¿Nda̱chun ndáyáʼviní Reino Ndióxi̱ nu̱ú ta̱ Jesús?

Nda̱a̱ táki̱ʼva xi̱niyó nu̱ú artículo ña̱ ni̱ya̱ʼa, ta̱ Jesús xi̱niñúʼura ña̱ tákura ña̱ va̱ʼa “natúʼunra tu̱ʼun va̱ʼa xa̱ʼa̱ Reino Ndióxi̱” (Lucas 8:1). Chi̱ka̱a̱níra ndee̱, ta ni̱xi̱kara iníísaá chí Israel ña̱ na̱túʼunra xíʼin na̱ yiví xa̱ʼa̱ ña̱ kaʼndachíñu Ndióxi̱. Ta nu̱ú ku̱mí saá Evangelio nu̱ú va̱xi ña̱ káʼa̱n xa̱ʼa̱ ña̱ ke̱ʼéra, yáʼaka 100 yichi̱ ni̱ka̱ʼa̱n ta̱ Jesús xa̱ʼa̱ ña̱ Reino Ndióxi̱. Soo ku̱a̱ʼákava ña̱ʼa ni̱ka̱ʼa̱nra xa̱ʼa̱ ña̱yóʼo (Juan 21:25).

¿Nda̱chun ndáyáʼviní Reino Ndióxi̱ nu̱úra? Saáchi Ndióxi̱ kúú ta̱ nda̱kaxin miíra ña̱ koora rey ti̱xin ña̱ Reino yóʼo (Isaías 9:6; Lucas 22:28-30). Soo va̱ása níxikuni̱ra kuumiíra ku̱a̱ʼání ndee̱ ta ka̱ʼa̱n va̱ʼana xa̱ʼa̱ra (Mateo 11:29; Marcos 10:​17, 18). Íyova xa̱ʼa̱ ña̱ xi̱natúʼunra xa̱ʼa̱ ña̱ Reino yóʼo. Kúnda̱a̱-inira ña̱ íyova ña̱ va̱ʼa keʼé ña̱ chíñu yóʼo xa̱ʼa̱ na̱ yiví na̱ kúʼvi̱-inira xínira tá kúú: yivára xíʼin na̱ discípulora.a

ÑA̱ KEʼÉ REINO XA̱ʼA̱ YIVÁ TA̱ JESÚS

Ta̱ Jesús xíʼin ndiʼi níma̱ra kúʼvi̱-inira xínira yivára (Proverbios 8:30; Juan 14:31). Ta chi̱ndayáʼviníra ña̱ va̱ʼa ña̱ kúúmií yivára tá kúú, ña̱ kúʼvi̱-inira xínira na̱ yiví, ña̱ kúndáʼvi-inira xínirana ta saátu ña̱ viíní ndátiinra ku̱a̱chi (Deuteronomio 32:4; Isaías 49:15; 1 Juan 4:8). Xa̱ʼa̱ ña̱kán kúndasíra xínira ña̱ vatá ña̱ káʼa̱nna xa̱ʼa̱ yivára. Tá kúú ña̱ káʼa̱nna xa̱ʼa̱ Ndióxi̱ ña̱ va̱ása ndíʼi̱-inira xa̱ʼa̱ na̱ yiví, á tá káʼa̱nna ña̱ miíra kúú ta̱ sáxo̱ʼvi̱na. Xa̱ʼa̱ ña̱yóʼo kúú ña̱ chi̱ka̱a̱níka ta̱ Jesús ndee̱ ña̱ “na̱túʼunra tu̱ʼun va̱ʼa xa̱ʼa̱ Reino Ndióxi̱”: saáchi ña̱ Reino Ndióxi̱ kúú ña̱ ndasavií ki̱vi̱ yivára (Mateo 4:23; 6:9, 10) ¿Ndáa ki̱ʼva keʼéña ña̱yóʼo?

Keʼéña ku̱a̱ʼá ña̱ va̱ʼa xa̱ʼa̱ na̱ yiví. Ta ti̱xin Reino yóʼo Jehová “ndaya̱kúnra ti̱kui̱í nu̱úna ta va̱ása kuvikana, ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana” (Apocalipsis 21:3, 4). Xa̱ʼa̱ ña̱ keʼé Reino Ndióxi̱ va̱ása xo̱ʼvi̱ka na̱ yiví ta vií koona ndiʼi tiempo.b

Xa̱ʼa̱ ña̱yóʼo ni̱ka̱ʼa̱nní ta̱ Jesús xa̱ʼa̱ Reino Ndióxi̱, chi ña̱yóʼo na̱ʼa̱ña ña̱ yivára kúú iin Ndióxi̱ ta̱ kúndáʼvi-ini xíni na̱ yiví ta íyoní ndee̱ra (Santiago 5:11). Reino Ndióxi̱ su̱ví iinlá xa̱ʼa̱ miíra keʼéña ña̱ va̱ʼa. Chi saátu chindeétáʼanña xíʼin inka na̱ yiví na̱ kúʼvi̱-ini ta̱ Jesús xínira: na̱ kúú discípulora.

ÑA̱ KEʼÉ REINO NDIÓXI̱ XA̱ʼA̱ NA̱ DISCÍPULO TA̱ JESÚS

Tá kúma̱níka kixi ta̱ Jesús nu̱ú ñuʼú yóʼo, ku̱a̱ʼání tiempo ni̱xi̱yora xíʼin yivára chí ndiví. Ta̱ Jesús chi̱ndeétáʼanra xíʼinra ña̱ ke̱ʼéra ndiʼi ña̱ʼa ña̱ íyo tá kúú: ki̱mi xíʼin galaxia ña̱ íyo chí ndiví xíʼin ñuʼú ña̱ ndóoyó yóʼo xíʼin ndiʼi ña̱ʼa ña̱ íyo nu̱úña (Colosenses 1:​15, 16). Nu̱ú ndiʼi ña̱ ku̱va̱ʼa ta̱ Jesús kúʼvi̱níka-inira xínira na̱ yiví (Proverbios 8:31).

Ta xa̱ʼa̱ ña̱ kúʼvi̱ní-inira xínira na̱ yiví kúú ña̱ chi̱ka̱a̱ ndee̱ xíʼinra ña̱ na̱túʼunra xíʼin na̱ yiví xa̱ʼa̱ Ndióxi̱. Nda̱a̱ tá xa̱ʼa̱ ni̱ka̱ʼa̱nra ña̱ kixira nu̱ú ñuʼú yóʼo ña̱ natúʼunra tu̱ʼun va̱ʼa xíʼin na̱ yiví na̱ ndáʼvi (Lucas 4:18). Ta̱ Jesús va̱ása nínatúʼun kuitíra xíʼinna chi chi̱ndeétáʼanra xíʼinna. Tá kúú tá nda̱taka iin tiʼvi loʼo na̱ yiví ña̱ kuniso̱ʼonara “ku̱ndáʼviní-inira xi̱nirana ta sa̱ndáʼara na̱ ndeéndóʼo” (Mateo 14:14). Inka yichi̱ iin ta̱a ta̱ kúúmií iin kue̱ʼe̱ ndeé ni̱ka̱ʼa̱nra xíʼinra: “Tá miíún kúni̱ kiviva sandáʼún yi̱ʼi̱”. Xa̱ʼa̱ ña̱ ni̱kuʼvi̱-inira xi̱nirara ta ku̱ndáʼvi-inira xi̱nirara ni̱ka̱ʼa̱nra xíʼinra: “Va̱ʼa, kúni̱vai̱”. Ta saá sa̱ndáʼarara (Lucas 5:​12, 13). Tá xi̱ni ta̱ Jesús ña̱ xákuní ñá María xa̱ʼa̱ ku̱ʼvañá ta̱ Lázaro tá ni̱xi̱ʼi̱ra, “nda̱a̱ níma̱ [ta̱ Jesús] ni̱ta̱ʼví ta ni̱ndi̱ʼi̱ní-inira” ta xa̱kura (Juan 11:​32-36). Ta ke̱ʼéra iin ña̱ ndáyáʼviní: ni xa̱a̱ ni̱ya̱ʼa ku̱mí ki̱vi̱ ña̱ ni̱xi̱ʼi̱ ta̱ Lázaro, sa̱ndátakurara (Juan 11:​38-44).

Ta̱ Jesús xi̱kunda̱a̱-inira ña̱ loʼova tiempo ni̱xi̱yo milagro ña̱ xi̱keʼéra. Saáchi tá ná ya̱ʼa tiempo na̱ yiví na̱ sa̱ndáʼara ta saátu na̱ sa̱ndátakura, ndikó tukuna kuumiína kue̱ʼe̱ ta kuvina. Ta xi̱kunda̱a̱-inira ña̱ keʼé Reino Ndióxi̱ ndiʼi tiempova koo ña̱yóʼo. Xa̱ʼa̱ ña̱kán va̱ása níkeʼé kuitíra milagro chi chi̱ka̱a̱níra ndee̱ ña̱ natúʼunra “tu̱ʼun va̱ʼa xa̱ʼa̱ Reino Ndióxi̱” (Mateo 9:35). Milagro ña̱ ke̱ʼéra náʼa̱ña ña̱ xa̱a̱ ku̱nu̱mí keʼé Reino Ndióxi̱ nu̱ú ñuʼú yóʼo. ¿Ndáaña kúú ña̱ keʼéña? Biblia káʼa̱nña xíʼinyó xa̱ʼa̱ ña̱yóʼo.

• 

  Va̱ása kuumiíkana kue̱ʼe̱.

  “Ná kixaa̱ tiempo kán na̱ kǒo túvi nu̱ú va̱ʼa kutu̱vi nu̱úna, na̱ kǒo xíniso̱ʼo kuniso̱ʼona. Ná kixaa̱ tiempo kán na̱ kǒo kívi kaka va̱ʼa kakana nda̱a̱ va̱ʼa kanditana táki̱ʼva íxaa tí yusu, na̱ kǒo kívi ka̱ʼa̱n va̱ʼa ka̱ʼa̱nna.” Tá ná ki̱xaa̱ ki̱vi̱ kán kǒo na̱ ka̱ʼa̱n: “Kue̱ʼe̱ kúúmiíi̱” (Isaías 33:24; 35:​5, 6).

• 

  Va̱ása kuvikana.

  “Na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña.” (Salmo 37:29.)

  “[Ndióxi̱] sandíʼi-xa̱ʼa̱ ña̱ xíʼi̱yó, ta mií tátayó Jehová ya̱kúnra ti̱kui̱í nu̱úyó.” (Isaías 25:8.)

• Ndataku na̱ ni̱xi̱ʼi̱

  “Ndiʼi na̱ ni̱xi̱ʼi̱ na̱ ñúʼu ti̱xin ya̱vi̱ kuniso̱ʼona tu̱ʼunra, ta keena.” (Juan 5:​28, 29.)

  “Sandátakurana.” (Hechos 24:15.)

• 

  Ndiʼina koo veʼena ta koo chiñu ña̱ keʼéna

  “Keʼéna veʼe, ta miína koo iniña; ta chiʼina uva ta miína kaxirí. Kǒo keʼéna veʼe ta inkana koo iniña, va̱ása chiʼina ña̱ʼa ta inkana kaxiña [...;] ndiʼi chiñu keʼéna kusi̱í-inina xíʼinña.” (Isaías 65:​21, 22.)

• 

  Va̱ása kooka ku̱a̱chi

  “[Ndióxi̱] sandíʼi-xa̱ʼa̱ra ndiʼi ku̱a̱chi nu̱ú xáʼní-táʼanna iníísaá ñuyǐví.” (Salmo 46:9.)

  “Ta kǒo kuniñúʼukana espada ña̱ kanitáʼanna xíʼin na̱ inka ñuu chi kǒoka guerra koo.” (Isaías 2:4.)

• 

  Koo ña̱ kuxu ndiʼina

  “Ku̱a̱ʼání ña̱ʼa koo nu̱ú ñuʼú; Ndióxi̱, Ndióxi̱ miíyó, taxira bendición ndaʼa̱yó.” (Salmo 67:6.)

  “Nu̱ú ñuʼú ku̱a̱ʼání ña̱ʼa koo kuxuna, chí yuku̱ ku̱a̱ʼáka ña̱ koo.” (Salmo 72:16.)

• Va̱ása kooka na̱ ndáʼvi

  “Kǒo nandósó-inina xa̱ʼa̱ na̱ ndáʼvi.” (Salmo 9:18.)

  “Saáchi ta̱kán sakákura na̱ ndáʼvi na̱ ndúkú ña̱ ná chindeétáʼanna xíʼinna, ta saátu na̱ vitá-ini xíʼin ndiʼi na̱ kǒo na̱ chindeétáʼan xíʼin. Kundáʼvi-inira kunira na̱ vitá-ini ta saátu na̱ ndáʼvi ta saka̱kura na̱ ndáʼvi.” (Salmo 72:​12, 13.)

Vitin ña̱ ku̱nda̱a̱-iniún xa̱ʼa̱ ña̱ keʼé Ndióxi̱ chí nu̱únínu, ¿á ku̱nda̱a̱-iniún nda̱chun ndáyáʼviní ña̱ Reino Ndióxi̱ nu̱ú ta̱ Jesús? Ni̱ka̱ʼa̱nra xa̱ʼa̱ Reino yóʼo xíʼin ndiʼi na̱ yiví na̱ xi̱kuni̱ kuniso̱ʼo miíra, saáchi iinlá ña̱yóʼo kúú ña̱ kivi sandíʼi-xa̱ʼa̱ ndiʼi tu̱ndóʼo ña̱ íyo nu̱úyó.

¿Á kútóún ña̱ káʼa̱n Ndióxi̱ keʼéra? Tá saá íyoña, ¿ndáaña kivi keʼún ña̱ va̱ʼa sakuaʼún xa̱ʼa̱ Reino Ndióxi̱? ¿Ndáaña keʼún ña̱ va̱ʼa ndakiʼún bendición ña̱ káʼa̱n Reino Ndióxi̱ taxiña? Nu̱ú inka artículo kunda̱a̱-iniún xa̱ʼa̱ ña̱yóʼo.