4 ¿Ndáaña xíniñúʼu ka̱ʼa̱nyó xa̱ʼa̱ tá kéʼéyó oración?

NU̱Ú ndiʼika oración ña̱ kéʼé na̱ yiví, iin ña̱ ku̱a̱ʼáníka yichi̱ káʼa̱nna kúú oración ña̱ sa̱náʼa̱ ta̱ Jesús: ña̱ padrenuestro. Ta saátu loʼovana kúnda̱a̱-ini ndáaña kúni̱ kachi ña̱yóʼo. Ku̱a̱ʼání na̱ yiví káʼa̱nna ña̱yóʼo ki̱vi̱ tá ki̱vi̱, ta savana ku̱a̱ʼání yichi̱ káʼa̱nnaña iin ki̱vi̱ ta ni kǒo ndákanixi̱nína ndáaña kúni̱ kachiña, soo ta̱ Jesús va̱ása níkuni̱ra ña̱ ná keʼéna saá. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo?

Saáchi tá kúma̱níka sanáʼa̱ra ña̱ oración yóʼo, ni̱ka̱ʼa̱nra ña̱yóʼo: “Tá ná ka̱ʼún xíʼin Ndióxi̱, kǒo ndikóún ka̱ʼún tu̱ʼun ña̱ xa̱a̱ ni̱ka̱ʼún” (Mateo 6:7). Ña̱kán, ta̱ Jesús va̱ása nísanáʼa̱ra iin oración ña̱ xíniñúʼu sakuaʼa xíʼin xi̱nína, ta tá ndiʼi tuku ta tuku ka̱ʼa̱nnaña. Saáchi ña̱ xi̱kuni̱ ta̱ Jesús sanáʼa̱ra kúú ndáaña kúú mií ña̱ ndáyáʼvivaka xíniñúʼu ka̱ʼa̱nna xa̱ʼa̱ tá kéʼéna oración. Xa̱ʼa̱ ña̱kán, ná ka̱ʼa̱nyó xa̱ʼa̱ oración ña̱ va̱xi nu̱ú Mateo 6:9-13.

“Yivándi̱ ta̱ íyo chí ndiví, ná nduyi̱i̱ ki̱vi̱ún”.

Ta̱ Jesús sa̱ndákaʼánra na̱ discípulora, ña̱ iinlá xíʼin yivára Jehová xíniñúʼu ka̱ʼa̱nna tá kéʼéna oración. Soo, ¿nda̱chun ni̱ka̱ʼa̱nra tándi̱ʼi ña̱ xíniñúʼu nduyi̱i̱ ki̱vi̱ yivára?

Saáchi nda̱a̱ tá ki̱xáʼa íyo na̱ yiví nu̱ú ñuʼú yóʼo, saáví ki̱xáʼana káʼa̱nna ña̱ vatá xa̱ʼa̱ ki̱vi̱ Ndióxi̱. Soo ta̱ Ndi̱va̱ʼa káʼa̱nra ña̱ iin ta̱ vatá kúú Jehová, ta iinlá xa̱ʼa̱ miíra ndíʼi̱-inira, ta ni kǒo derecho kúúmiíra ña̱ kaʼndachíñura nu̱ú na̱ i̱xava̱ʼara (Génesis 3:1-6). Ta na̱ kítáʼan xíʼin ta̱ Ndi̱va̱ʼa sánáʼa̱na ña̱ kǒo kúndáʼvi-ini Ndióxi̱ xínira na̱ yiví, ña̱ ndi̱va̱ʼaní-inira ta nda̱a̱ táxira tu̱ndóʼo ndaʼa̱na, ta saátu káʼa̱nna ña̱ su̱ví miíra kúú ta̱ ní ixava̱ʼa ndiʼi ña̱ʼa. Ta savana nda̱a̱ sa̱kútaʼana ki̱vi̱ Ndióxi̱ nu̱ú Biblia ta saátu káʼa̱nna ña̱ va̱ása va̱ʼa kuniñúʼuyó ki̱vi̱ra.

Soo ña̱ Biblia káʼa̱nña, ña̱ sandiʼi-xa̱ʼa̱ Ndióxi̱ ndiʼi ña̱yóʼo (Ezequiel 39:7). Tá ná keʼéra ña̱yóʼo ndasaviíra tu̱ndóʼo ña̱ kúúmií na̱ yiví. ¿Ndáa ki̱ʼva keʼéra ña̱yóʼo? Ña̱yóʼo kúú ña̱ ni̱ka̱ʼa̱nka ta̱ Jesús.

“Ná kixaa̱ ki̱vi̱ ña̱ kaʼndachíñún”.

Tiempo vitin, na̱ sánáʼa̱ ti̱xin veʼe-ñuʼú va̱ása kúnda̱a̱ káxi-inina ndáaña kúú Reino Ndióxi̱. Kǒo táʼan ña̱yóʼo níkuu tá tiempo ña̱ ni̱xi̱yo ta̱ Jesús. Na̱ Judío na̱ ni̱xi̱yo tá tiempo xi̱naʼá xi̱kunda̱a̱va-inina xa̱ʼa̱ profecía ña̱ xi̱ka̱ʼa̱n xa̱ʼa̱ ta̱ Mesías ta̱ nda̱kaxin Ndióxi̱ ña̱ saka̱kura na̱ yiví, ta kaʼndachíñura nu̱ú na̱ yiví ta nasamara ña̱ íyo nu̱ú ñuʼú yóʼo (Isaías 9:6, 7; Daniel 2:44). Tá ná kaʼndachíñu ta̱ Jesús saá kúú ña̱ nduyi̱i̱ ki̱vi̱ Jehová, tasaá na̱ʼa̱ra ña̱ iin ta̱ vatá kúú ta̱ Ndi̱va̱ʼa ta sandíʼi-xa̱ʼa̱ra ña̱ va̱ása va̱ʼa kéʼéra. Ta saátu sandíʼi-xa̱ʼa̱ra guerra, kue̱ʼe̱, so̱kó, xíʼin ña̱ xíʼi̱yó (Salmo 46:9; 72:12-16; Isaías 25:8; 33:24). Ña̱kán, tá káʼa̱nyó xíʼin Ndióxi̱ ña̱ ná kixaa̱ Reinora, káʼa̱nyó xíʼinra ña̱ ná saxínura ndiʼi ña̱ ni̱ka̱ʼa̱nra keʼéra.

“Ná koo ña̱ kúni̱ miíún, táki̱ʼva íyo chí ndiví, saá ná koo nu̱ú ñuʼú yóʼo”.

Ña̱ tu̱ʼun yóʼo náʼa̱ña nu̱úyó ña̱ xi̱nu ña̱ kúni̱ Ndióxi̱ koo nu̱ú ñuʼú yóʼo, nda̱a̱ táki̱ʼva xa̱a̱ ni̱xi̱nuña chí ndiví nu̱ú íyo Ndióxi̱, tá ka̱nitáʼan se̱ʼera xíʼin ta̱ Ndi̱va̱ʼa ta saátu xíʼin na̱ kítáʼan xíʼinra, ta chi̱ndaʼárana va̱xina nu̱ú ñuʼú yóʼo (Revelación [Apocalipsis] 12:9-12). Ña̱ ni̱ka̱ʼa̱nra yóʼo xíʼin u̱vi̱ ña̱ xa̱a̱ ni̱ka̱ʼa̱nyó xa̱ʼa̱, sándakaʼánña miíyó ña̱ ndáyáʼviní ña̱ ka̱ʼa̱nyó xa̱ʼa̱ ña̱ ná xi̱nu ña̱ kúni̱ Ndióxi̱ ta su̱ví ña̱ kúni̱ miíyó. Saáchi iin ña̱ ndáyáʼviníka kúú ña̱ ná xi̱nu ña̱ kúni̱ Ndióxi̱, chi ña̱yóʼo kúú ña̱ chindeétáʼan xíʼin ndiʼi na̱ i̱xava̱ʼara. Nda̱a̱ mií ta̱ Jesús ni̱ka̱ʼa̱n ña̱yóʼo ni kǒo ku̱a̱chi níxikuumiíra, ka̱chira: “Soo ná kǒo koo ña̱ kúni̱ yi̱ʼi̱ va̱ʼaka ná koo ña̱ kúni̱ miíún” (Lucas 22:42).

“Taxi ña̱ kuxundi̱ ki̱vi̱ vitin”.

Saátu ni̱ka̱ʼa̱n ta̱ Jesús ña̱ kivi ka̱ʼa̱nyó xíʼin Ndióxi̱ xa̱ʼa̱ sava ña̱ xíniñúʼu miíyó. Nda̱a̱ táki̱ʼva ku̱nda̱a̱-iniyó, iin ña̱ va̱ʼava kúú ña̱ ná ka̱ʼa̱nyó xíʼin Ndióxi̱ ña̱ ná chindeétáʼanra xíʼinyó xa̱ʼa̱ ña̱ xíniñúʼuyó ki̱vi̱ tá ki̱vi̱. Saáchi tá kéʼéyó ña̱yóʼo ndákuniyó ña̱ mií Jehová “kúú ta̱ táxi ña̱ táku na̱ yiví, táxira ta̱chí ndákiʼinna xíʼin ndiʼika ña̱ʼa” (Hechos 17:25). Ña̱ Biblia chítáʼanña Ndióxi̱ xíʼin iin ta̱a ta̱ íyo se̱ʼe ta̱ va̱ʼaní-ini, saáchi táxira ndiʼi ña̱ xíniñúʼu se̱ʼera. Ni ku̱a̱ʼání yichi̱ ndúkúyó iin ña̱ʼa nu̱úra, va̱ása taxira ña̱yóʼo ndaʼa̱yó tá kivi saxóʼvi̱ña miíyó.

“Koo káʼnu-iniún xa̱ʼa̱ ku̱a̱chindi̱”.

¿Ndáa ku̱a̱chi kúú ña̱ kúúmiíyó nu̱ú Jehová? Ta, ¿nda̱chun xíniñúʼuyó ña̱ ná ixakáʼnu-inira xa̱ʼa̱yó? Tiempo vitin, ku̱a̱ʼání na̱ yiví va̱ása kíʼinkana kuenta ña̱ kíʼvina ku̱a̱chi ndeé nu̱ú Ndióxi̱, soo nda̱a̱ táki̱ʼva káʼa̱n ña̱ Biblia, xa̱ʼa̱ ña̱ kúúyó na̱ yiví ku̱a̱chi kúú ña̱ íyoní tu̱ndóʼo nu̱úyó ta saátu ña̱ xíʼi̱yó. Soo nda̱a̱ tá kákuvíyó kúúyó na̱ yiví ku̱a̱chi, ña̱kán kéʼéyó ña̱ va̱ása va̱ʼa ta sáxo̱ʼvi̱yó Ndióxi̱. Xa̱ʼa̱ ña̱kán, tá kúni̱yó kooyó ndiʼi tiempo ndáyáʼviní ña̱ ná ixakáʼnu-ini Ndióxi̱ xa̱ʼa̱ ku̱a̱chiyó (Romanos 3:23; 5:12; 6:23). Ta saátu sándakaʼán ña̱ Biblia miíyó ña̱ va̱ʼaní-ini Jehová ta íyo tu̱ʼvara ña̱ ixakáʼnu-inira xa̱ʼa̱yó (Salmo 86:5).

“Sakǎku ndi̱ʼi̱ ndaʼa̱ ta̱ Ndi̱va̱ʼa”.

Miíyó na̱ yiví xíniñúʼuníyó ña̱ ná kundaa Ndióxi̱ miíyó. Sana ku̱a̱ʼání na̱ yiví va̱ása kándíxana ña̱ íyo ta̱ “Ndi̱va̱ʼa”, soo ta̱ Jesús ni̱ka̱ʼa̱nra ña̱ ndixava íyo ta̱yóʼo, ta saátu ni̱ka̱ʼa̱nra ña̱ kúúra “ta̱ xáʼndachíñu ñuyǐví yóʼo” (Juan 12:31; 16:11). Ta̱ Ndi̱va̱ʼa su̱ví kuití kúni̱ra kaʼndachíñura nu̱ú ñuyǐví yóʼo saátu kúni̱ra ña̱ ná kǒo kutáʼan viíyó xíʼin yiváyó Jehová (1 Pedro 5: 8). Ta va̱ása xíniñúʼu yi̱ʼvíyó kuniyó ta̱ Ndi̱va̱ʼa, saáchi Ndióxi̱ íyoníka ndee̱ra ta kúni̱ra kundaara na̱ kúʼvi̱-ini xíni miíra.

Ta saátu kivi ka̱ʼa̱nyó xíʼin Ndióxi̱ xa̱ʼa̱ inkaka ña̱ʼa, ta 1 Juan 5:14 káʼa̱nkaña xa̱ʼa̱ ña̱yóʼo, káchiña: “Nda̱a̱ ndáaka ña̱ʼa ná ndukúyó nu̱ú Ndióxi̱, tá kítáʼanña xíʼin ña̱ kúni̱ra, xíniso̱ʼovara ña̱ káʼa̱nyó xíʼinra”. Ta saátu kivi natúʼunyó xíʼin Ndióxi̱ xa̱ʼa̱ ndiʼi ña̱ sándi̱ʼi̱-iniyó saáchi kúnda̱a̱va-inira xíʼin ña̱ ndóʼoyó (1 Pedro 5:7).

Ta, ¿ndáaña kivi ka̱ʼa̱nyó xa̱ʼa̱, ama xíniñúʼu ka̱ʼa̱nyó xíʼinra ta ndáa míí ka̱ʼa̱nyó xíʼinra? ¿Á íyo ña̱ káʼa̱n tu̱ʼun Ndióxi̱ xa̱ʼa̱ ña̱yóʼo? Nu̱ú inka artículo kunda̱a̱-iniyó xa̱ʼa̱ ña̱yóʼo.