¿Á chíndeéndó se̱ʼendó ña̱ keʼéna chiñu nu̱ú Ndióxi̱ ta ndakuchina?
“¿Nda̱chun ndátuníún? Kuaʼán ta ndakuchiún” (HECH. 22:16).
1. ¿Ndáaña kúni̱ na̱ íyo se̱ʼe kunda̱a̱-inina xa̱ʼa tá xa̱a̱ kúni̱ se̱ʼena ndakuchina?
“XA̱A̱ íyo ku̱a̱ʼá yo̱o̱ ña̱ ki̱xaʼíi̱ káʼi̱n xíʼin na̱ yivái̱ ña̱ kúni̱i̱ ndakuchii̱, ta ku̱a̱ʼání yichi̱ ni̱ka̱ʼa̱nna xíʼi̱n xa̱ʼa ña̱yóʼo. Xi̱kuni̱na kunda̱a̱-inina á xa̱a̱ kúnda̱a̱-inii̱ xa̱ʼa ña̱ ndakuchii̱. Nda̱a̱ vitin ki̱xa̱a̱ ki̱vi̱ ña̱ ndakuchii̱: tá 31 tí diciembre ña̱ 1934”. Ñá hermana ñá naní Blossom Brandt kúú ñá káʼa̱n ña̱ ndo̱ʼoñá ña̱yóʼo tá xi̱kuni̱ñá ndakuchiñá. Saátu tiempo vitin na̱ íyo se̱ʼe kúni̱na chindeénana ña̱ ndaka̱xinna keʼéna ña̱ va̱ʼa. Va̱ása va̱ʼa kasina nu̱ú se̱ʼena ña̱ ndakuchi kamana chi sana nandosó-inina xa̱ʼa Ndióxi̱ tasaá ná keʼéna xíʼinna (Sant. 4:17). Na̱ íyo se̱ʼe kúni̱na kunda̱a̱-inina á xa̱a̱ íyo tu̱ʼva se̱ʼena tá ta̱ʼánka ndakuchina ta á kuchiñuna keʼéna chiñu ña̱ kéʼé na̱ discípulo ta̱ Cristo.
2. a) ¿Ndáaña ndóʼo sava na̱ va̱lí xíni na̱ superintendente ña̱ circuito? b) ¿Ndáaña sakuaʼayó nu̱ú artículo yóʼo?
2 Sava na̱ superintendente ña̱ circuito ndíʼi̱ní-inina chi sava na̱ va̱lí xa̱a̱ kúúmiína 20 ku̱i̱ya̱ ta ta̱ʼán ndakuchina ta na̱ yivána xa̱a̱ testigo Jehová kúúna tá ka̱kuví na̱ va̱lí yóʼo. Ku̱a̱ʼá na̱ va̱lí yóʼo xáʼa̱nvana reunión, kéena nátúʼunna xa̱ʼa Ndióxi̱ ta ndákanixi̱nína ña̱ kúúna testigo Jehová. Soo ni saá kǒo xíínna ndataxi xíʼin miína ndaʼa̱ Ndióxi̱ ta ndakuchina. ¿Nda̱chun kúú ña̱ kéʼéna ña̱yóʼo? Sava yichi̱ mií na̱ yivána kúú na̱ káʼa̱n xíʼinna ña̱ ná kundatuna. ¿Nda̱chun kúú ña̱ sava na̱ testigo kǒo táxina ndakuchi kama se̱ʼena? Nu̱ú ña̱ artículo yóʼo kunda̱a̱-iniyó xa̱ʼa ku̱mí ña̱ʼa ña̱ sándi̱ʼi̱-inina.
¿Á XA̱A̱ VA̱ʼA NDAKUCHI SE̱ʼI̱?
3. ¿Ndáaña xi̱ndi̱ʼi̱ní-ini na̱ yivá ñá Blossom xa̱ʼa?
3 Na̱ yivá ñá Blossom xi̱ndi̱ʼi̱ní-inina xa̱ʼañá chi xi̱kuni̱na kunda̱a̱-inina á ndixa xa̱a̱ kúnda̱a̱-iniñá ndáaña kúni̱ kachi ña̱ ndakuchiñá ta nda̱chun ndáyáʼviní keʼéñá ña̱yóʼo. ¿Ndáaña kivi keʼé na̱ íyo se̱ʼe ña̱ va̱ʼa kunda̱a̱-inina á xa̱a̱ íyo tu̱ʼva se̱ʼena ña̱ ndataxi xíʼin miína ndaʼa̱ Jehová?
4. ¿Nda̱saa chíndeé táʼan ña̱ ni̱ka̱ʼa̱n ta̱ Jesús nu̱ú Mateo 28:19, 20 xíʼin na̱ íyo se̱ʼe?
4 (Kaʼvi Mateo 28:19, 20).a Táki̱ʼva sa̱kuaʼayó nu̱ú artículo ña̱ xa̱a̱ ni̱ya̱ʼa, va̱ása káʼa̱n Biblia nda̱saa ku̱i̱ya̱ xíniñúʼu kuumiíyó ña̱ va̱ʼa ndakuchiyó. Xa̱ʼa ña̱yóʼo na̱ íyo se̱ʼe xíniñúʼu ndakanixi̱nína xa̱ʼa ña̱ káʼa̱n Mateo 28:19, yóʼo ni̱ka̱ʼa̱n ta̱ Jesús ña̱ xíniñúʼu sánáʼa̱na na̱ yiví ña̱ xa̱a̱na koona discípulora. Na̱ discípulo ta̱ Jesús kúú na̱ sákuaʼa xa̱ʼara ta kúnda̱a̱-inina ña̱ sa̱náʼa̱ra ta kándíxanara. Xa̱ʼa ña̱yóʼo na̱ íyo se̱ʼe xíniñúʼu chindeé táʼanna xíʼinna nda̱a̱ tá kúúna na̱ lée válí ña̱ va̱ʼa xa̱a̱na ndakuchina ta kuuna discípulo ta̱ Jesús. Xíni̱vayó ña̱ va̱ása kívi ndakuchi na̱ lée válí chi ta̱ʼán kunda̱a̱-inina ña̱ káʼa̱n Biblia. Soo saátu káʼa̱n ña̱ Biblia ña̱ kiviva nda̱a̱ na̱ va̱lí ndakuchina tá xa̱a̱ kúnda̱a̱ va̱ʼa inina xa̱ʼa ña̱ káʼa̱n Biblia ta chíndayáʼvinaña.
5, 6. a) Xa̱ʼa ña̱ na̱kunda̱a̱-iniyó ña̱ káʼa̱n Biblia xa̱ʼa ta̱ Timoteo ¿ndáaña ndákanixi̱níyó xa̱ʼara? b) ¿Ndáaña kivi keʼé na̱ íyo se̱ʼe ña̱ chindeé táʼanna xíʼinna?
5 Ta̱ discípulo Timoteo tá loʼovíra ki̱xaʼára ndásakáʼnura Jehová. Ta̱ apóstol Pablo ni̱ka̱ʼa̱nra xa̱ʼa ta̱ Timoteo tá xa̱a̱ loʼovíra xi̱xini̱ra xa̱ʼa ña̱ káʼa̱n tu̱ʼun Ndióxi̱, ña̱yóʼo kúni̱ kachiña nda̱a̱ tá kúúra iin ta̱ lée loʼo. Siʼíra xíʼin xi̱tánra náyóʼo ná judío xi̱kuuná, ta sa̱náʼa̱nára ña̱ kuʼvi̱-inira kunira tu̱ʼun Ndióxi̱, chi yivára va̱ása níxindasakáʼnura Ndióxi̱. Xa̱ʼa ña̱ sa̱náʼa̱nára va̱ʼaní ni̱xa̱a̱ra ka̱ndíxara Ndióxi̱ (2 Tim. 1:5; 3:14, 15). Tá ndíka̱a̱ ta̱ Timoteo ki̱ʼva 20 ku̱i̱ya̱ ta̱ apóstol Pablo nda̱ka̱xinra ta̱yóʼo ña̱ ku̱ʼu̱nra xíʼinra natúʼunra xa̱ʼa Ndióxi̱ inka ñuu (Hech. 16:1-3).
6 Su̱ví inkáchi íyo ndiʼi na̱ va̱lí. Xa̱a̱ síín xúxa-ini iin iinna. Savana táʼan válíkana xa̱a̱ va̱ʼa ndákanixi̱nína, ta káʼa̱nna ña̱ kúni̱na ndakuchina. Savatuna ku̱a̱ʼáka tiempo xíniñúʼuna tasaá ndakuchina. Na̱ kúnda̱a̱-ini xa̱ʼa ña̱yóʼo va̱ása íxanduxana xíʼin se̱ʼena ña̱ ndakuchi kamana, va̱ʼaka chíndeé táʼanna xíʼinna ña̱ va̱ʼa xa̱a̱na ndakuchina tá xa̱a̱ íyo tu̱ʼvana. Kúsi̱íní-inina tá kéʼé se̱ʼena ña̱ káʼa̱n Proverbios 27:11 (kaʼviña).b Soo va̱ása xíniñúʼu nandosóna xa̱ʼa se̱ʼena ña̱ xa̱a̱na kuuna discípulo ta̱ Jesús. Xa̱ʼa ña̱yóʼo xíniñúʼu nda̱ka̱tu̱ʼun xíʼin miína: “¿Á xa̱a̱ xíni̱ va̱ʼa na̱ va̱lí se̱ʼi̱ xa̱ʼa Ndióxi̱ ña̱ ndataxi xíʼin miína ndaʼa̱ra ta ndakuchina?”.
¿Á XA̱A̱ XÍNI VA̱ʼA SE̱ʼI̱ XA̱ʼA NDIÓXI̱?
7. ¿Á xíniñúʼu kuxini̱níyó xa̱ʼa Biblia ta saáví ndakuchiyó?
7 Ndiʼi na̱ íyo se̱ʼe sánáʼa̱na se̱ʼena xa̱ʼa Ndióxi̱ chi kúni̱na ná kunda̱a̱ va̱ʼa inina xa̱ʼara. Ña̱ sákuaʼana yóʼo kúú ña̱ chindeé táʼan xíʼinna ña̱ xa̱a̱na ndataxina miína ndaʼa̱ Jehová. ¿Á ña̱yóʼo kúni̱ kachiña ña̱ xíniñúʼu kuxini̱ ndiʼina ña̱ káʼa̱n Biblia tasaá ndataxina miína ndaʼa̱ Ndióxi̱ ta ndakuchina? Va̱ása. Chi ndiʼivayó na̱ xa̱a̱ nda̱kuchi xíniñúʼu sakuaʼakayó xa̱ʼa Ndióxi̱ (kaʼvi Colosenses 1:9, 10).c Xa̱ʼa ña̱yóʼo, ¿nda̱saa ña̱ʼa xíniñúʼu kuxini̱yó xa̱ʼa Ndióxi̱ tasaá ndakuchiyó?
8, 9. ¿Ndáaña sákuaʼayó xa̱ʼa ña̱ ndo̱ʼo ta̱ Pablo xíʼin ta̱ xi̱ndaa veʼeka̱a?
8 Ña̱ va̱ʼa kunda̱a̱-iniyó xíʼin ña̱yóʼo ná sakuaʼayó xa̱ʼa ña̱ ndo̱ʼo na̱ xi̱ndoo tá siglo nu̱ú (Hech. 16:25-33). Tá ku̱i̱ya̱ 50, xa̱a̱ ña̱ yichi̱ u̱vi̱ kúú ña̱ ndi̱kó ta̱ Pablo ñuu Filipos. Chi̱ka̱a̱nara xíʼin ta̱ Silas veʼeka̱a. Mií ñu̱ú saá ndeéní ni̱ta̱an ta ka̱nda nama̱ ta ni̱nu̱na yéʼé. Ta̱ ndáa ña̱ veʼeka̱a yóʼo nda̱kanixi̱níra ña̱ ke̱e ndiʼi na̱ ñúʼu iniña ta nda̱a̱ xi̱kuni̱ra kaʼníra miíra. Soo ta̱ Pablo va̱ása nítaxira keʼéra ña̱yóʼo. Ta̱ Pablo xíʼin ta̱ Silas na̱túʼunna xa̱ʼa Ndióxi̱ xíʼin ta̱yóʼo ta saátu xíʼin na̱ veʼera. Ndiʼi na̱yóʼo va̱ʼaní na̱kunda̱a̱-inina xa̱ʼa ña̱ sa̱kuaʼana xa̱ʼa ta̱ Jesús ta ndi̱ku̱n nda̱kuchina. ¿Ndáaña sákuaʼayó xíʼin ña̱yóʼo?
9 Sana ta̱ ndáa veʼeka̱a yóʼo iin soldado romano ni̱xi̱yora ta kǒo níxixini̱ra xa̱ʼa ña̱ káʼa̱n Biblia. Xa̱ʼa ña̱yóʼo ña̱ va̱ʼa ndasakáʼnura Ndióxi̱ xi̱xiniñúʼu kunda̱a̱ va̱ʼa inira xa̱ʼa Ndióxi̱, kunda̱a̱-inira xa̱ʼa chiñu ña̱ kéʼé na̱ ndásakáʼnu Jehová ta kandíxara ndiʼi ña̱ sa̱náʼa̱ ta̱ Jesús. Loʼova tiempo ni̱ya̱ʼa ta ni̱xa̱a̱ra na̱kunda̱a̱-inira xa̱ʼa ndiʼi ña̱yóʼo ta ki̱xaʼára kúʼvi̱-inira xínira Ndióxi̱ ta nda̱kuchira. Soo ni xa̱a̱ nda̱kuchira xi̱niñúʼu sakuaʼakara xa̱ʼa Ndióxi̱. Ña̱kán, ¿ndáaña xíniñúʼu keʼé na̱ íyo se̱ʼe tá káʼa̱nna xíʼinna ña̱ kúni̱na ndakuchina chi kúʼvi̱-inina xínina Ndióxi̱? Kivi ka̱ʼa̱nna xíʼinna ña̱ ná ka̱ʼa̱nna xíʼin na̱ anciano ta na̱yóʼo kúú na̱ koto á xa̱a̱ íyo tu̱ʼvana ña̱ ndakuchina.d Soo nda̱a̱ táki̱ʼva kéʼé ndiʼiyó na̱ xa̱a̱ nda̱kuchi sákuaʼa tá sákuaʼakavayó xa̱ʼa Ndióxi̱, saátu keʼé na̱yóʼo ña̱ sakuaʼakana xa̱ʼa Ndióxi̱ ndiʼi tiempo (Rom. 11:33, 34).
¿NDÁAÑA KÚÚ MIÍ ÑA̱ VA̱ʼA KEʼÉ SE̱ʼI̱?
10, 11. a) ¿Ndáaña ndákanixi̱ní sava na̱ íyo se̱ʼe? b) ¿Ndáaña xíniñúʼu kundayáʼvika nu̱ú na̱ íyo se̱ʼe?
10 Sava na̱ íyo se̱ʼe ndákanixi̱nína ña̱ siʼnaka xíniñúʼu káʼvi va̱ʼana ta kuumiína iin chiñu va̱ʼa, tasaá ndakuchina. Sana ña̱ va̱ʼava ndákanixi̱nína xa̱ʼa ña̱ káʼa̱nna ña̱yóʼo. Soo ¿á ndixa chíndeé táʼanna xíʼin se̱ʼena ña̱ si̱í koona ña̱ káʼa̱nna ña̱yóʼo xíʼinna? Ta, ¿á ña̱yóʼo kúú ña̱ sánáʼa̱ Biblia? ¿Ndáaña kúni̱ Jehová keʼéyó? (Kaʼvi Eclesiastés 12:1).e
11 Xíniñúʼu ndakaʼányó chi ndiʼi ña̱ íyo ñuyǐví yóʼo su̱ví ña̱ kútóo Jehová kúúña (Sant. 4:7, 8; 1 Juan 2:15-17; 5:19). ¿Ndáaña kivi chindeé na̱ va̱lí ña̱ va̱ʼa ná kǒo ndakavana ndaʼa̱ ta̱ Ndi̱va̱ʼa xíʼin ña̱ʼa ña̱ íyo ñuyǐví yóʼo? Ña̱ koona migo Jehová. Tá na̱ yivána ndíʼi̱ní-inina xa̱ʼa ña̱ʼa ña̱ íyo ñuyǐví yóʼo, sana ndakanixi̱ní se̱ʼena ña̱ ndáyáʼvika ña̱yóʼo nu̱úka ña̱ koona migo Jehová. Ni iin na̱ íyo se̱ʼe na̱ kúú testigo Jehová va̱ása kúni̱na keʼé na̱ se̱ʼena ña̱ íyo ñuyǐví yóʼo. Ña̱ taxi ña̱ koo si̱í-inina kúú ña̱ keʼéna siʼnaka ña̱ kúni̱ Jehová (kaʼvi Salmo 1:2, 3).f
¿TÁ NÁ KI̱ʼVI SE̱ʼI̱ IIN KU̱A̱CHI KÁʼNU?
12. ¿Nda̱chun kúú ña̱ káʼa̱n savana xíʼin se̱ʼena ña̱ ná kǒo ndakuchi kamana?
12 Iin ñá kúú testigo Jehová ni̱ka̱ʼa̱nñá xíʼin se̱ʼeñá ña̱ ná kundatuñá saá ndakuchiñá. ¿Nda̱chun ni̱ka̱ʼa̱nñá ña̱yóʼo? Miíñá nda̱kuiin ña̱yóʼo: “Kúkaʼan nu̱úi̱ ka̱ʼi̱n xa̱ʼa ña̱yóʼo soo xa̱ʼa ña̱ kǒo níxíi̱n kúúña nda̱kanixi̱níi̱ ña̱ kivi xa̱a̱ñá kitañá ti̱xin ñuu Ndióxi̱”. Sana na̱ íyo se̱ʼe ndákanixi̱nína táki̱ʼva nda̱kanixi̱ní ñá hermana yóʼo, xa̱ʼa ña̱yóʼo káʼa̱nna xíʼin se̱ʼena ña̱ ná ndakuchina tá xa̱a̱ xu̱xaka-inina (Gén. 8:21; Prov. 22:15). Sana ndákanixi̱nína xa̱ʼa ña̱ ta̱ʼán ndakuchi se̱ʼena va̱ása tavánana ti̱xin ña̱ ñuu Ndióxi̱. Soo su̱ví ña̱ ndixa kúú ña̱yóʼo. ¿Nda̱chun káʼa̱nyó saá? (Sant. 1:22).
13. Tá ta̱ʼán ndakuchiyó ¿á kúni̱ kachiña ña̱ va̱ása ndukú Jehová kuenta nu̱úyó?
13 Na̱ íyo se̱ʼe kúni̱na ña̱ ná ndataxi xíʼin mií se̱ʼena ndaʼa̱ Ndióxi̱ ta ndakuchina tá xa̱a̱ xu̱xa-inina. Va̱ása va̱ʼa ndakanixi̱níyó ña̱ va̱ása tiin Jehová ku̱a̱chi xíʼinna chi ta̱ʼán ndakuchina. Soo mií ña̱ nda̱a̱, xa̱ʼa ña̱ xa̱a̱ xíni̱ na̱ va̱lí se̱ʼendó ndáaña kúú ña̱ va̱ʼa ta ndáaña kúú ña̱ va̱ása, ndukúva Jehová kuenta nu̱úna (kaʼvi Santiago 4:17).g Xa̱ʼa ña̱yóʼo, nu̱úka ña̱ ka̱ʼa̱nndó xíʼin se̱ʼendó ña̱ ná kǒo ndakuchi kamana va̱ʼaka chika̱a̱ndó ndée ña̱ chinúundó iin yichi̱ va̱ʼa nu̱úna. Ña̱kán sanáʼa̱ndóna tá válíkana ña̱ ná kandíxana ña̱ káʼa̱n Jehová ta ná chindayáʼvina ña̱yóʼo (Luc. 6:40). Ña̱yóʼo kúú ña̱ chindeé táʼanní xíʼinna ña̱ ndaka̱xinna keʼéna ña̱ kúni̱ Jehová (Is. 35:8).
¿NDA̱SAA KIVI CHINDEÉ TÁʼAN INKA NA̱ HERMANO XÍʼIN NA̱ ÍYO SE̱ʼE?
14. ¿Ndáaña kivi keʼé na̱ anciano ña̱ va̱ʼa chindeé táʼanna xíʼin na̱ íyo se̱ʼe?
14 Na̱ anciano ña̱ congregación kivi chindeé táʼanna xíʼin na̱ íyo se̱ʼe. ¿Ndáaña kivi keʼéna? Ka̱ʼa̱n va̱ʼana xa̱ʼa ndiʼi chiñu Ndióxi̱. Iin ñá hermana ndákaʼánñá tá xi̱ndika̱a̱ñá 6 ku̱i̱ya̱, ta̱ hermano Russell ki̱ʼva 15 minuto ni̱ka̱ʼa̱nra xíʼinñá xa̱ʼa ña̱ kúni̱ñá keʼéñá nu̱ú Ndióxi̱. Ñá hermana yóʼo yáʼaka 70 ku̱i̱ya̱ ni̱xi̱yoñá precursora. Xíʼin ña̱yóʼo kúnda̱a̱-iniyó ña̱ ndáyáʼvi ña̱ chika̱a̱yó ndée iinna xíʼin ña̱ ka̱ʼa̱n va̱ʼayó xa̱ʼa chiñu Ndióxi̱ xíʼinna (Prov. 25:11). Inka ña̱ kivi keʼé na̱ anciano kúú, ña̱ taxina chiñu ndaʼa̱ na̱ íyo se̱ʼe ña̱ kachíñuna xíʼin se̱ʼena ti̱xin Salón ña̱ Reino, ta taxina chiñu ndaʼa̱ na̱ va̱lí yóʼo ña̱ kivi keʼéna.
15. ¿Ndáaña kivi keʼé inka na̱ hermano ña̱ chindeé táʼanna xíʼin na̱ va̱lí?
15 Ta ¿ndáaña kivi keʼé inka na̱ hermano ña̱ chindeéna na̱ íyo se̱ʼe? Ña̱ kundi̱ʼi̱-inina xa̱ʼa ndiʼi na̱ va̱lí. Kivi kiʼinna kuenta xíʼin ña̱ chiñu kéʼé na̱ va̱lí yóʼo nu̱ú Ndióxi̱. Tá kúú ña̱yóʼo, ¿á ta̱xina iin comentario ta ni̱ka̱ʼa̱nnaña tu̱ʼun miína? ¿Á ta̱xina discurso ti̱xin reunión ña̱ ma̱ʼñú semana? ¿Á ku̱chiñuna ni̱ya̱ʼana nu̱ú iin tu̱ndóʼo? ¿Á chi̱ka̱a̱na ndée ña̱ na̱túʼunna xíʼin iin na̱ káʼvi xíʼinna escuela? Ná kǒo nandosóyó ña̱ ka̱ʼa̱nyó xíʼinna ña̱ va̱ʼaní ke̱ʼéna. Xa̱ʼa ña̱yóʼo ná chika̱a̱yó ndée ña̱ ka̱ʼa̱nyó xíʼin na̱ va̱lí tá kúma̱níka kixaʼá reunión á tá xa̱a̱ ndi̱ʼiña. Tá ná keʼéyó ña̱yóʼo kusi̱íní-inina chi kunda̱a̱-inina ña̱ ndiʼiyó kíʼin kuenta xíʼinna (Sal. 35:18).
CHINDEÉ TÁʼANNDÓ XÍʼIN SE̱ʼENDÓ ÑA̱ NÁ XA̱A̱NA NDAKUCHINA
16, 17. a) ¿Nda̱chun xíniñúʼu ndakuchi na̱ va̱lí se̱ʼendó? b) ¿Ndáaña kivi sakusi̱í-ini na̱ íyo se̱ʼe? (Koto na̱ʼná ña̱ va̱xi chí xa̱ʼa).
16 Iin chiñu ña̱ ndáyáʼviní kúú ña̱ kúúmií na̱ íyo se̱ʼe chi xíniñúʼu sanáʼa̱na se̱ʼena nda̱a̱ táki̱ʼva kúni̱ mií Jehová (Efes. 6:4; Sal. 127:3). Na̱ va̱lí ñuu Israel tá xi̱kakuna xa̱a̱ na̱ ñuu Ndióxi̱ xi̱kuuvana. Soo na̱ va̱lí na̱ káku vitin su̱ví saá íyona ni xa̱a̱ ndakuchi na̱ yivána. Ña̱ kuʼvi̱-inina kunina Jehová xíʼin tu̱ʼunra su̱ví iin herencia ña̱ kivi sandákoo na̱ yivána ndaʼa̱na kúú ña̱yóʼo. Xa̱ʼa ña̱yóʼo nda̱a̱ tá válívína xíniñúʼu sanáʼa̱nana xa̱ʼa Ndióxi̱ ña̱ va̱ʼa xa̱a̱na kundiku̱nna ta̱ Jesús, ta ndataxina miína ndaʼa̱ Ndióxi̱ ta ndakuchina. Ña̱yóʼo kúú ña̱ ndáyáʼvika. ¿Nda̱chun káʼa̱nyó ña̱yóʼo? Saáchi ña̱ ndataxina miína ndaʼa̱ Ndióxi̱, ña̱ ndakuchina xíʼin ña̱ kachíñuna nu̱ura kúúña kivi chindeé miína ña̱ ka̱kuna tá ná ki̱xa̱a̱ ña̱ gran tribulación (Mat. 24:13).
Ña̱ xíniñúʼu keʼé na̱ íyo se̱ʼe kúú ña̱ chindeéna se̱ʼena ña̱ xa̱a̱na kundiku̱nna ta̱ Jesús. (Koto párrafo 16 xíʼin 17).
17 Ti̱xin ña̱ párrafo nu̱ú ni̱ka̱ʼa̱nyó xa̱ʼa ñá hermana Blossom Brandt. Tá ni̱ka̱ʼa̱nñá xíʼin na̱ yiváñá ña̱ kúni̱ñá ndakuchiñá, na̱yóʼo xi̱kuni̱na kunda̱a̱-inina á xa̱a̱ íyo tu̱ʼvañá ña̱ keʼéñá ña̱yóʼo chi iin ña̱ ndáyáʼviní kúúña. Tá xa̱a̱ na̱kunda̱a̱-inina ña̱ íyo tu̱ʼvañá, chi̱ndeé táʼanna xíʼinñá ña̱ nda̱kuchiñá. Tá ñu̱ú tá kúma̱níka ndakuchiñá íyo iin ña̱ liviní ke̱ʼé yiváñá. Ñá Blossom káchiñá: “Ni̱ka̱ʼa̱nra xíʼinndi̱ ña̱ ná kuxítíndi̱ tasaá ni̱ka̱ʼa̱nra xíʼin Ndióxi̱. Ni̱ka̱ʼa̱nra xíʼin Jehová ña̱ kúsi̱íní-inira ña̱ ndataxi xíʼin miíi̱ ndaʼa̱ Jehová”. Tá xa̱a̱ ni̱ya̱ʼa 60 ku̱i̱ya̱ ñá hermana yóʼo ni̱ka̱ʼa̱nñá: “Va̱ása nándosói̱ xa̱ʼa ña̱ ku̱u tá ñu̱ú saá”. Ndiʼindi̱ kúni̱ndi̱, ndóʼó na̱ íyo se̱ʼe ná kusi̱íní-inindó xa̱ʼa ña̱ kuaʼnu se̱ʼendó ti̱xin ñuu Ndióxi̱ ta xa̱a̱na ndataxina miína ndaʼa̱ra ta ndakuchina.
a Mateo 28:19, 20: “Kuaʼánndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna, ña̱ ná kundiku̱nna yi̱ʼi̱, ta ná ndakuchina xíʼin ki̱vi̱ yiváyó xíʼin ki̱vi̱ se̱ʼera tasaá xíʼin ki̱vi̱ espíritu santo, ta sanáʼa̱ndóna ná keʼéna ndiʼi ña̱ káʼi̱n xíʼinndó. Ta kotondó, íyoi̱ xíʼinndó ndiʼi tiempo nda̱a̱ ná ndiʼi-xa̱ʼa ñuyǐví”.
b Proverbios 27:11: “Se̱ʼe miíi̱ vií va̱ʼa ndakanixi̱níún, ta sakusi̱íún inii̱, ña̱kán va̱ʼa ndakuii̱n yuʼú ta̱ kúsi̱kindaa yi̱ʼi̱”.
c Colosenses 1:9, 10: “Saátu miíndi̱, tá ki̱vi̱ xi̱niso̱ʼondi̱ xa̱ʼandó, kǒo sándákoondi̱ káʼa̱nndi̱ xa̱ʼandó xíʼin Ndióxi̱ xíʼin ña̱ ná sakuaʼakandó ndiʼi ña̱ kúni̱ra xíʼin ndiʼi ña̱ ndíchira ta kunda̱a̱-inindó xíʼinña, ña̱ va̱ʼa keʼéndó ña̱ kúni̱ Jehová ta sakusi̱índó-inira ndiʼi ña̱ va̱ʼa keʼéndó ta sakuaʼakandó xa̱ʼa Ndióxi̱”.
d Na̱ íyo se̱ʼe kivi kaʼvina xíʼinna ña̱ káʼa̱n libro Lo que los jóvenes preguntan. Respuestas prácticas (volumen 2), página 304 nda̱a̱ 310 chi nu̱ú ña̱yóʼo va̱xi ña̱ kivi chindeé táʼan xíʼinna. Saátu kivi kotona nu̱ú ña̱ “Sección de preguntas” ña̱ va̱xi nu̱ú ña̱ Nuestro Ministerio del Reino ña̱ ka̱na tá yo̱o̱ abril 2011, página 2.
e Eclesiastés 12:1: “Vitin tá válíndó ndakaʼánndó xa̱ʼa ta̱ i̱xava̱ʼa miíndó, chi kixa̱a̱ ku̱i̱ya̱ ña̱ kuchéendó ta kixi tu̱ndóʼo nu̱úndó, ta ka̱ʼa̱nndó: ‘Kǒo kúsi̱íka-inii̱ keʼíi̱ ni iin ña̱ʼa vitinʼ”.
f Salmo 1:2, 3: “Ña̱ kútóokara kaʼvira kúú ley Jehová, ñu̱ú ta káʼñu káʼvira ley yóʼo ta ndákanixi̱níra xa̱ʼaña. Tasaá ndakúní koora táki̱ʼva íyo iin yitu̱n tú níndichi yu̱ʼu̱ yu̱ta, chi kíxa̱a̱ tiempo ta táxinú ku̱i̱ʼi ta yu̱ku̱ ndaʼa̱nú va̱ása yíchi̱ña, tasaá ndiʼi ña̱ keʼéra va̱ʼa kanaña”.
g Santiago 4:17: “Xa̱ʼa ña̱yóʼo tá iinndó xíni̱ndó ndáaña kúú ña̱ va̱ʼa xíʼin ña̱ va̱ása va̱ʼa ta kǒo kéʼéndóña iin ku̱a̱chi káʼnu kúú ña̱yóʼo nu̱ú Ndióxi̱”.