa̱ ña̱yóʼo:

¿Á kivi chindeétáʼan versículo yóʼo xíʼún ña̱ sakuaʼún ka̱ʼnu̱-iniún tá inkana káʼa̱nna ña̱ va̱ása va̱ʼa xa̱ʼún? ¿Nda̱chun?

6. To̱ʼóní ka̱ʼún xíʼin na̱ veʼún

Jehová kúni̱ra ña̱ viíní ná ka̱ʼa̱nyó xíʼin na̱ veʼeyó ta va̱ʼa koo-iniyó xíʼinna. Kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: Tá kúʼvi̱-iniyó xíniyó na̱ veʼeyó ta íxato̱ʼóyóna va̱ʼaní kundooyó (3:08)

¿Ndáaña chindeétáʼan xíʼún ña̱ to̱ʼóní ka̱ʼún xíʼin na̱ veʼún?

Kaʼvindó Efesios 4:31, 32 ta ka̱ʼa̱nndó xa̱ʼa̱ ña̱yóʼo:

Tá vií káʼa̱nyó, ¿ndáa ki̱ʼva chindeétáʼan ña̱yóʼo xíʼinyó ña̱ vií kutáʼanyó xíʼin na̱ veʼeyó?

Jehová ni̱ka̱ʼa̱nra ña̱ kúʼvi̱-inira xínira se̱ʼera, ta̱ Jesús. Kaʼvindó Mateo 17:5 ta ka̱ʼa̱nndó xa̱ʼa̱ ña̱yóʼo:

¿Ndáa ki̱ʼva kundiku̱ún yichi̱ Jehová tá káʼún xíʼin na̱ veʼún?

Iin ñá íyo se̱ʼe viíní káʼa̱nñá xíʼin ñá loʼo se̱ʼeñá, xa̱ʼa̱ ña̱ sa̱nánañá. — Ndukú ki̱ʼva ña̱ ka̱ʼún xíʼin inkana xa̱ʼa̱ ña̱ va̱ʼa kéʼéna

ÑA̱ KÁʼA̱N SAVA NA̱ YIVÍ: “Yi̱ʼi̱ káʼi̱n ña̱ ndákanixi̱níi̱. Tá inkana va̱ása kútóonaña, ku̱a̱chi miívana kúúña”.

¿Á va̱ʼa ña̱ ndákanixi̱nína saá túviún? ¿Nda̱chun?

ÑA̱ XA̱A̱ SA̱KUAʼAYÓ

Ña̱ káʼa̱nyó kivi chindeétáʼanña xíʼin inkana á saxo̱ʼvi̱ñana. Xa̱ʼa̱ ña̱kán xíniñúʼu ndakanixi̱níyó ndáaña ka̱ʼa̱nyó xa̱ʼa̱, ama ka̱ʼa̱nyóña ta ndáa ki̱ʼva ka̱ʼa̱nyóña.