Pregunta ña̱ kéʼé na̱ káʼvi tutu yóʼo

¿Nda̱chun va̱ása va̱ʼa chinúuyó publicación ña̱ tává na̱ testigo Jehová nu̱ú inka página ña̱ Internet?

Na̱ testigo Jehová távána ku̱a̱ʼání publicación ta va̱ása kíʼinna xu̱ʼún xa̱ʼa ña̱yóʼo, ta xa̱ʼa ña̱yóʼo savana ndákanixi̱nína ña̱ va̱ʼava tavána copia ña̱yóʼo ta chinúunaña nu̱ú inka página ña̱ Internet. Soo va̱ása va̱ʼa keʼéna ña̱yóʼo chi íyo iin ña̱ káʼa̱n xa̱ʼa ña̱yóʼo ña̱ naní Términos y Condiciones de Usoa ña̱ káʼa̱n xa̱ʼa página ña̱ kúúmiíndi̱ ta xa̱a̱ ku̱a̱ʼání tu̱ndóʼo íyo xa̱ʼa ña̱yóʼo. Kán káʼa̱nña ña̱ ni iin na̱ yiví kǒo kúúmiína permiso ña̱ “kuniñúʼuna ilustración, publicación ña̱ távándi̱, marca ña̱ kúúmiíndi̱, yaa, na̱ʼná, video á inkaka ña̱ʼa ña̱ va̱xi nu̱ú página yóʼo ta va̱ása kuniñúʼunaña nu̱ú inka sitio ña̱ Internet (ni nu̱ú inka página ña̱ Internet nu̱ú sáyaʼana video ndaʼa̱ táʼanna)”. ¿Nda̱chun kǒo kívi keʼéna ña̱yóʼo?

Ndiʼi ña̱ íyo nu̱ú sitio ña̱ Internet ña̱ kúúmiíndi̱ íyo iin na̱ i̱xava̱ʼa ña̱yóʼo ta iinlá miína kúú na̱ kúúmií derecho kuniñúʼu ña̱yóʼo. Na̱ apóstata xíʼin na̱ sáa̱-ini xíni ndi̱ʼi̱ xíniñúʼuna publicación ña̱ kúúmiíndi̱ ta chínúunaña nu̱ú inka página ña̱ Internet chi kúni̱na sandáʼvina inkaka na̱ yiví na̱ xíto ña̱yóʼo. Soo nu̱ú página ña̱ xíniñúʼuna káʼa̱nna ña̱ vatá xa̱ʼandi̱ (Sal. 26:4; Prov. 22:5). Inka na̱ yiví xíniñúʼuna ña̱ va̱xi nu̱ú publicación ña̱ távándi̱ á xíniñúʼuna símbolo ña̱ jw.org ta sánananaña nu̱ú ña̱ʼa íxi̱kóna, á xíniñúʼuna ña̱yóʼo ña̱ va̱ʼa kéʼéna aplicación ña̱ xíniñúʼuna nu̱ú teléfono á tableta. Íyova ley ña̱ káʼa̱n xa̱ʼa ña̱ va̱ása táxindi̱ ña̱ ni iinna kuniñúʼu ña̱ kúúmiíndi̱ nu̱ú página yóʼo ta kǒo kívi chinúunaña nu̱ú inka página ña̱ Internet (Prov. 27:12). Tá ná taxi na̱ ñuu Ndióxi̱ permiso ña̱ kuniñúʼu na̱ yiví ña̱ va̱xi nu̱ú página yóʼo ni kúúna Testigo, ña̱ chinúunaña nu̱ú inka página á kuniñúʼuna símbolo ña̱ jw.org ña̱ va̱ʼa sánananaña nu̱ú ña̱ʼa íxi̱kóna, na̱ chíñu va̱ása chindeé táʼanna xíʼinndi̱ ña̱ kǒo taxina ña̱ kuniñúʼu inkanaña.

Iinlá nu̱ú jw.org xíniñúʼu taváyó publicación va̱ása xíniñúʼu taváyóña nu̱ú inka página ña̱ Internet. Jehová ta̱xira chiñu ndaʼa̱ na̱ esclavo fiel y discreto ña̱ va̱ʼa ná tavána tutu ña̱ kaʼviyó (Mat. 24:45). Na̱ “esclavo” yóʼo távána ña̱yóʼo nu̱ú página ña̱ kúúmiína, ña̱yóʼo kúú jw.org, tv.jw.org xíʼin wol.jw.org. Saátu íyo u̱ni̱ aplicación ña̱ kivi kuniñúʼuyó nu̱ú teléfono á tableta, ta ña̱yóʼo kúú: JW Language^®, JW Library^® xíʼin JW Library Sign Language^®. Kivi kotoyó ña̱ va̱ása va̱xi anuncio ña̱ káʼa̱n xa̱ʼa ña̱ʼa ña̱ íxi̱kó inka na̱ yiví ta va̱ása va̱xi ña̱ʼa kini ña̱ kéʼé na̱ ñuyǐví ta̱ Ndi̱va̱ʼa á ña̱ tává na̱ apóstata. Tá ná taváyóña nu̱ú inka página ña̱ Internet, xa̱a̱ nasa̱mava ña̱yóʼo á kuyaku̱a̱ña xíʼin ñuyǐví ta̱ Ndi̱va̱ʼa (Sal. 18:26; 19:8).

Saátu tá iinna chínúuna publicación ña̱ távándi̱ á iin video nu̱ú inka página ña̱ Internet nu̱ú káʼa̱n na̱ yiví ndáaña ndákanixi̱nína xa̱ʼaña, na̱ apóstata kivi kuniñúʼuna ña̱yóʼo xíʼin na̱ káʼa̱n ndi̱va̱ʼa xa̱ʼandi̱ ta kixaʼána ka̱ʼa̱nna ña̱ vatá xa̱ʼandi̱. Sava na̱ hermano nda̱a̱ kíxaʼána kánitáʼanna xíʼin inkana nu̱ú Internet, soo ña̱yóʼo íxayaku̱a̱ña ki̱vi̱ Jehová. Va̱ása va̱ʼa kuniñúʼuyó ña̱ página yóʼo ña̱ sánáʼa̱yó na̱ kǒo kúni̱ sakuaʼa ña̱ nda̱a̱ xa̱ʼa Ndióxi̱ (2 Tim. 2:23-25; 1 Tim. 6:3-5). Saátu xa̱a̱ ndáni̱ʼíndi̱ sava página ña̱ Internet nu̱ú va̱xi ki̱vi̱ na̱ ñuu Ndióxi̱ á va̱xi ki̱vi̱ na̱ cuerpo gobernante, soo ña̱ vatá kúú ña̱yóʼo. Ni iin na̱ cuerpo gobernante va̱ása kúúmiína iin página miína ña̱ Internet.

Tá káʼa̱nyó xíʼin na̱ yiví ña̱ ki̱ʼvina nu̱ú página jw.org, chíndeé táʼanyó xíʼinna ña̱ sakuaʼana xa̱ʼa Ndióxi̱ (Mat. 24:14). Ña̱ va̱xi nu̱ú sitio ña̱ Internet ku̱a̱ʼa̱n nása̱maña ta va̱ʼaníka íyoña. Ta kúni̱yó ná kuniñúʼu ndiʼi na̱ yiví ña̱yóʼo. Xa̱ʼa ña̱yóʼo táki̱ʼva káchi ña̱ naní xíniñúʼu kunda̱a̱-iniún xa̱ʼa ña̱yóʼo, kiviva chindaʼáyó iin publicación xíʼin correo electrónico nu̱ú inkana á chindaʼáyó iin enlace ña̱ va̱ʼa tavána ña̱yóʼo nu̱ú jw.org. Tá káʼa̱nyó xíʼin na̱ yiví na̱ kúni̱ sakuaʼa xa̱ʼa Ndióxi̱ ña̱ ná ki̱ʼvina nu̱ú página ña̱ kúúmiíyó, saá kúú ña̱ chíndeéyóna ña̱ ná sakuaʼana ña̱ nda̱a̱ ña̱ táxi na̱ “esclavo fiel y discreto”, chi na̱yóʼo kúú na̱ kúúmií chiñu ña̱ sanáʼa̱na miíyó ña̱ nda̱a̱ xa̱ʼa Ndióxi̱.