Tá távána iinna ti̱xin congregación náʼa̱na ña̱ kúʼvi̱-inina xíninana

Ta̱ Julian ni̱ka̱ʼa̱nra ña̱yóʼo: “Tá xi̱niso̱’i̱ anuncio ña̱ ki̱ta se̱ʼíi̱ ti̱xin congregación ta̱ xa̱a̱ chée ku̱suchíní-inii̱. Va̱ʼaní xi̱kitáʼi̱n xíʼin se̱ʼíi̱ ta ku̱a̱ʼání ña̱ xi̱keʼéndi̱. Va̱ʼaní ta̱ loʼo xi̱kuura ta inkama kuití na̱samara ña̱ xi̱keʼéra. Ñá síʼi̱ ndiʼi tiempo xi̱xakuñá ta kǒo níxi̱kunda̱a̱-inii̱ ndáaña keʼíi̱ ña̱ va̱ʼa sándi̱koi̱ iniñá. Xi̱ndakanixi̱níndi̱ ña̱ miíndi̱ kúú na̱ va̱ása nísanáʼa̱ vií miíra”

Tá távána iinna ti̱xin congregación iin ña̱ yo̱ʼvi̱ kúúña, soo, ¿nda̱chun káʼa̱nna iin ña̱ kúʼvi̱-inina xíninana kúúña? ¿Nda̱chun káʼa̱n Biblia ña̱ keʼéna saá? ¿Ndáaña xíniñúʼu kuu ña̱ va̱ʼa tavána iinna ti̱xin congregación?

¿AMA KÚÚ ÑA̱ XÍNIÑÚʼU TAVÁNA IINNA TI̱XIN CONGREGACIÓN?

Íyo u̱vi̱ ña̱ʼa xíniñúʼu kuu ña̱ va̱ʼa tavána iin na̱ testigo Jehová ti̱xin congregación. Ña̱ nu̱ú, ña̱ kíʼvina iin ku̱a̱chi ndeé ta ña̱ u̱vi̱, ña̱ va̱ása ndándikó-inina.

Jehová kǒo ndátura ña̱ viíní ná keʼéyó ndiʼi ña̱ʼa, soo ña̱ kúni̱ra kúú ña̱ chika̱a̱yó ndee̱ ña̱ keʼéyó ña̱ kútóora. Tá kúú, kúndasíra xínira na̱ kéʼé ku̱a̱chi kini, na̱ ndásakáʼnu Ndióxi̱ vatá, na̱ íxakúiʼna, na̱ xáʼní xíʼin na̱ kéʼé ña̱ tási (1 Cor. 6:​9, 10; Rev. 21:8).

Xíʼin ña̱yóʼo kúnda̱a̱-iniyó ña̱ káʼa̱n Ndióxi̱ xíʼinyó ña̱ va̱ʼa miíyó kúúña ta ndáaña miíyó. Ta ndiʼivayó kúni̱ koo xíʼin na̱ yiví na̱ va̱ʼa-ini ¿á su̱ví saá? Chi saá kúú ña̱ ndóo na̱ ñuu Ndióxi̱. Tá ndóoyó xíʼin na̱ hermanoyó viíní kítáʼanyó saáchi ki̱vi̱ ña̱ nda̱taxiyó miíyó ndaʼa̱ Ndióxi̱ ni̱ka̱ʼa̱nyó xíʼinra ña̱ ixato̱ʼóyó chiñu ña̱ ta̱xira ndaʼa̱yó.

Soo, ¿ndáaña kuu tá iin na̱ cristiano ndákavana ta kíʼvina iin ku̱a̱chi ndeé? Tiempo xi̱naʼá sava na̱ xi̱ndasakáʼnu Ndióxi̱ ni̱ki̱ʼvina ku̱a̱chi ndeé, soo Ndióxi̱ va̱ása nínandóso-inira xa̱ʼa̱na. Iin ta̱yóʼo xi̱kuu ta̱ David. Ta̱yóʼo ni̱ki̱ʼvira ku̱a̱chi ndeé ta xa̱ʼníra iin ta̱a, ta ni ke̱ʼéra ña̱yóʼo ta̱ profeta Natán ni̱ka̱ʼa̱nra xíʼinra: “Jehová ixakáʼnu-inira xa̱ʼún” (2 Sam. 12:13).

¿Nda̱chun i̱xakáʼnu-inira xa̱ʼa̱ra? Saáchi xíʼin ndinuʼu-inira ndi̱kó-inira xa̱ʼa̱ ña̱ ke̱ʼéra (Sal. 32:​1-5). Táki̱ʼva i̱xakáʼnu-ini Jehová xa̱ʼa̱ ta̱ David saá kivi ixakáʼnu-inira xa̱ʼa̱ na̱ cristiano na̱ ni̱ki̱ʼvi ku̱a̱chi ndeé ta saátu tá kǒo ndíkokana kéʼénaña, ta saá va̱ása távánana ti̱xin congregación (Hech. 3:19; 26:20). Soo tá va̱ása ndándikó-inina na̱ anciano na̱ ndátiin ku̱a̱chi xíʼinna xíniñúʼu tavánana ti̱xin congregación.

Tá távána iinna ti̱xin congregación kivi ndakanixi̱níyó ña̱ va̱ása va̱ʼa níndátiin na̱ anciano ku̱a̱chi xíʼinna, víʼikaví tá viíní xi̱kitáʼanyó xíʼin na̱yóʼo. Soo Biblia káʼa̱nña xíʼinyó ña̱ tá távána iinna saá náʼa̱na ña̱ kúʼvi̱-inina xíninana.

IIN ÑA̱ VA̱ʼA KÚÚ ÑA̱ TÁ TÁVÁNA IINNA TI̱XIN CONGREGACIÓN

Ta̱ Jesús ni̱ka̱ʼa̱nra ña̱ va̱ʼa ña̱ kéʼé iin na̱ yiví kúú na̱ náʼa̱ ña̱ kúúna na̱ ndíchi (Mat. 11:19). Ña̱ va̱ʼa ña̱ ndáka̱xinna ña̱ tavána iin na̱ kǒo ndándikó-ini iin ña̱ ndíchi kúúña, saáchi ku̱a̱ʼá ña̱ va̱ʼa kúú saá. Ná kotoyó u̱ni̱ña:

Chíndeétáʼanña xíʼin na̱ yiví ña̱ vií ndakanixi̱nína xa̱ʼa̱ Jehová. Xa̱ʼa̱ ña̱ kúúyó testigo Jehová ta xíʼin ña̱ kéʼéyó na̱ yiví xítona ña̱yóʼo ta xíʼin ña̱yóʼo ndákanixi̱nína xa̱ʼa̱ Jehová (Is. 43:10). Tá kúú iin ta̱ loʼo, xíʼin ki̱ʼva ña̱ kéʼéra na̱ yiví ndákanixi̱nína xa̱ʼa̱ yivára ndáa ta̱a kúúra, ta saátu miíyó xíʼin ki̱ʼva ña̱ kéʼéyó na̱ʼa̱yó ndáaña ndakanixi̱ní na̱ yiví xa̱ʼa̱ Jehová. Tiempo ña̱ ni̱xi̱yo ta̱ Ezequiel, sava ñuu ña̱ ni̱xi̱yo yatin ñuu Israel xi̱chitáʼanna na̱ Judío xíʼin Jehová (Ezeq. 36:​19-23). Saátu kivi kundoʼo miíyó: na̱ yiví kivi chitáʼanna miíyó xíʼin Jehová. Xa̱ʼa̱ ña̱kán tá vií íyo ña̱ kéʼéyó, va̱ʼaní ka̱ʼa̱nna xa̱ʼa̱ra.

Soo tá ná ki̱ʼviyó ku̱a̱chi kini, ixayaku̱a̱yó ki̱vi̱ yi̱i̱ Ndióxi̱. Ta̱ apóstol Pedro ta̱xira consejo yóʼo: “Xa̱ʼa̱ ña̱kán sandákoondó ña̱ va̱ása va̱ʼa ña̱ xi̱kuni̱ndó keʼéndó tá ta̱ʼán kunda̱a̱-inindó xa̱ʼa̱ra; nu̱úka ña̱yóʼo, nda̱a̱ ndáaka ña̱ kéʼéndó na̱ʼa̱ndó ña̱ kúúndó na̱ yi̱i̱, nda̱a̱ táki̱ʼva íyo mií ta̱ nda̱kaxin ndóʼó chi ta̱ yi̱i̱ kúú ta̱kán, chi tu̱ʼun Ndióxi̱ káchiña: “Xíniñúʼu koondó na̱ yi̱i̱, chi ta̱ yi̱i̱ kúú yi̱ʼi̱” (1 Ped. 1:​14-16). Tá vií íyo ña̱ kéʼéyó, na̱ yiví kivi vií ka̱ʼa̱nna xa̱ʼa̱ Ndióxi̱ ta̱ ndásakáʼnuyó.

Soo, tá iin na̱ testigo Jehová kéʼéna iin ña̱ va̱ása va̱ʼa, na̱ yiví kivi xa̱a̱na kunda̱a̱-inina xa̱ʼa̱ ña̱yóʼo. Tá távána na̱ yiví kán ti̱xin congregación ña̱ va̱ása kúúkana testigo Jehová saá na̱ʼa̱na nu̱ú inka na̱ yiví, na̱ ñuu Jehová yi̱i̱ íyona ta ndíku̱nna ña̱ káʼa̱n Biblia. Ná ka̱ʼa̱nyó xa̱ʼa̱ iin ejemplo. Iin ta̱a ni̱xa̱ʼa̱nra ti̱xin Salón ña̱ Reino chí ñuu Suiza ni̱ka̱ʼa̱nra ña̱ kúni̱ra koora testigo Jehová. Soo ¿nda̱chun? Saáchi ku̱ʼvara ta̱vánañá ti̱xin congregación xa̱ʼa̱ ña̱ ni̱ki̱ʼviñá ku̱a̱chi kini ta̱ xa̱ʼa̱ ña̱kán ni̱ka̱ʼa̱nra ña̱ kúnira kundikaa̱ra ti̱xin ñuu Jehová “saáchi kǒo kíʼvina ku̱a̱chi kini”.

Ndáana na̱ hermano ti̱xin congregación. Ta̱ apóstol Pablo ni̱ka̱ʼa̱nra xíʼin na̱ cristiano ñuu Corinto, ña̱ i̱yo kúú ña̱ ná taxina koo iin na̱ kǒo ndándikó-ini xa̱ʼa̱ ku̱a̱chi kini ña̱ kíʼvina ti̱xin congregación. Ta ni̱ka̱ʼa̱nkara ña̱ íyona “táki̱ʼva ña̱ saxíya yuxa̱n”, ki̱ʼva saá kéʼé na̱ ni̱ki̱ʼvi ku̱a̱chi ndeé chi sákunina na̱ íyo yatin xíʼinna. Ta ta̱xira consejo yóʼo ndaʼa̱na: “Tavándó ta̱a ta̱ kéʼé ña̱ kini ta̱ ndíka̱a̱ xíʼinndó” (1 Cor. 5:​6, 11-13).

Ta̱a ta̱ ni̱ka̱ʼa̱n ta̱ apóstol Pablo xa̱ʼa̱, ku̱a̱chi kini xi̱keʼéra ta kǒo níchise̱ʼéraña. Ta xa̱ʼa̱ ña̱ xi̱keʼéra yóʼo sava na̱ xi̱ñuʼu ti̱xin congregación kixáʼana ndákanixi̱nína ña̱ va̱ʼava kúú ña̱ xi̱keʼéra (1 Cor. 5:​1, 2). Tá nítaxina ña̱ keʼéra ña̱ kini yóʼo, ndiʼi na̱ congregación kixáʼana keʼéna ña̱ kini ña̱ xi̱keʼé na̱ ñuu Corinto. Ta saátu kúú tiempo vitin tá ná taxina ña̱ keʼéna ña̱ kini, ndiʼina kivi ndakanixi̱ní ña̱ va̱ása ndáyáʼviví kundiku̱nyó ña̱ káʼa̱n tu̱ʼun Ndióxi̱ (Ecl. 8:11). Na̱ kíʼvi ku̱a̱chi ndeé ta va̱ása ndándikó-inina íyona táki̱ʼva íyo yu̱u̱ ña̱ ñúʼu se̱ʼé ti̱xin ti̱kui̱í ta kivi sandíʼi-xa̱ʼa̱na ña̱ kándíxa inkana Ndióxi̱ (Jud. 4, 12).

Kivi chindeétáʼanña xíʼin na̱ ni̱ki̱ʼvi ku̱a̱chi ndeé ña̱ nasamana ña̱ kéʼéna. Ta̱ Jesús ni̱ka̱ʼa̱nra xa̱ʼa̱ iin ta̱ loʼo ña̱ ki̱tara ti̱xin veʼera ta keʼéra ku̱a̱ʼání ña̱ kini ta sa̱ndíʼira ndiʼi ña̱ xi̱kuumiíra. Ku̱a̱ʼání tu̱ndóʼo ni̱ya̱ʼara nu̱ú ta saá ku̱ndaa̱-inira ña̱ va̱ʼaka ni̱xi̱yora xíʼin na̱ veʼera. Tándi̱ʼi, ta̱ loʼo yóʼo ndi̱kó-inira xa̱ʼa̱ ku̱a̱chi ña̱ ke̱ʼéra ta ndi̱kóra veʼera (Luc. 15:​11-24). Ta yivára ku̱si̱íkaví-inira nda̱kiʼinrara. Ña̱ ni̱ka̱ʼa̱n ta̱ Jesús xa̱ʼa̱ ta̱a ta̱ kúʼvi̱ní-ini xíni se̱ʼera chíndeétáʼanña xíʼinyó kunda̱a̱-iniyó nda̱saa kúni Jehová. Biblia káʼa̱nña xíʼinyó ña̱ kǒo kúni̱ Ndióxi̱ ña̱ ndiʼi-xa̱ʼa̱ na̱ ni̱ki̱ʼvi ku̱a̱chi, chi ña̱ kúni̱ra kúú ña̱ ndikó-inina ta kutakuna (Ezeq. 33:11).

Saá kúú xíʼin na̱ xa̱a̱ ta̱vána ti̱xin congregación saáchi va̱ása kúúkana na̱ veʼe Jehová, tá yáʼa tiempo kíʼinna kuenta ña̱ ku̱a̱ʼání ña̱ʼa va̱ʼa sa̱ndákoona. Ta saátu kíʼinna kuenta ña̱ va̱ása va̱ʼa íyo ña̱ ke̱ʼéna. Ta sana ndákaʼánna ña̱ si̱íní ni̱xi̱yona tá xi̱kuuna migo Jehová ta va̱ʼa xi̱kitáʼanna xíʼin ndiʼi na̱ hermano. Ta xa̱ʼa̱ ña̱yóʼo kúú ña̱ kivi chindeétáʼan xíʼinna ña̱ ndikó tukuna nu̱ú Jehová.

Ña̱ va̱ʼa ndikó-ini na̱ ni̱ki̱ʼvi ku̱a̱chi ndáyáʼviní na̱ʼa̱yó ña̱ kúʼvi̱-iniyó xíniyóna, soo miíyó xíniñúʼu nda̱kú koo-iniyó. Ta rey David ni̱ka̱ʼa̱nra ña̱yóʼo: “Tá ná kani iin na̱ nda̱kú-ini yi̱ʼi̱ saá na̱ʼa̱na ña̱ ndixaní kúʼvi̱-inina xínina yi̱ʼi̱; tá ná taxina consejo ndaʼíi̱ nda̱a̱ táki̱ʼva koo na̱ sakáa aceite xi̱níi̱ saá koona.” (Sal. 141:5.) ña̱ va̱ʼa ndakanixi̱níyó xíʼin ña̱ ni̱ka̱ʼa̱n ta̱ David, ná ndakanixi̱níyó xa̱ʼa̱ ña̱yóʼo. Ná ndakanixi̱níyó xa̱ʼa̱ iin tiʼvi na̱ yiví na̱ xíka ku̱a̱ʼa̱n xi̱ní iin xi̱kí nu̱ú kóyoní nieve. Soo iin ta̱yóʼo ku̱naníra ta ki̱xáʼa kúni̱ra kusura. Tá ná ku̱sunra nu̱ú íyo hielo kán kuvivara. Xa̱ʼa̱ ña̱kán iin na̱ kítáʼan xíʼinra ki̱xáʼa súkúra xa̱ʼa̱nnda nu̱úra ña̱ ná kǒo ku̱sura naní ndátuna ña̱ kixaa̱ na̱ sáka̱ku miína. Ni u̱ʼvi̱ní ña̱ kánira miíra soo ña̱yóʼo kivi sáka̱kuña miíra. Ki̱ʼva saá ndo̱ʼo ta̱ David ni yo̱ʼvi̱ní consejo ña̱ nda̱kiʼinra, soo ta̱xira tíxa̱ʼvi xa̱ʼa̱ ña̱yóʼo saáchi ña̱ va̱ʼa miívara kúúña.

Ña̱ távánana ti̱xin congregación kúú ña̱ kivi chindeétáʼan xíʼin na̱ ni̱ki̱ʼvi ku̱a̱chi. Tá ni̱ya̱ʼa u̱xu̱ ku̱i̱ya̱ ña̱ ta̱vána se̱ʼe ta̱ Julian ta̱ xa̱a̱ ni̱ka̱ʼa̱nyó xa̱ʼa̱, ndi̱kó tukura ti̱xin congregación ta na̱samara ña̱ xi̱keʼéra. Ta vitin kúúra anciano ta káʼa̱nra ña̱yóʼo: “Ña̱ ta̱vána yi̱ʼi̱ ti̱xin congregación chi̱ndeétáʼanña xíʼi̱n ña̱ xi̱toi̱ ña̱ va̱ása va̱ʼa níxi̱yo ña̱ ke̱ʼíi̱. Mií ña̱ nda̱a̱ xi̱niñúʼu tavávana miíi̱ xa̱ʼa̱ ña̱ ke̱ʼíi̱” (Heb. 12:​7-11).

ÑA̱ KIVI KEʼÉYÓ XÍʼIN NA̱ KE̱E TI̱XIN CONGREGACIÓN

Ni yo̱ʼvi̱ní ña̱ tá távána iinna ti̱xin congregación, soo kiviva ndikó tukuna. Ndiʼivayó kivi kundiku̱n ña̱ káʼa̱n Ndióxi̱ ta saá chindeétáʼanyó xíʼin na̱ ke̱e ti̱xin congregación.

Na̱ anciano xíniñúʼu chika̱a̱na ndee̱ ña̱ kundiku̱nna yichi̱ Jehová ña̱ ka̱ʼa̱nna xíʼin na̱ nda̱tiinna ku̱a̱chi xíʼin ña̱ tavánana ti̱xin congregación. Xa̱ʼa̱ ña̱kán viíní ndákanina nu̱úna ta káxi káʼa̱nna xíʼinna ndáaña kivi keʼéna ña̱ va̱ʼa ndikó tukuna. Ta saátu sava yichi̱ xáʼa̱nna nu̱ú na̱ ki̱ta ti̱xin ñuu Jehová na̱ náʼa̱ ña̱ chíkaa̱na ndee̱ ña̱ násama ña̱ kéʼéna ta sandákaʼánna miína ndáaña xíniñúʼu keʼéna ña̱ ndikó tukuna nu̱ú Jehová.a

Na̱ veʼena náʼa̱na ña̱ kúʼvi̱-inina xínina na̱ congregación ta saátu na̱ ni̱ki̱ʼvi ku̱a̱chi ta íxato̱ʼóna ña̱ nda̱kaxin na̱ anciano ke̱ʼéna. Ta̱ Julian káchira: “Kǒo nísandákoi̱ ña̱ ku̱ʼvi̱-inii̱ kunii̱ se̱ʼíi̱, soo xa̱ʼa̱ ña̱ ke̱ʼéra kǒo níkutáʼankandi xíʼinra”.

Ndiʼi na̱ congregación kivi na̱ʼa̱na ña̱ kúʼvi̱-inina xínina na̱ ki̱ta ti̱xin congregación ta kǒo xíniñúʼu kutáʼanna xíʼin na̱ yiví kán (1 Cor. 5:11; 2 Juan 10, 11). Ta saá náʼa̱na ña̱ íxato̱ʼóna consejo ña̱ ta̱xi Jehová ndaʼa̱ na̱ yiví kán. Soo íyo inka ña̱ xíniñúʼu keʼéna. Xíniñúʼu na̱ʼa̱na ña̱ kúʼvi̱-inina xínina na̱ veʼe na̱ ki̱ta ti̱xin congregación ta chindeétáʼanna xíʼinna. Saáchi su̱ví na̱yóʼo níkita ti̱xin congregación ña̱kán xíniñúʼu chindeétáʼanyó xíʼinna ña̱ va̱ʼa ná kǒo kuxíkána nu̱úyó (Rom. 12:​13, 15).

Ta̱ Julian káchikara: “Ña̱ távána iinna ti̱xin congregación chíndeétáʼanña xíʼinyó ña̱ ixato̱ʼóyó ña̱ káʼa̱n Jehová. Ni yo̱ʼvi̱ ña̱yóʼo, soo tá yáʼa tiempo ku̱a̱ʼá ña̱ va̱ʼa ndákiʼinyó xa̱ʼa̱ ña̱yóʼo, ta tá kǒo níkandíxai̱ consejo ña̱ ta̱xi Jehová ndaʼa̱ se̱ʼíi̱, sana ta̱yóʼo va̱ása ndikóra nu̱ú Ndióxi̱”.